JK atoa siku 14 kupewa taarifa za nini kimefanywa kwa watoro wa shule

RAIS Jakaya Kikwete ametoa siku 14 kwa uongozi wa mkoa wa Tanga kumpatia taarifa zenye takwimu halisi kuhusu maendeleo ya wanafunzi kwe...

RAIS Jakaya Kikwete ametoa siku 14 kwa uongozi wa mkoa wa Tanga kumpatia taarifa zenye takwimu halisi kuhusu maendeleo ya wanafunzi kwenye shule zote za msingi na sekondari mkoani humo na hatua zilizochukuliwa dhidi ya wanafunzi walioacha shule kutokana na sababu mbalimbali.

Amewataka wakuu wa wilaya na wakurugenzi watendaji wa halmashauri zote 11 zinazounda mkoa huo kila mmoja kurudi na kutazama takwimu za eneo lake na kuanisha mikakati endelevu itakayomaliza tatizo hilo la utoro linaloongezeka kwa kasi.

Ametoa agizo hilo mwishoni mwa wiki kwenye mkutano wa majumuisho ya ziara yake ya kukagua miradi mbalimbali ya maendeleo mkoani Tanga.

Amesema haridhishwi kabisa na taarifa ya sekta ya elimu mkoani humo ambayo inaonesha kwamba kuna idadi kubwa ya wanafunzi hasa wa kike wanaondikishwa darasa la kwanza na kidato cha kwanza ambao hawamalizi masomo yao mpaka mwisho kama ilivyokusudiwa huku viongozi kwa muda mrefu wakishindwa kuchukua hatua stahiki za kukomesha hali hiyo.

“Nimeona nilizungumzie hili tatizo la wanafunzi kutomaliza shule ambalo lipo kwenye halmashauri zote za hapa mkoani Tanga…kwa mfano wilayani Kilindi niliambiwa kwamba waliokuwa wamesajiliwa kidato cha kwanza mwaka 2010 walikuwa 2,359 kati yao waliofanya mtihani wa kumaliza kidato cha nne mwaka 2013 walikuwa 1,080 ...hii inaonesha kwamba wanafunzi 1,279 hawakufika na haikuelezwa jitihada gani zimefanyika ili kuondoa hilo tatizo la utoro ”.

Aidha, aliongeza “Wilayani Mkinga nako mambo sio shwari kwani katika kipindi hicho hicho waliandikishwa 2,631 kidato cha kwanza baadae mtihani wa kumaliza walifanya 1,483 ambapo wanafunzi 1,443 hawakufika…na katika shule za msingi hali iko hivyo hivyo na nashangaa kuona kwamba tatizo hili huwezi kulikuta Kilimanjaro au Tukuyu lakini mambo haya yanaendelezwa huku kwetu tu ambako tunadhani elimu sio kitu cha maana…kwa kweli hii sio sawa kabisa nataka viongozi mchukue hatua haraka”.

Rais amesema athari za kutoshughulikiwa ipasavyo na kwa wakati tatizo hilo ili liweze kukomeshwa ni kuendelea kuweka msingi mbovu wa elimu kwa wanajamii waliopo katika eneo husika.

“Kama watoto hawa tutaendelea kuwaacha bila kupata elimu hivi mnatarajia tutawarithisha nini hasa ikizingatiwa kwamba bado tuko nyuma ki maendeleo?...Baada ya kutoka hapa nataka viongozi mnipe taarifa kwamba wilaya mmejadili maendelo ya elimu ya watoto …mkabaini wangapi wapo…wangapi hawapo shuleni …hao wasiokuwepo nataka mkawatafute”, alisema.

Aidha, aliongeza, “Mie nna nyie, mpaka kieleweke …nawapa wiki mbili kuanzia leo tunapoachana hapa kila halmashauri iniletee taarifa kupitia mkuu wenu wa mkoa kwamba imekaa na kujadili taarifa ya elimu ya shule kwa shule kubaini ni akina nani hawapo, kwa sababu gani na mikakati ya kuondoa tatizo …unajua tukiendelea kuzembea tutakuwa tunajiwekea msingi mbovu wa kuendeleza hizo wilaya katika siku chache zijazo”, alisema.