JK ashiriki maziko ya Mzee Omar

Rais Jakaya Kikwete pamoja na viongozi wengine wakisubiri maziko. Rais Jakaya Mrisho Kikwete jana alishiriki katika maziko ya Mzee Omar Sele...

Rais Jakaya Kikwete pamoja na viongozi wengine wakisubiri maziko.

Rais Jakaya Mrisho Kikwete jana alishiriki katika maziko ya Mzee Omar Selemani (107) ambaye alikuwa Mwenyekiti wa Baraza la Wazee wa CCM Mkoa wa Dodoma na muasisi wa chama cha TANU na CCM.
Mzee Suleiman alifariki dunia hospitali ya mkoa wa Dodoma juzi tarehe 9 Februari, 2012 alikokuwa amelazwa kwa matibabu.
Mazishi hayo yaliongozwa na Katibu Mkuu wa Chama cha Mapinduzi (CCM) Wilson Mukama na Mzee Selemani alizikwa makaburi yaliyopo Kikuyu.
Akitoa salamu za rambirambi kabla ya marehemu kufikishwa katika msikiti wa barabara ya tisa kwa swala kabla ya maziko, Mukama alisema kuwa Mze Selemani atakumbukwa kwa ujasiri wake kwa kumkaribisha nyumba ni Mwalimu Julius Nyerere wakati wa juhudi za kupigania uhuru.
Alisema mchango wa Mzee Selemani umeenziwa wa kati wa miaka 50 ya uhuru ambapo alizivikwa nishani katika kutambua mchango wake wa kupigania uhuru.Nishani ambayo kwa mujibu wa Mukama wanapewa watu waadilifu na wanyenyekevu.
“Mzee Selemani ni mnara na kumbukumbu zake hatutazifuta kitabuni” alisema Mukama.
Katika salamu hizo alisema kwambva CCM imetoa shilingi milioni 5 kama rambirambi yake kwa familia yam zee Selemani na kugharamia maziko yake.
Naye Mwenyekiti wa CCM mkoa wa Dodoma , William Kusila alisema kuwa huwezi kuzungumzia siasa na maendeleo ya mkoa wa Dodoma biula ya kumtaja Mzee selemani.
Alisema historia ya CCM Dodoma iliandikwa usoni mwake na alikienzi chama na kukitumikia akiwa ni mfano mzuri wa kuigwa.
Viongozi kadhaa wa CCM, wabunge ,serikali walikuwepo kuhudhuria maziko hayo. Viongozi hao ni pamoja na Mzee John Malecela,Katibu wa CCM wa Itikadi na Uenezi Nape Nnauye, Mkuu wa mkoa wa Dodoma Dk Rehema Nchimbi, Mkuu wa wilaya ya Bahi Betty Mkwassa na viongozi wa kidini na madiwani.
Jana Rais wa Jamhuri ya Muungano wa Tanzania, Dk. Jakaya Kikwete amemtumia salamu za rambirambi Mwenyekiti wa Chama Cha Mapinduzi (CCM) Mkoa wa Dodoma, William Jonathan Kusila kufuatia kifo cha mzee huyo.
“Nimesikitishwa na kuhuzunishwa sana na kifo cha Mzee Omar Selemani ambaye katika uongozi wake ndani ya Chama chetu alijipambanua kwa ushupavu na busara zake vitu ambavyo vilikuwa bado vinahitajika sana”, amesema Rais Kikwete katika salamu zake.
Rais Kikwete amesema yeye binafsi amewahi kufanya kazi kwa karibu na Mzee Selemani enzi za uhai wake na akabainisha jinsi uongozi wake kwa Chama ulivyosaidia sana katika kukijenga na kukiimarisha Chama Cha Mapinduzi hususan katika Mkoa wa Dodoma, ameongeza kusema Rais Kikwete.
“Kwa hakika kifo chake kimeleta majonzi na simanzi kubwa si kwa familia yake tu bali pia kwa wana-CCM kote nchini lakini kipekee kwa wana-CCM wa Mkoa wa Dodoma ambao walinufaika moja kwa moja na mchango wake hasa kutokana na uchapakazi wake, uaminifu na uadilifu wake kwa Chama chetu”, ameongeza kusema Rais Kikwete.
“Kutokana na ukweli huo na kwa dhati ya moyo wangu, natuma salamu za rambirambi na pole nyingi kwa familia ya Marehemu Mzee Selemani kwa kuondokewa na mpendwa wao ambaye hapana shaka alikuwa pia nguzo imara na mhimili madhubuti kwa maendeleo na ustawi wa familia”, amesema Rais Kikwete.
Ameihakikishia familia ya Marehemu kuwa yeye binafsi yuko pamoja nao katika kuomboleza msiba huu mkubwa, na amewaomba wawe na moyo wa uvumilivu na subira katika kipindi hiki kigumu cha maombolezo kwa kujua kuwa yote ni mapenzi yake Mola.
“Ninamuomba Mwenyezi Mungu, mwingi wa Rehema ailaze mahali pema peponi roho ya Marehemu Mzee Omari Selemani, Amina”, alimalizia salamu zake za rambirambi Rais Kikwete.