KATIKA waigizaji ninaowahusudu sana ambao hunipa raha kwa jinsi wanavyoendesha mambo yao ni Nicolas Cage, mtu ambaye sinema zake zimejaa u...
KATIKA waigizaji ninaowahusudu sana ambao hunipa raha kwa jinsi wanavyoendesha mambo yao ni Nicolas Cage, mtu ambaye sinema zake zimejaa ubabe na wakati mwingine kasi isiyokuwa na mazungumzo.
Kama umeshawahi kuona vitu kama “Moonstruck,” “Raising Arizona,” “Vampire’s Kiss” na “Leaving Las Vegas,” unaweza kumwangalia Cage katika umahiri wa aina yake kwenye dunia ya sinema na hasa anapoigiza dunia nyingine ndani ya dunia halisi.
Hakika ninasema unaweza kabisa kutambua kwamba hawa ni baadhi ya watu wachache katika wakati wao, ambaye amefanyakazi inayotamanisha macho, inayoamsha hisia za mwili na kukufanya ukae katika tafakari kubwa.
Cage ana safari ndefu katika mambo ya filamu lakini kwa uhakika kuanzia mwaka 1996, Cage amejibadili sana na kuwa katika staili ya Sylvester Stallone na kujiingizia fedha nyingi.
Mabadiliko haya unaweza kuyaona katika filamu nyingine zenye utamu mkubwa “The Rock,” “Con Air,” “Face/Off,” “Snake Eyes,” “Gone in Sixty Seconds,” “National Treasure,” “Ghost Rider” na filamu nyingi ambazo hadhi yake ni babu kubwa.
Pamoja na kumuona muigizaji wetu huyo katika namna hiyo katika karne hii ya 21 kwa mara nyingine tena anazuka na kitu kikali “Drive Angry,” inayoumbwa vyema na Patrick Lussier na mtata mwingine wa picha za mauaji zenye maneno kidogo Roger Corman.
Mpango mzima wa “Drive Angry” hauna tofauti na sinema hizo za genre ya mauaji ya kutisha na mauzauza ya ushetani.
Ndani ya picha hii Cage akicheza kama Milton anatoka maeneo yasiyopenyeka wala mtu aliyemo kutoka huko kuja kurejea duniani (jehenamu) kuhakikisha kwamba anazuia washenzi fulani kumtoa mjukuu wake kichanga kafara kw ahila baada ya kumrubuni binti yake na kumuua.
Kundi hili la waabudu ushetani lilikuwa linaongozwa na Billy Burke wakiwa na William Fichtner mtunza hazina wa ushetani huo ambaye amekuwa akifuatilia roho za watu zilizotibuka au ambazo zinaweza kutibuka.
Katika patashika hizo yaani stori, mtu mmoja mrembo Piper ( Amber Heard) anakuwa rafiki wa Milton na ndiyo huyu anakula naye kizaazaa mpaka mwisho.
Lussier na Todd Farmer, ambao pia waliandika “My Bloody Valentine” ndio waliochezesha skrini ya filamu hii na kuifanya kuwa moja ya filamu bora kabisa za Cage.
Simulizi lake limedakwa katika mpangilio ambao huwezi kuuachanisha na masimulizi ya hadithi ya kusisimua ya Richard Kadrey ya 2009 yenye jarida linalosomeka “Sandman Slim,”.
Lussier anaitumia vyema teknolojia ya 3-D na kuifanya sinema hii kuwa na utamu ambao ni nadra kuupata na vigumu sana kuusimulia.Filamu hii ina mbio za magari, bunduki kibwene na risasi kama mvua huku ukifurahishwa na gari anayoiendesha Milton ya ’69 Charger ambayo kama kawaida inakuwa mwanzo na mwisho wa matatizo.
Lussier amefanya kazi ya kutosha kuweka mambo mengi ya siri na ya faraghani wazi kwa kuzingatia muondoko wa filamu yenyewe; na hata ukijaribu kutotaka kuizungumzia “Drive Angry” ukiiangalia itakufanya uwe na uhakika, mimi nimeiona katika trela.
Filamu hii ina mambo mengi yanayohusu ubinadamu na utupu, vurumai zisizokuwa na mantiki kichwani na kama huna akili tazama usiache ubongo wako nje ya nyumba.
Ni simulizi kali ambalo linaonesha kuwa Cage ni fasta na mwisho wa matatizo.
Utamu wa picha hii upo unapoelewa kuwa John Milton (Nicolas Cage) ni mhalifu ambaye ametoka eneo wasiloweza watu kutoka kwa lengo moja tu, nalo ni la kumuua Jonah King (Billy Burke), kiongozi wa kundi linaloabudu mashetani hapa duniani.
Jamaa huyu ndiye aliyemshawishi kwa mitego mikubwa mtoto wa kike wa Milton kujiunga na kundi lake katika siku ambayo baba yake (Milton) amekufa.
Lakini alipoingia alichofanya ni kumuua binti huyo wa Milton na mumewe na kisha kumnyakua mjukuu kwa lengo la kwenda la kumtoa kafara binti huyo katika dini ya kuabudu mashetani.
Baada ya kuwahoji wafuasi kadhaa wa King, Milton anagundua kwamba kafara hilo litatolewa katika eneo linaloitwa Stillwater, gereza lililopo Louisiana.
Milton anasimama eneo fulani kupata mlo ambako anakutana na binti mrembo Piper (Amber Heard), ambaye hataki kumpa penzi rafiki yake wa kiume, Frank (Todd Farmer), ili aweze kumuoa kwanza.
Milton anaiharibu gari ya Piper kwa lengo la kumfanya afike kwake. Wanaenda nyumbani kwa Piper na pale binti huyo anamuona Frank akifanya mapenzi na mwanamke mwingine na balaa kubwa linazuka.
Milton anamsaidia kumnyuka kisawasawa Frank kisha anamchukua Piper na kwenda naye hadi mji wa Smithfalls. Huko nako matata mapya yanaanza.
Wakati huo huo mtumishi wa shetani, The Accountant (William Fichtner) anawasili duniani kumfuata Milton kumrudisha jehenamu. Baada ya kumhoji Frank, anagundua kwamba Milton na Piper wanaelekea Louisiana na anajitumbukiza ndani ya polisi na kujifanya ajenti wa FBI ili awe na kasi ya kumfikia Milton.
Na kuanzia hapo ni bunduki na mauzauza ya shetani , magari hewani magari baranarani , milipuko, anatekwa huyu anazidiwa huyu mpaka mtoto anaokolewa na anapewa Piper na baadaye yule mtumishi wa shetani anapatana na Milton wanarejea pamoja.
Kuna mengi mno ya kusimulia ambayo yamo katika hadithi lakini kwa leo ninapenda kukushawishi kuisaka filamu hii kama wewe ni mmoja wa mashabiki wa mzee huyu wa kazi kama katika Ghost Rider kama Drive Angry.
COMMENTS