Dar yajipanga kwa Juma la Mitindo na Uchumi wa Ubunifu

Jiji la Dar es Salaam linajiandaa kuanzia Desemba 5 hadi 7, 2025, kuwa na matukio mawili makubwa yanayokwenda sambamba ndani ya Swahili Fash...

Jiji la Dar es Salaam linajiandaa kuanzia Desemba 5 hadi 7, 2025, kuwa na matukio mawili makubwa yanayokwenda sambamba ndani ya Swahili Fashion Week na Tanzania Creative Economy Expo 2025. 

Matukio hayo ya siku tatu yanalenga kuleta pamoja wabunifu, wajasiriamali, na wadau kutoka sekta mbalimbali za ubunifu ikiwemo mitindo, urembo, sanaa, mapambo, chakula, teknolojia, utamaduni, utalii, na maisha.

Katika jukwaa la Mustafa Hassanali, Ratiba inaonyesha siku tatu zitakazosheheni maonyesho ya mitindo na hafla za kutunuku tuzo zinazoshirikisha wabunifu kutoka ndani na nje ya nchi.

Ijumaa, Desemba 5, itakuwa na maonyesho kutoka kwa wabunifu mashuhuri kama IVS, Tory Elegance kutoka Dodoma, Belister Clothing Brand, Blackcherry, Incity, na wengine wengi, huku pia kukifanyika utoaji wa tuzo za Mwanamitindo wa Kiume na Mwanamitindo wa Kike wa Mwaka.

Jumamosi, Desemba 6, itajumuisha shindano la Washington Benbella Emerging Designers Competition. Maonyesho makali kutoka kwa Khimi's up Coming Designer, JM International, Faith, Thalia Bridal, Kipenzy Designs, na wabunifu kutoka Afrika Kusini kama Palesa yatafanyika. Usiku huo pia utashuhudia utoaji wa Tuzo za Mbunifu Bora wa Mwaka na Mwanamitindo Bora wa Kiume/Kike.

Jumapili, Desemba 7, itakuwa usiku wa kilele, ambapo Zashia Maglig's Lifetime Achievement Award itatolewa. Jukwaa litapambwa na maonyesho kutoka Robes by Michelle, Zubik by Wambui (Kenya), Asili by Naliaka, Dida (Italy), Neth Designs (Moshi), na wabunifu wengine wa kimataifa na wa nyumbani, sambamba na utoaji wa Tuzo za Heshima za Ubunifu kama vile Fashion Photographer of the Year na Stylist of the Year.

Expo: Jukwaa la Uchumi wa Ubunifu

Sambamba na wiki ya mitindo, Tanzania Creative Economy Expo 2025 inakuja na kaulimbiu isemayo: “If Your Brand Is a Vibe — Bring It.” Expo hii inatoa fursa ya kipekee kwa bidhaa za Kitanzania kujitangaza na kuuza.

Waandaaji wanasisitiza kuwa hii ni fursa ya kupata mauzo na kipato kwa kukutana na wateja wanaopenda bidhaa za Kitanzania. Vilevile, inatoa mwonekano mkubwa kwa vyombo vya habari, influencers, wapiga picha, na waweka mitindo, pamoja na fursa za mitandao ya kibiashara na wanunuzi wa kimataifa, hoteli, wadau wa utalii, na washirika wa biashara. Pia, mazingira yaliyopangwa ni Content Goldmine—yani fursa ya kutosha ya kutengeneza maudhui ya kupromoti chapa (brand) kwenye mitandao ya kijamii. Kwa kushiriki, washiriki wanajipanga kama sehemu ya harakati ya kuendeleza bidhaa zilizotengenezwa Tanzania (Made-in-Tanzania), wakitumia nguvu ya Swahili Fashion Week Effect kufikia hadhira kubwa na ya ubora.

Expo inawaalika wabunifu, watengenezaji, wauzaji wa bidhaa za urembo, wasanii wa mapambo, wataalamu wa kidijitali, waandaaji wa chakula, biashara za utalii, na wajasiriamali wa masuala ya maisha, wenye ari na ubunifu wa kuonyesha bidhaa zao.

Jinsi ya Kupata Tiketi na Kushiriki

Tiketi za kuhudhuria Swahili Fashion Week na kutembelea Creative Marketplace zinapatikana mtandaoni kupitia www.swahilifashionweek.com au zinaweza kuagizwa kupitia PIKI APP na Nilipe APP. Tiketi za kimwili zinapatikana katika Orchid Cafe, Masaki.

Kwa wale wanaotaka kushiriki na kuonyesha bidhaa zao kwenye Expo, wanaombwa kujaza fomu kupitia kiungo husika. Kwa maelezo zaidi kuhusu matukio yote, watu wanaweza kupiga simu kwa namba +255 795 99 66 89. Dar es Salaam inakaribisha kila mtu kushuhudia muunganiko huu wa mitindo, ubunifu, na biashara Desemba hii.