HATUTAKUBALINA NA WACHOCHEZI - WAZIRI MKUU

  *Asisitiza amani kwanza, masuala mengine baadaye WAZIRI MKUU Kassim Majaliwa amesema Serikali haitakubali kuona watu wachache wanac...

 *Asisitiza amani kwanza, masuala mengine baadaye
WAZIRI MKUU Kassim Majaliwa amesema Serikali haitakubali kuona watu wachache wanachochea vurugu na kusababisha watu wengine wapoteze maisha ilhali wao hawadhuriki.
Ametoa kauli hiyo jana jioni (Jumatano, Februari 15, 2017) wakati akizungumza na maelfu ya wananchi waliohudhuria mkutano wa hadhara kwenye uwanja wa michezo wa mjini Kibaya, wilayani Kiteto, mkoani Manyara.
Waziri Mkuu ambaye alikuwa katika siku ya kwanza ya ziara yake ya siku sita mkoani Manyara, alisema: “Hatutakubaliana na wachochezi. Hatutakubaliana na yeyote atakayesababisha kifo. Tukibaini kuna uchochezi, tutawasaka wahusika na kuwashughulikia,” alisema.
“Hapa kulikuwa na majina ya ajabuajabu, hatutakubali Kiteto iitwe Soweto au Kossovo, hapa ni Tanzania. Hatuwezi kuishi kwa kubaguana, ni lazima tuheshimu maamuzi ya wazee wetu wa kimila ambao wamesimamia zoezi hili ili kurejesha amani ya Kiteto,” alisema.

Waziri Mkuu, Kassim Majaliwa akipokea  kutoka Mzee Mbambire Oloi Kurukur, jani la mti ikiwa ni ishara ya amani ya kukomesha mapigano kati ya wakulima na wafugaji wilayani Kiteto kabla ya kuhutubia mkutano wa hadhara kwenye uwanja wa michezo wa  Kiteto, Februari 15, 2017..

Waziri Mkuu, Kassim Majaliwa akipokea  kutoka kwa  Katibu wa Baraza la Amani la  Kiteto,  Salum Mambo, jembe la asili  ikiwa ni ishara ya kukoma kwa mauaji kati ya wakulima na wafugaji wilayani Kiteto katika mkutano wa hadhara aliouhutubi kweye uwanja wa michezo wa Kiteto, Februari 15, 2017

Wananchi wa Kiteto wakimshangilia Waziri Mkuu, Kassim Majaliwa wakati alipowahutubia  mkutano wa  hadhara kwenye uwanja wa michezo wa Kiteto Februari 15, 2017

Alisema zamani Kiteto kulikuwa hakuna lugha ya amani lakini hali kwa sasa imebadilika na kuwa nzuri na akasisitiza kwamba hakuna kurudi nyuma.
Alisema anamshukuru Waziri Mkuu mstaafu, Mhe. Mizengo Pinda kuwa kufuatilia suala hilo na kuunda tume ya kutafuta amani wilayani Kiteto. “Nilipoingia madarakani, nami nilianza kufuatilia suala hilo ili nijue chanzo hasa ni nini. Nikabaini kuwa mgogoro mzima umechangiwa na chokochoko tu za watu wachache,” alisema.
Mapema, viongozi wa kimila walimkabidhi Waziri Mkuu rungu, jembe dogo na jani la mti wa asili (Kimasai unaitwa elisibie) ikiwa ni ishara amani ya kukomesha mapigano baina ya wafugaji na wakulima. Pia alishiriki dua ya kuombea amani ambayo iliongozwa na viongozi wa dini.
Mzee Mbambile Oloi Kurkur (65) ambaye amejiita ni msimamizi wa mila za Kimasai alisema Mungu yuko na anaweza kusimamia na kudumisha amani ambayo wameiombea. Alisema Mungu ameumba mti wa ajabu ambao haukauki kwa mwaka mzima na majani na hubaki ya kijani hata wakati wa kiangazi kikali. “Jani hili tunakukabidhi ikiwa ni ishara ya makubaliano yetu kuwa ya kudumu,” alisema.
Naye Mwenyekiti wa Kamati ya Baraza la Amani la Wilaya ya Kiteto, Mzee Abubakar Mrisho alisema kamati hiyo iliundwa na wazee 70 ambao walipita katika tarafa saba za wilaya hiyo na kutoa elimu kwa wakazi wa vijiji vyote 23 juu ya umuhimu wa suala kudumisha amani.
Ili kuhitimisha kazi yao, Mzee Mrisho alimweleza Waziri Mkuu kwamba jana asubuhi, waliwachagua wazee kutoka makabila manne ya Wamasai, Wanguu, Wakamba na Wagogo ili wawakilishe makabila yote ya wilaya hiyo kwenye tambiko la kuoza ardhi.
“Baada ya tambiko tulitoa tamko la Baraza la Amani kwamba mauaji hapa Kiteto sasa basi.Yeyote atakayeona anabanwa, Kiteto haina nafasi naye tena,” alisema.
Kwa upande wao, viongozi wa dini walitumia mkutano huo wa Waziri Mkuu kuomba dua kwa ajili ya kuombea amani, haki, vita dhidi ya rushwa, ufisadi na dawa za kulevya na pia kuombea mvua ya kiasi na yenye kuleta neema.
Askofu Isaiah Chambala wa CCT alimuomba Mumgu awashe moyo wa upendo, amani na udugu miongoni mwa wakazi wa Kiteto, mkoa wa Manyara na Tanzania kwa ujumla.
Padre Filbert Moita wa Kanisa la Roma aliombea kuwe na haki na amani kwa watu wote na Mungu awasaidie watu wake ili waheshimiane kidugu katika wilaya hiyo na mkoa mzima.
Mwalimu Juma Hicha wa BAKWATA mbali ya kuombea amani wilayani humo, aliwaombea viongozi wa kitaifa wapewe hekima ya kuongoza nchi na Mungu awajalie nguvu ya kupambana na ufisadi, dhuluma na dawa za kulevya na zaidi ya yote Mungu awatie nguvu ya kuikamilisha vita hiyo.
Leo Waziri Mkuu anaendelea na ziara yake katika wilaya ya Simanjiro.
IMETOLEWA NA:
OFISI YA WAZIRI MKUU,
ALHAMISI, FEBRUARI 16, 2017.