AJALI ZA PIKIPIKI NA VIFO BADO TISHIO MORO.

Mkuu wa mkoa wa Morogoro akimtazama mmoja wa majeruhi wa pikipiki ambaye amepoteza fahamu kwa muda sasa na anaendelea kutibiwa hospitali ya ...

Mkuu wa mkoa wa Morogoro akimtazama mmoja wa majeruhi wa pikipiki ambaye amepoteza fahamu kwa muda sasa na anaendelea kutibiwa hospitali ya morogoro.

WATU 188 wamefariki dunia kutokana na ajali za Pikipiki ,na wengine 1,168 wakijeruhiwa kufuatia ajali 930 za usafiri huo zilizotokea kipindi cha miaka mitatu kuanzia Januari 2008 hadi kufikia Desemba mwaka 2010.

Mkuu wa Kikosi cha Usalama Barabarani Mkoa wa Morogoro, Ibrahim Mwamakula, alisema hayo , jana ( machi 4), wakati akitoa takwimu za ajali na vifo viklivyotokana na usafiri huo kwa kipindi cha miaka mitatu mbele ya Mkuu wa Mkoa wa Morogoro, Issa Machibya.

Mkuu huyo wa Mkoa alikuwa mgeri rasmi katika ufunguzi wa mkutano wa wadau wa Usalama kwa Waendesha Pikipiki na Abiria kwenye Ukumbi wa Manispaa ya Morogoro Mjini hapa, ambao ulihudhuriwa na idadi kubwa ya waendesha pikipiki pamoja na wamiliki wa usafiri huo.

Kwa mujibu wa Mkuu wa Kikosi hicho, idadi ya vifo vilivyotokana na ajali hizo kwa mwaka 2009 ni ajali 413 zilizosababisha vifo 76 , tofauti na mwaka 2010 ambapo vifo 68 vilitokea kufuatia ajali 474.

Hata hivyo alisema , Januari hadi Desemba mwaka 2008, idadi ya vifo vilivyotokea vilikuwa ni 44 kufuatia ajali 43 , na watu 260 walijeruhiwa tofauti na mwaka 2009 , ambapo majeruhi walikuwa ni 374 na mwaka 2010 watu waliojeruhiwa ni 534.

Pamoja na takwimu hizo alisema , idadi ya Pikipiki kufuatia sensa iliyoendeshwa na Kikosi chake , Mkoa una jumla ya pikipiki 2,196 kati ya hizo 1,411 zipo katika Manispaa (mjini morogoro),na Kilosa pikipiki 283.

Wilaya nyingine zenye idadi kubwa ya Pikipiki ni pamoja na Halmashauri ya Morogoro ( Morogoro Vijijini), yenye idadi ya Pikipiki 201, ikifuatiwa na Mvomero 123, Kilombero 100 na Wilaya ya Ulanga Pikipiki 78.

Hata hivyo alisema , usafiri huo umejipatia umaarufu mkubwa na watu wengi kutokana na kuweza kuwafikisha kwa haraka na urahisi katika maeneo mbalimbali na kwa gharama nafuu.

Alisema kutokana na hali hiyo, Kikosi cha Usalama Barabarani Mkoa kwa kushirikiana na wadau wengine wakiwemo TRA, SUMATRA na Halmashauri za Wilaya na Manispaa , kwa pamoja wameazisha mpango wa kutoa elimu kwa waendesha pikipiki hizo pamoja na wamiliki wao ili kupunguza ajali zinazosababisha vifo na majeruhi kwa watumiaji.

“ Manispaa ya Morogoro tayari vimeundwa vikundi 30 na kutambuliwa rasmi na kupatiwa vituo vya maengesho ya kubeba abiria …pia utaratibu kwa waendeshaji kuvaa jaketi maalumu, kofia sambamba na abiria wao na namba maalumu “ alisema Mwamakula

Alisema lengo ni kuwapatia mafunzo waendeshaji wa pikipiki hizo sambamba na leseni , na pia utaratibu unaandaliwa wa pikipiki kusajiriwa kwa namba za kibiashara ili kutofautisha na zile za matumizi binafsi.

Kwa upande wake Mkuu wa Mkoa , Machibya,aliwaonya waendesha Pikipiki hao ,wasivichukukulie vyombo hivyo kuwa ni sawa na baiskeli na hivyo kuendesha kwa mbwembwe bila kujali usalama wa abiria na watu wengine wanaotumia barabara.

“ Mkoa umeitisha mkutano huu baada ya kuongezeka kwa vifo na majeruhi yatokanayo na ajali za Pikipiki…na tumebaini wamiliki wanawapatia madareva wasio na ujuzi , pamoja ni kweli huu ni usafiri muhimu sana kwa wananchi , lakini wanaoendesha ni vyema wakapata mafunzo ya udereva “ alisisitiza Machibya.

Hata hivyo aliwataka kuacha tabia ya kubeba abiria zaidi ya mmoja ‘ Mishikaki’ au ‘nyama choma’ na kuendelea kuonya wasiziendeshe Pikipiki hizo sawa na Baiskeri.

Katika hatua nyingine, amewashauri waendesha PikiPiki hao kuanzisha Chama cha Ushirika wa kuweka na kukopa ( SACCOS) ili iwakomboe siku za usoni ya kuwa na vyanzo vya fedha zitakazo wasaidia kuinua uchumi wao kwa kumiliki pikipiki zao binafsi badala ya ilivyo sasa.

Nao baadhi ya waendesha Pikipiki hao, walisema kwa nyakati tofauti kuwa wamenufaika na elimu walioipata katika kikao hicho, na watakuwa mstari wa mbele kuhaklikisha wanalida usalama wa abiria wao pamoja na wao wenyewe.

Hata hivyo mmoja wa mwendesha Pikipiki, Deo Swai wa Kituo cha Mazimbu- IPO IPO ,alisema endapo wataendelea kupatiwa elimu hiyo anayo imani wengi wao watakuwa na uelewa zaidi na hivyo kupuguza ajali zinazoweza kuepukika.

“ sisi tuliofika hapa tumepata uelewa nzuri, lakini kila kukicha vijana wapya wanaongezeka kwenye shughuli hii na hao ndiyo hawataki kusikiliza jambo lolote …wanaweza kutuharibia mpango huu …wakorofi wengi hawajafika kwenye mkutano huu hao ndilo wakorofi” alisema Swai

Mkutano huo ulioambatana na kutolewa kwa elimu ya usalama barabarani , Mkuu wa Mkoa pia aliwakabidhi viongozi wa vituo 30 vya waendesha pikipiki jaketi maalumu la kuvaliwa na madereva hao wakati wote wanapokuwa kwenye shunghuli zao za usafirishaji abiria.

Soourse: