Dunia ya Zuchu na ukweli wa maisha yake

  Na Mwandishi Wetu   MSANII wa kike bora kabisa Afrika Mashariki, Zuhura Othman Soud, akifahamika zaidi kwa jina lake la kisanii la Zuchu...

 

Na Mwandishi Wetu

 MSANII wa kike bora kabisa Afrika Mashariki, Zuhura Othman Soud, akifahamika zaidi kwa jina lake la kisanii la Zuchu amefunguka kuhusu maisha yake ya muziki, binafsi na kusema mafanikio yake ya sasa katika muziki hayatokani na kubebwa bali juhudi binafsi na uvumilivu mkubwa alionao katika shughuli za sanaa.

 Msanii huyo ambaye anapiga muziki wake katika miondoko ya Bongo fleva na Afropop ameachia ngoma nyingine ya mapenzi katika mahadhi ya Pop, Number One majuzi ingawa bado anakimbiza na Sukari, amesema yeye hahitaji ushindani kwani presha inayotokana na muziki wake inatosha. Kufikia jana mchana katika mtandao wa kawaida wa You Tube, Sukari iliyoachiwa humo Januari 20,2021 ilikuwa na  watu  15,729,603 huku Number One iliyoachiwa Machi 5,2021  ilikuwa na watu 66,219.

 "Kushindana  kunaleta faida gani... mimi najenga carrier yangu.. kuachia sukari kunanipa presha.." alisema akimaanisha  kazi hiyo bora inamfanya kufikiria kazi nyingine bora zaidi ili kukonga nyoyo za mashabiki wake.

 Zuchu aliyeanza kutumia lebo ya WCB Wasafi Records mwaka 2020  chini ya uongozi wa Diamond Platnumz anasema yeye haoni faida ya kupambanishwa kwani hapati chochote kile kwa kupambanishwa na wala hafanya ushindani na msanii yoyote yule, akitolea mfano wa Beyonce na Robyn Rihanna na kusema Beyonce mpaka leo bado anawika kwani hakufanya ushindani bali alijenga  kazi zake.

 Alipoulizwa kuhusu kujiunga na Lebo ya WCB alisema kwamba anamshukuru Mungu kwa kumwezesha kufanya uchaguzi sahihi wa lebo ambayo inamtoa. Aidha aliongeza kuwa uvumilivu kabla hajatoka umempa nguvu kubwa ya kutambua umuhimu wa uchapakazi.

 Akizungumzia uhusiano wake na Diamond alisema kwamba yeye ni bosi wake wala hana uhusiano wa mapenzi kama watu wanavyofikiri na wala hajawahi kumfiria kimapenzi Dimond kwani ni bosi wake. Aliongeza kwamba kuna mipaka hata ya mzungumzo ingawa mara kadhaa Bosi wake huyo alikuwa anatania mbele ya wenzake kwamba , eti watu wanasema yeye ni mzigo wake.

 Aidha Zuchu ambaye alianza kazi ya sanaa mazima baada ya kumaliza diploma ya juu ya CEBA nchini India alisema kwa sasa ana mahusiano mazuri tu na baba yake mzee  Othman Soud na kusema askari huyo wa zamani (baba yake) wanazungumza vyema japo wakati walipoachana na mama yake hapo katikati  alikuwa kimya sana.

 Alimwambia mtangazaji maarufu wa kipindi cha Refresh cha WCB, Aliyaah kuna wakati alimwandikia barua yake huyo ya kuhoji kwanini hamtembelei au sio baba yake mzazi kitu kilichomfanya  mzee huyo kufika nyumbani kumuona na kumwachia Sh 20,000 za sikukuu ya Idd akiwa mdogo.

 Zuchu anasema katika mahojiano inaonekana  wakati mama na baba yake walipoachana ni kama vile baba yake naye alimwacha lakini alikuwa anaendeleza mawasiliano na mwaka jana, mama yalke alipomwambia kwamba baba yake anaumwa walienda kumtazama na walipokutana baada ya kitambo kirefu baba na mtoto walilia sana yeye alimshukuru Mungu kwa kuwakutanisha tena kama familia.

 Zuchu aliyezaliwa Novemba 22 mwaka 1993  visiwani Zanzibar na aliyewahi kutunukiwa tuzo ya silver play button na mtandao wa kijamii wa Youtube kwa kuwa msanii wa kwanza wa kike Afrika mashariki kwa kufikisha wafuasi zaidi ya 100,000 ndani ya wiki moja na pia tuzo ya msanii bora chipukizi wa mwaka 2020 na All Africa Music Awards (AFRIMMA) anasema kwamba si rahisi kufanyakazi na Diamond Platnumz na kolabo zake mbili za cheche na Litawachoma na naye hazikupatikana kirahisi bali ni kwa jasho kubwa.

 Zuchu pia amefanya mefanya kolabo na  Khadija Kopa  wimbo wa Mauzauza na Nobody na Joe Boy.

 Alisema Diamond alimpa fimbo ya kuchapia kwa kumwambia kwamba aimbe muziki anaouimba sasa kwani waimbaji ni wengi duniani lakini aina ya uimbaji wake (taarabu) ni wa kwake mwenyewe.

 Zuchu aliyezaliwa kwenye familia ya wanamuziki, mama mwimbaji wa taarabu anayefahamika kwa jina la Khadija Kopa na baba Othman anasema katika udogo wake alilazimika kujitafutia marafiki mwenyewe kwani umaarufu wa wazazi wake ulikuwa unatafsiriwa vibaya na kumletea shida katika katika ukuaji wa kawaida.

 Jambo ambalo mpaka leo hana raha nalo ni kifo cha nduguye Omar ambaye alisema kwamba alikuwa ndiye mlezi wake kwani mara nyhingi hakuwa karibu  na wazazi wake waliokuwa na shughuli nyingi. Kutokana na hali hiyo huwa hasikilizi nyimbo zake wala hajawahi kwenda kwenye kaburi.

 "Nikimkuta mtu anasikiliza nyimbo zake, huwa namwambia azime akikataa naondoka " anasema huwa anaumia sana japo jambo hilo limetokea akiwa mdogo na alipewa tarifa baada ya kumaliza mitihani yake.

 Zuchu aliachia albamu ya kwanza iliyotambulika kama “ I am Zuchu “ mwaka 2020 ikiwa na nyimbo 7 ukiwamo wa hakuna kulala. Albamu yake hiyo ndiyo iliyosikilizwa na watu wengi zaidi nchini Tanzania kwa mwaka 2020 na video za nyimbo zake zimetazamwa na mamilioni ya watu duniani.