Ajali yamuua mchungaji Mtikila

  Mwenyekiti wa Chama cha Democratic Party (DP), Mchungaji Christopher Mtikila   amekufa kwa ajali ya gari leo alfajiri eneo la Msolwa...

 Mwenyekiti wa Chama cha Democratic Party (DP), Mchungaji Christopher Mtikila  amekufa kwa ajali ya gari leo alfajiri eneo la Msolwa-Chalinze.
Taarifa za kifo chake zimethibitishwa na Naibu Katibu Mkuu wa chama cha DP, Abdul Mluya.
Mchungaji Christopher Mtikila  amezaliwa  Iringa mwaka 1950.
Pamoja na shughuli za siasa, Mchungaji Mtikila ni mwanzilishi na mkuu wa kanisa la kipentekoste la Full Salvation Church.
Mchungaji Mtikila anajihusisha pia na harakati za haki za binadamu kwa kupitia kitengo cha haki za binadamu cha kanisa hilo kiitwacho Liberty Desk.
Mwanzoni mwa miaka ya 90, mchungaji Mtikila alijipatia umaarufu mkubwa katika siasa za Tanzania kutokana na uwezo wake mkubwa wa kuongea, upinzani wake dhidi ya muundo wa muungano kati ya Tanganyika na Zanzibar.
Aidha amekuwa na madai mazito kuhusu uhujumu wa uchumi unaofanywa na wahindi (ambao anawaita Magabacholi), na kesi mbalimbali za kikatiba alizokuwa akifungua katika mahakama za Tanzania.
Kwa muda mrefu chama chake cha DP hakikuweza kupata usajili wa kudumu kutokana na kukataa kwake kutambua Zanzibar.

Alikuwa akisisitiza kuwa chama chake ni cha Tanganyika na sio Tanzania. Hata hivyo Mtikila amebadili msimamo wake katika miaka ya karibuni kwa kukubali kutafuta wanachama toka Zanzibar (kama sheria ya uchaguzi inayotaka) na hivyo chama chake kuweza kupata usajili wa kudumu.
 Mtikila alikuwa ni kati ya wagombea 10 wa nafasi ya urais katika uchaguzi mkuu wa mwaka 2005. Katika uchaguzi huo alipata kura asilimia 0.27.
Kesi za kikatiba ambazo amewahi kufungua ni pamoja kesi ya kutaka wagombea binafsi kuruhusiwa katika uchaguzi Tanzania, wananchi wa Tanzania Bara kuruhusiwa kwenda Zanzibar bila pasipoti, na vyama vya siasa kuruhusiwa kufanya mikutano bila kuomba kibali toka kwa Mkuu wa wilaya na polisi.
Mtikila alifungwa kwa mwaka mmoja mwaka 1999 baada ya kupatikana na hatia ya kutoa maneno ya kashfa dhidi ya aliyekuwa katibu mkuu wa Chama Cha Mapinduzi (CCM) , marehemu Horace Kolimba. Mwaka 2004 alihukumiwa kifungo kilichosimamishwa cha miezi sita kwa kutoa maneno ya kashfa dhidi ya mkuu wa polisi wa wilaya ya Ilala.
REST IN PEACE MCHUNGAJI MTIKILA

Salamu za rambirambi kutoka Maznini

Kaka
Nakushukuru kweli kwa simu yako ya jana. Poleni na Msiba wa Mchungaji Mtikila. Hakuna asiyemfahamu mchungaji huko ndani na nje ya nchi yetu. Pamoja na utofauti wa mitazamo ya
kisiasa waliyonayo wanasiasa. Kwa wananchi wengi wa kawaida wa vyama
na jamii mbalimbali bado wanamuona Mchungaji huyo kama  mtu
aliyeipenda sana nchi yake. Mwenyezi Mungu ahimidiwe.

Maganga