Mwangosi azikwa kijijini kwao, Busoka wilayani Rungwe

Mwili wa Mwandishi aliyeuawa kwa bomu la machozi , Daudi Mwangosi ukipelekwa makaburini katika kijiji chake cha Busoka, wilayani Ru...

Mwili wa Mwandishi aliyeuawa kwa bomu la machozi , Daudi Mwangosi ukipelekwa makaburini katika

kijiji chake cha Busoka, wilayani Rungwe mkoani Mbeya

MWENYEKITI wa Klabu ya Waandishi wa Habari Mkoa wa Iringa (IPC) na mwandishi wa Kituo cha Channel Ten, Daudi Mwangosi aliyeuawa kwa kupigwa kwa bomu, amezikwa leo majira ya saa 7.30 mchana kijijini kwake Busoka wilayani Rungwe, mkoani Mbeya.

Mwangosi aliuawa Septemba 2, kijijini  Nyololo, wilayani Mufindi mkoani Iringa katika tukio ambalo Chadema walikuwa wakifungua tawi la chama chao, huku jeshi la Polisi likitumia nguvu kubwa yakiwemo mabomu ya machozi kuzuia uzinduzi wa tawi hilo.

Katibu Mkuu wa Chadema Dk Willbroad Slaa kiweka shada la maua juu ya kaburi

lililotumika kuhifadhi mwili wa Mwandishi aliyeuawa kwa bomu, Daudi Mwangosi

Mamia ya wakazi wa kijiji hicho, wanasiasa wa vyama vya CCM na Chadema na waandishi wa habari kutoka mikoa ya Iringa na Mbeya walishiriki katika maziko  hayo waliyoyaratibu.

Katibu Mkuu wa Chadema, Dk Wilbroad Slaa na Waziri wa Nchi Ofisi ya Rais asiye na Wizara Maalum, Prof Mark Mwandosya walishiriki maziko hayo ambayo nusura yatawaliwe na hisia za kisiasa kabla IPC kwa kushirikiana na waandishi wengine kuidhibiti hali hiyo.

Katibu Msaidizi wa IPC, Francis Godwin aliwatahadharisha wanasiasa wa vyama hivyo kwamba Mwangosi atazikwa kama mwandishi wa habari japokuwa aliuawa katika tukio lililohusisha shughuli za kisiasa.

Waziri Asiye na Wizara Maalumu, Profesa Mark Mwandosya na mkewe wakiweka shada la

maua  kaburi lililotumika kuhifadhi mwili wa Mwandishi aliyeuawa kwa bomu, Daudi

Mwangosi(Picha zote na Frank Leonard wa Habarileo)

Katika rambirambi zao IPC walitoa kwa familia ya marehemu Sh 750,550 huku Klabu ya Waandishi Mkoani Mbeya (MPC) nayo ikitoa kiasia kama hicho ambacho sehemu yake kubwa ilitumika kufanikisha shughuli ya mazishi na maziko hayo.

Wengine waliotoa rambirambi ni Mlezi wa Klabu ya Waaandishi wa Habari Mkoa wa Iringa, Salim Asas aliyetoa Sh Milioni moja, Misa Tanzania Sh 500,000 na Channel Ten Sh 700,000 kwa mke na watoto wa marehemu.

Akitangaza rambirambi mbele ya mamia ya waombelezaji, Dk Slaa alisema watabeba jukumu la kumsomesha mtoto wa kwanza wa Mwangosi. Mtoto huyo ambaye hata hivyo jina lake halikuweza kupatikana mara moja yupo kidato cha nne katika shule ya sekondari ya Malangali, wilayani Mufindi mkoani Iringa.

Naye Prof Mwandosya alisema atabeba jukumu la kuwasomesha watoto wengine wa marehemu huku akiahidi kufuatilia ahadi za watu wengine katika kuisaidia familia ya Mwangosi kwa kuwa marehemu huyo ni ndugu yake wa jirani.

Wengine waliochangia familia ya Mwangosi ni Mbunge wa Viti Maalumu Mkoa wa Iringa (Chadema), Chiku Abwao aliyetoa Sh 100,000.

Kutoka huko Iringa baadhi ya wananchi waliongea na gazeti hili, wameitaka familia ya marehemu ifungue kaunti maalumu kwa ajili ya kuwasaidia ili watu wengi zaidi wapate kuwachangia.

"Kuna haja kwa famili kuwa na akaunti maalumu itakayochangiwa na watu mbalimbali kwa kuzingatia kwamba Mwangosi ameacha mke ambaye ni mama wa nyumbani na watoto wanaohitaji kuendelea kusoma na kupata huduma nyingine muhimu walizokuwa wakipata kutoka kwa marehemu baba yao," alisema Lukelo Mkami

source Franks Leonard Habarileo