Lowassa aipeleka Dira ya Mtanzania kamati ya maadili MCT

Akiapa kabla ya kuanza kwa kikao WAZIRI Mkuu aliyejiuzulu Edward Lowassa amesema habari zilizoandikwa na gazeti la Dira ya Mtanzania...

Akiapa kabla ya kuanza kwa kikao

WAZIRI Mkuu aliyejiuzulu Edward Lowassa amesema habari zilizoandikwa na gazeti la Dira ya Mtanzania katika siku za karibuni, zililenga kumchonganisha na Rais Jakaya Kikwete pamoja na Chama Cha Mapinduzi.

Lowassa aliyasema hayo Dar es Salaam jana mbele ya Kamati ya Maadili ya Baraza la Habari Tanzania (MCT) wakati wa kusikiliza shauri lake dhidi ya habari zilizokuwa zikiandikwa na gazeti hilo.

Katika malalamiko yake, Lowassa alisema Oktoba 24, mwaka jana, gazeti hilo liliandika habari katika ukurasa wake wa mbele zikidai kuwa alikuwa ana nakala zenye ushahidi wa Rais Kikwete kuhusika na katika kusaini mkataba wa Kampuni ya Richmond.

Pia alisema Oktoba 6, mwaka jana, gazeti hilo liliandika taarifa iliyomhusisha yeye na aliyekuwa Waziri wa Miundombinu, Andrew Chenge kuwa wamezunguka nchi nzima kuendesha kampeni ya kumchafua na kumng’oa Kikwete pamoja na kutaka kumchafua katika mkutano wa Halmashauri Kuu ya Taifa ya CCM.

Lowassa aliiambia Kamati hiyo kwamba gazeti hilo halikuwahi kumhoji kuhusu tuhuma hizo na badala yake liliendelea kuandika taarifa za upande mmoja za kumchafua, mbali ya kuwa aliwahi kuliomba kuacha kufanya hivyo.

Alisema gazeti hilo liliendelea kutumia lugha chafu kwa kumuita majina ambayo yalimfedhehesha na aliongeza kuwa katika habari hizo hawakuweza kuwa na taarifa za kiufafanuzi zaidi.

“Mheshimiwa Mwenyekiti mimi ninashangaa kuona kuwa eti waliendelea kuandika taarifa ambazo hata nilipowapigia simu na kuwasihi waache, waliendelea kufanya hivyo. Iweje uandike kuwa ninazunguka nchi nzima kumchafua Rais huku wakishindwa basi kutaja hata mkoa mmoja kati ya hiyo wanayodai nilienda,” alihoji Lowassa.

Alisema kitendo cha kuhusishwa na tuhuma za kutaka kumg’oa Rais madarakani ni mbaya kwa kuwa zinamfananisha na mhaini na zinaweza kuhatarisha maisha ya watu. Alipendekeza kwa kamati hiyo kuchukua hatua kali za kinidhamu ili iwe fundisho kwa magazeti yasiyofuata maadili ya taaluma ya habari.

Akisoma hukumu ya Kamati yake, Jaji mstaafu Thomas Mihayo alisema gazeti hilo linatakiwa kulipia gharama zote za kisheria ambazo Lowassa amezitumia katika kushughulikia kesi hiyo; kukutana na kamati hiyo kuandika msamaha kwa pamoja utakaochapishwa katika kurasa wa mbele wa gazeti hilo.

Dakika tano kabla ya kuanza kusikilizwa kwa shauri hilo, Kamati hiyo ilipewa ujumbe kwa njia ya karatasi ndogo ambayo ilikuwa ikieleza udhuru wa gazeti hilo kushiriki kikao hicho; jambo ambalo Jaji Mihayo alisema kiliashiria kuwa gazeti hilo halina hoja ya kujitetea katika kamati hiyo.

Source.Evance Ng'ingo wa Habarileo