Moyo ni kama vile hautaki muungano hata kama anabadili maneno

Mzee moyo akionesha alichokisema ni hati ya muungano Mwasisi wa Muungano wa Tanyanyika na Zanzibar na waziri wa kwanza wa sheria na kat...

Mzee moyo akionesha alichokisema ni hati ya muungano

Mwasisi wa Muungano wa Tanyanyika na Zanzibar na waziri wa kwanza wa sheria na katiba wa Muungano Hassan Nassoro Moyo amekitaka chama cha mapinduzi kuacha kuwatisha na kuwabungudhi wanachama na viongozi wake  wanaotofautiana na mawazo na msimamo wa chama katika Muungano.

Akizungumza na waandishi wa habari mjini hapa kuhusu Muungano na mchakato wa maoni ya katiba,alisema kila mwananchi yupo huru kutoa maoni yake katika Muungano katika kipindi hichi cha tume ya marekebisho ya katiba.

Alisema chama cha Mapinduzi kinapitaka katika wakati mgumu wa wimbi la mabadiliko na kukitaka chama kisiogope mageuzi ya maoni ya watu kuhusu muundo wa Muungano utakaokuwa na maslahi ya wananchi wa Zanzibar.

‘Huu si wakati tena wa kutishana kwa wananchi katika maoni ya Muungano…..chama kisiingilie maoni ya wananchi na viongozi wanaotofautiana na muelekeo wa chama wa muungano wa serikali mbili’alisema.

Alisema mchakato wa maoni ya katiba haufungamani na chama cha siasa kwa hivyo hakuna sababu ya chama kuwatisha wafuasi wake kwa wale wenye maoni tofauti katika muungano.

Alisema muundo wa zanzibar na Tanganyika hivi sasa unahitaji mabadiliko makubwa kwa ajili ya kukidhi matarajio ya wananchi walio wengi ikiwemo wa kizazi kipya ambacho
kinahitaji kuona Muungano wenye tija.

Alipoulizwa kama haoni anakwenda kinyume na msimamo na muelekeo wa chama cha Mapinduzi wa serikali mbili,alisema kila mwananchi na mwanachama yupo huru kutoa maoni yake kwa ajili ya kuona Zanzibar inapata Muungano wenye maslahi.

‘Huu sio mchakato wa chama cha Mapinduzi……chama sio kilioleta Muungano huu na mimi msimamo wangu ni muungano wa mkataba ndio wenye maslahi kwa wananchi wa Zanzibar’alisema.

Hivi karibuni akifunguwa mkutano wa tawi la Bububu,naibu katibu mkuu wa chama cha mapinduzi Zanzibar Vuai Ali Vuai aliwakemea viongozi wa CCM wanaobeba sera ya Muungano wa mkataba na kusema inakwenda kinyume na sera ya CCM na wanatakiwa
kukihama chama.

Mzee moyo akizungumza

Vuai alisema wagombewa wa chama cha mapinduzi katika uchaguzi mkuu wa mwaka 2010 rais Jakaya Kikwete pamoja na rais wa Zanzibar dk.Ali Mohd Sheni walinadi sera ya muungano wa serikali mbili ambayo ndiyo iliyokubaliwa na kukipa ushindi chama.

Mzee Moyo alifafanua na kusema yupo tayari kurudisha kadi ya chama cha Mapinduzi kama  atalazimishwa kuwajibishwa na chama kutokana na  kutofautiana na msimamo wake.

Moyo alitoa kauli hiyo baada ya kuulizwa swali kwamba vipi yupo tayari kukihama chama kutokana na kutofautiana kimsimamo na chama cha mapinduzi ambacho sera yake katika muungano ni serikali mbili.

Akifafamnua kero za muungano Moyo alisema zilianza miaka mingi katika mwaka 1970 baada ya hayati Karume kutaka kuondolewa kwa mambo manne katika orodha ya muungano.

‘Nakumbuka kabisa tulikwenda Dar-es-Salaam kuonana na baba wa taifa na kumueleza mambo manne ambayo Zanzibar inataka kuondoshwa katika orodha ya mambo ya Muungano’alisema Moyo.

Aliyataja mambo hayo ikiwemo suala la sarafu,mambo ya nchi za nje,pamoja na polisi na mambo ya hali ya hatari.

Moyo alisema mambo hayo manne ambayo yalijitokeza katika mwaka 1970 yamejitokeza tena hivi karibuni na kusababisha wananchi kutaka kuwepo kwa dola huru inayojitegemea Zanzibar.

Moyo alikuwa Waziri wa kwanza wa Sheria na Katiba katika Muungano wa Tanganyika na Zanzibar katika mwaka 1964 na baadaye kushika nafasi ya waziri wa mambo ya nchi katika mwaka 1977- 1980.

Alisisitiza na kusema yeye ni muumini mkubwa wa Muungano huo na kufaidika na mambo mbali mbali lakini kwa sasa kutokana na wakati uliopo mabadiliko makubwa yanahitajika yatakayoifanya Zanzibar kuwa dola kamili inayojitegemea.

‘Mimi ni muumini mkubwa wa muungano wala sijanuna…..lakini wananchi wanataka mabadiliko makubwa katika muungano utakaokuwa na maslahi na tija kwa wananchi wote’alisema.