UMOJA WA MATAIFA WAADHIMISHA KWA MARA YA KWANZA SIKU YA KIMATAIFA YA MTOTO WA KIKE

Kwa mara ya kwanza, jana Alhamisi, Umoja wa Mataifa umeadhimisha siku ya Kimataifa ya Mtoto wa Kike kwa kutoa wito wa kukomesha ndoa za...

Kwa mara ya kwanza, jana Alhamisi, Umoja wa Mataifa umeadhimisha siku ya Kimataifa ya Mtoto wa Kike kwa kutoa wito wa kukomesha ndoa za utotoni. Na kuhimiza elimu kama  mkakati wa kuwalinda watoto wa kike dhidi ya  mila hii potofu ya kuwaoza wakingali bado wadogo.

Katika salamu zake katika maadhimisho hayo, Katibu  Mkuu wa Umoja wa Mataifa, Ban Ki Moon amesmea “ elimu kwa  watoto wa kike ni moja ya mkakati wa kuwalinda dhidi ya ndoa za utotoni. Watoto wakike wakipata na fursa ya  kukaa shuleni na kuepuka kuolewa mapema, wanajijengea uwezo na misingi ya kuwa na maisha bora kwao wenyewe na familia zao”.

Pichani ni watoto wakike wakiwa katika sare zao za shule, Umoja wa Mataifa umeitenga Octoba 11 ya kila mwaka kuwa Siku ya Kimataaifa ya Mtoto wa kike,    madhumuni yakiwa ni pamoja na mambo mengine kutathimini changamoto za msingi zinazomkabili mtoto wa kike kama vile ndoa za utotoni. Maadhisho ya mwaka huu ambayo yamefanyika  siku ya Alhamisi yaliambatana  na majadiliano yaliyowahusisha watu mashuhuri akiwamo  Katibu Mkuu wa Umoja wa Mataifa Ban ki  Moon na Askofu Mkuu Desmond Tutu.  Ujumbe maalum wa  mwaka huu katika maadhimisho hayo ulikuwa  " Ukomeshaji wa Ndoa za Utotoni".

Akaongeza kwa kusema “ Hebu na tutimize wajibu wetu wa kuwaacha watoto wa kike wawe watoto wakike na sio wachumba”. Huku akizihimiza serikali,  jamii, viongozi wa dini,  vyama vya kijamii, sekta binafsi ,familia  na hususani wanaume na wavulana kutetea haki za watoto wa kike.

Mwezi wa  Desemba mwaka  2011, Baraza Kuu la Umoja wa Mataifa lilipitisha Azimio linaloitangaza   Octoba 11 ya kila mwaka kuwa  siku ya  kimataifa ya mtoto wa kike, dhumuni likiwa  katika kutambua changamoto za msingi zinazomkabili mtoto wa kike duniani kote. Maudhui ya mwaka huu ya siku hii ya kimataifa ya mtoto wa kike  ni “Utokomezaji wa ndoa za utotoni”

Kwa mujibu wa  taarifa za Umoja wa Mataifa, inakadiriwa kwamba leo hii kuna wanawake vijana zaidi ya milioni 70 walioolewa wakiwa chini ya miaka 18.  Kielelezo kinachodhihirisha kwamba ndoa za utotoni zinamnyima na kumkatisha mtoto wa kike haki yake ya kupata elimu, na kupunguza fursa mbalimbali na kuongeza hatari ya kuwa mhanga wa vitendo vya kikatili na uharibifu wa afya yake.

Katika maadhimisho hayo,  ilielezwa  bayana kwamba mtoto wa kike mwenye elimu duni anayonafasi kubwa ya kuolewa mapema na ndoa za utotoni zimedhihiria kuwa mwisho wa fursa ya elimu kwa mtoto wa kike.

Viongozi mbalimbali waliokusanyika hapa Umoja wa Mataifa  katika maadhimisho ya Siku ya  Kimataifa ya  Mtoto wa Kike, ambayo kwa mara ya kwanza imefanyika hapa Umoja wa Mataifa. Mwezi Desemba mwaka jana  Baraza Kuu la Umoja wa Mataifa   lilipitisha azimio lililotamka kwamba Octoba 11 ya kila  mwaka itakuwa  ni Siku ya Kimataifa ya Mtoto wa Kike

Aidha takwimu za Umoja wa Mataifa  zimedhihirisha pia kwamba  kwa wasichana ambao wamepata fursa ya kufikia elimu ya sekondari hawamo katika hatari ya kuolewa  wakiwa na umri mdogo na hivyo kuthibitisha kwamba elimu ndio  silaha sahihi ya  kupambana na ndoa za umri mdogo.

Maadhimisho hayo hapa Umoja wa Mataifa yamefanyika sambamba na  majadiliano yaliyohusisha viongozi mbalimbali akiwamo Askofu Mkuu Desmond Tutu na wawakilishi katoka Mashirika ya Umoja wa mataifa ya UNFPA, UNICEF, UN Women  pamoja na maonesho  ya picha zilizokuwa na maudhui “ bado ni mdogo mno kuolewa”

Aidha maadhimisho  hayo ya Siku ya Kimataifa ya Mtoto wa Kike, yamefanyika ikiwa ni takribani kama siku mbili hivi kupita tangu kuuawa kwa Malala Yousufzai, msichana wa miaka 14 huko Pakistani kosa lake likiwa ni kupigania haki ya mtoto wa kike kwenda shule, msichana huyo aliuawa kwa kupigwa risasi na watu wanaodaiwa ni wa kundi la Talban wakati akitoka shule.

Kifo cha msichana huyo kimemfanya Katibu Mkuu Ban Ki Moon kuonyesha mshangao wake mkubwa dhidi ya  kiwango cha matumzi ya nguvu, vurugu, ubaguzi na unyanyasaji ambao bado unaendelea katika karne ya leo dhidi ya mtoto wa kike.

Akasema Ban Ki Moon,  “ Kumshambulia mtotot huyo  mtetezi wa haki ya wasichana  kupata elimu ni kitendo  siyo tu cha udhalimu bali ni uoga wakijinga  ulioonyeshwa na magaidi dhidi ya nguvu ya elimu kwa mtoto wa kike.  Haiingi akilini mahali popote duniani  ambako kitendo cha mtoto wa kike kupigania fursa  na haki yake ya kupata elimu kikatafsiriwa kama kitendo cha ushajaa  na kusababisha kukatisha uhai wake ”.