Filamu ya Gauni la Harusi

GAUNI LA HARUSI: Kiukweli unapoumizwa kimapenzi,                      lazima kizunguzungu chake kikukumbe KUNA wakati una...

GAUNI LA HARUSI: Kiukweli unapoumizwa kimapenzi,

                     lazima kizunguzungu chake kikukumbe

KUNA wakati unapotaka kuwa mkweli unakuwa na shida na unapolazimika kutumia njia nyingine kuwasilisha mambo yako ambayo unadhani kwamba lazima mwenzako ajue unazama zaidi na kuharibu mambo.

Hayo ndiyo yaliyotukia katika sinema hii ambayo kimsingi inataka kuwashawishi watu kuwa waangalifu katika maelezo na maamuzi yao.

Pamoja na nusu ya sinema kuonesha uchizi unaomkuta mtu baada ya maamuzi mabaya dhidi yake katika mapenzi, waigizaji waliweza kuchukua nafasi ya kutenda vyema japo uchukuaji picha unaweza kuwa na walakini.

Naam, ni filamu ambayo inaanza na dhiki kubwa na kumalizwa na dhiki hiyo hiyo kama vile mhusika wake amepigwa laana.

Katika sinema hii kijana Dick anatimuliwa katika kazi yake kiwanda cha matofali kwa dai la kuwa yeye ni mwizi japokuwa alisaidia kuimarika kwa kiwanda hicho tangu awali. Kosa lake kubwa unaweza kusema ni kuwawezesha jamaa zake kuajiriwa hapo na hao hao wakamtengenezea fitna iliyomtoa kazini.

Baada ya kutoka kazini akabaki nyumbani hoi kiakili, atafanya nini wakati maisha ni mabaya akiwa na mdogo anayemtegemea achange karata ili aweze kuendelea na shule? Baba naye uwezo hana.

Rafiki yake Emma anamtuliza kwamba yeye ni mwanaume na anaweza kupata kazi.Anaenda kwa rafiki yake wa kike pia anamliwaza. Kijana anaendelea kutafuta kazi lakini ndiyo hivyo tena!

Akiwa bado hana kazi, rafiki yake wa kike anamwambia anahitaji gauni la harusi kwa ajili ya harusi ya mdogo wake. Jamaa anasema hawezi, lakini anashawishika na anakubalika na jamaa anahaha mitaani kutafuta fedha za gauni la harusi ili mpenziwe akamsimamie vyema mdogo wake.

Siku ya harusi mchiriku unapigwa, tahamaki anayeolewa ni mchuchu wake jamaa anaanguka na kuzimia. Anapoamka akili imepata taharuki haamini akaishia kuwa nusu mwehu nusu mwenye akili.

Anakuwa mvuta bangi, anajidunga anapora, system nzima inakuwa imevurugika na  mwishoni mwa siku anakuwa mtu anayehitaji msaada zaidi.

Baba anchanganyikiwa, mdogo mtu anachanganyikiwa na habari zinapomfikia mhusika na tibutibu hilo anajikuta akiwaza afanye nini. Anakuja kubaini kwamba ameharibu, amelikoroga na hawezi kulinywa baada ya juhudi ya kutaka kulinywa kikombe kupasuliwa na baba yake Dick aliyewatoa baruti yeye na rafiki yake kwa panga.

Kule alikoenda kuolewa mwali Yule, mambo hayakuwa mambo, jamaa alikuwa kipanga na alikuwa ana wapanga wanawake kama vile mashati katika maduka.

Mume hakuwa mume, alikuwa kumbe analipiza kisasi kwa wanawake kwa kujikuta anaukimwi.  Binti alipogundua kwamba kumbe naye kaachwa na ukimwi anahaha lakini mwishoni mwa siku anarejea nyumbani anaandika barua kwa mpenzi wake wa zamani, teja na kumtaka radhi kwa kuvuruga penzi halisi.

Anamwachia nyumba na kila kitu ambacho alitakiwa kukimiliki baada ya mume yule kuondoka kwenda kuendeleza libeneke lake kwingine huku akimwachia hati ya nyumba na kila kitu.

Kabla hajaondoka jamaa alimwambia alifanya hivyo na ataendelea kufanya hivyo kwa kila mwanamke atakayejipendekeza kutaka hela kwake kama sehemu ya maisha yake yaliyobaki.

Sinema hii inamalizika bila kuonesha suluhu ya dhiki, ni kwa teja Yule kusema neno la mshangao.

Je ujumbe  umefika? Ujumbe gani? Ujumbe wa moyo ukipasuka unakuwa na matatizo? Yes kwani wa kuutibu ni Yule Yule aliyeupasua. La msingi ni kuwa maamuzi yetu yasiwe na pupa na lazima tuone nini kitatokea baada ya maamuzi na kuona kama matokeo hayo ndiyo tunayotaka.

Kwa maana mdada kwenye sinema hii alitaka kununuliwa gauni iwe mwisho wa mapenzi yake na Dick lakini kumbe ndio akaja kugundua kwamba Dick alimuona yeye ni kila kitu na alipovuruga nay eye akavurugika.

Maleba na muonekana wa Dick kwa sinema nzima ni wa kichizi zaidi kuliko teja, mateja wengi ni nadhifu au kwa kuwa Dick alishaanza maisha kwa dhiki? Mtengeneza sinema ndiye mwenye majibu mimi nimefanya kuandika tu kuhusu hadithi hii.

Washiriki ni Rakheem David 'Kuch Kuch(aliyekuwa anasambaza miwaya) Salma Goha ,Sadik Senya  pamoja na Mohamed Fungafunga.

mwisho