BASI la abiria kutoka mkoani Dodoma, Safari Njema na lori lenye tela lililokuwa limebeba mifuko ya saruji, yameteketea kwa moto na kusababisha kifo cha mtu mmoja na msongamano mkubwa wa magari kwenye Barabara Kuu ya Dar – Morogoro baada ya kugongana leo mchana.
Ajali hiyo ilitokea saa nane mchana wakati basi hilo likitokea mkoani Dodoma na lori hilo likienda mikoani likiwa limebeba saruji, na chanzo chake ni lori hilo kupoteza mwelekeo na kuligonga basi hilo ambalo lilijaribu kulikwepa, lakini likagongwa ubavuni na kusababisha mlipuko mkubwa na kuwaka moto magari yote mawili.

Watu walibaki wakishangaa

Basi hilo lina namba za usajili T 990 AQF wakati lori liliteketea kabisa kichwa chake, lakini tela lake lenye namba za usajili T 534 BYJ limebaki.
Ajali hiyo ilitokea katika eneo la Garage, Kimara  kati ya Suka na Stop Over wilaya mpya ya Ubungo katika Barabara Kuu ya Dar – Morogoro, na kusababisha kifo cha mtu mmoja ambaye ameungua moto kiasi cha kutotambulika.
Vijana wasiowaaminifu waliamua  hivi


Watoto watano na wadada wanne wameripotiwa kuokolewa dakika 15 baada ya magari hayo kuwaka moto, huku abiria wengine wa basi hilo wakiruka kwa nia ya kuokoa maisha yao katika ajali hiyo mbaya.
Hadi leo saa 12.30 jioni, bado magari hayo yalikuwa eneo la ajali na kulikuwa na msururu mrefu wa magari kutoka eneo la Mbezi kwenda jijini Dar es Salaam pamoja na kutoka jijini Dar es Salaam kwenda nje ya Jiji na mikoani na abiria walikuwa wakitembea kwa miguu.
Akizungumza katika eneo la ajali kiasi cha saa 12.45 jioni, Kamanda wa Polisi Mkoa wa Kinondoni, Kamishna Msaidizi wa Polisi, Suzan Kaganda alithibitisha kifo cha mtu mmoja ambaye anaelezwa kuwa ni mtoto, na amehifadhiwa katika Hospitali ya Taifa ya Muhimbili kwa utambuzi zaidi.
Kamanda Kaganda alieleza kuwa ajali hiyo imesababisha majeruhi 16 ambao kati yao, 10 hali zao ni mbaya na wamelazwa Hospitali ya Taifa ya Muhimbili wakati sita waliruhusiwa kurejea makwao baada ya kutibiwa kwani walipata mshtuko tu.
Source:habarileo



Post a Comment

Find Us On Facebook

TANGAZA NASI LEO