SHEHE PONDA ACHOMOA SHTAKA MOJA ABAKIZA MAWILI

Sheikh akizungumza na wakili wake KATIBU wa Jumuiya na Taasisi za Kiislamu   Tanzania Sheikh Ponda Issa Ponda ameamriwa na Mahakama ...

Sheikh akizungumza na wakili wake

KATIBU wa Jumuiya na Taasisi za Kiislamu  Tanzania Sheikh Ponda Issa Ponda ameamriwa na Mahakama  ya Hakimu Mkazi Mkoa wa Morogoro kujitetea katika  mashtaka mawili kati ya matatu yanayomkabili katika kesi yake.

Uamuzi huo umetolewa na Hakimu Mwandamizi wa Mahakama  hiyo, Mary Moyo ,leo , wakati akisoma  uamuzi mdogo wa kesi yake  iwapo atakuwa na  kesi ya kujibu ama laa.

Kwa mujibu wa Hakimu huyo, kuwa mshtakiwa ana kesi ya kujibu katika mashitaka mawili  la pili na la tatu , ambapo umemwona hana kesi ya  kujibu katika shitaka la kwanza .

Alisema  shitaka la kwanza  lilishatolewa maamuzi na Mahakama kuu kanda ya Dar es Salaam na kwamba maamuzi yanayotolewa na Mahakama za juu  hayawezi kupingwa na mahakama zilizopo  chini yake.

Hata hivyo alisema mashtaka mawili yaliyobaki  shtaka la pili na la tatu ,Mahakama imeridhika na ushaidi na kumwona  mshtakiwa ana kesi ya kujibu.

Hakimu Moyo aliiahirisha  kesi hiyo hadi Agosti 7, mwaka huu ambapo upande wa utetezi utaanza kuwasilisha mashahidi wake Mahakama hapo.

Sheikh Ponda alifunguliwa kesi namba 128/2013 katika Mahakama ya hakimu Mkazi mkoa wa Morogoro akikabiliwa na mashtaka matatu ambayo anadaiwa kuyatenda Agosti 10, mwaka 2013 katika eneo la Kiwanja cha ndege Manispaa ya Morogoro na alifikishwa mahakamani hapo kwa mara ya kwanza Agosti 19 mwaka 2013.

 Wakili Kiongozi wa Serikali Bernard Kongola kwenye   hati ya mashitaka,  shitaka  la kwanza linalimkabili Shekhe Ponda ni uvunjifu wa  sheria ya nchi kifungu cha 124 cha adhabu  alilolifanya mmano Agosti 10, 2013  eneo la Kiwanja cha Ndege , Manispaa ya Morogoro kwa kutoa  kauli za uchochezi  dhidi ya jamii na  kukiuka  amri halali ya Mahakama.

Alinukuliwa akitoa maneno  ya uchochezi   katika mkutano wa hadhara eneo  hilo, kuwa Shehe Ponda  Issa Ponda alitamka kauli ya   “  Ndugu Waislamu Msikubali uundwaji wa kamati za ulindi na usalama za misikiti , kwani kamati hizo zimeundwa na Bakwata ambao ni vibaraka wa CCM na Serikali  na

kama watajitokeza kwenu watu hao na kujitambulisha kwamba wao ni kamati za

ulinzi na usalama za msikiti, fungeni milango na madirisha ya msikiti yenu

na muwapige sana “ .

K auli hiyo inadaiwa  kwenda kinyume na amri ya Mahakama ya Hakimu Mkazi ya Kisutu, Jijini Dar es Salaam, iliyotolewa Mahakamani hapo na Halimu  V. Nongwa  , Mei 9 mwaka 2013 ambayo ilimtaka ndani ya mwaka mmoja  asifanye jambo lolote la uvunjifu wa amani .

Shitaka la pili, linalomkabili Sheikh Ponda , ni uvunjifu  wa sheria kifungu  cha 129 cha makosa ya jinai kuwa mnamo  siku hiyo, alitoa maneno ya uchochezi yaliyohatarisha  kuathiri imani za watu wengine .

Kwa mujibu wa hati ya shitaka hilo, linamnukuu kauli ya Ponda kuwa “ Serikali ilipeleka jeshi Mtwara kushughulikia suala la vurugu iliyotokana na gesi kwa kuwaua , kuwabaka na kuwatesa wananchi kwa sababu asilimia 90 ya wakaazi wake ni waislamu , lakini Serikali haikufanya hivyo kwa wananchi

wa Loliondo walipokataa mwarabu asipewe kipande cha ardhi ya uwindaji baada ya kudai ni mali yao kwa sababu asilimia 90 ya wakaazi wake ni wakristu” alinukuu.

Katika shitaka la tatu, anadaiwa kutenda kosa kinyume na sheria  kifungu cha 390 na 35 kwa kuchochea maneno dhidi ya wananchi wakati wa Kongamano hilo lililofanyika Agosti 10, mwaka 2013 katika uwanja wa Shule ya Msingi Kiwanja cha Ndege , mjini hapa.

Source:John nditi Morogoro