.Wanasababisha mchakato wa mageuzi katika biashara Na Mwandishi Wetu MAMLAKA ya Maendeleo ya Biashara Tanzania (TanTrade) ilianzishwa kw...
.Wanasababisha mchakato wa mageuzi katika biashara
Na Mwandishi Wetu
MAMLAKA ya Maendeleo ya Biashara Tanzania (TanTrade) ilianzishwa kwa Sheria ya Mamlaka ya Maendeleo ya Biashara Tanzania namba 4 ya mwaka 2009 iliyofuta Sheria ya Bodi ya Biashara ya Nje namba 5 ya mwaka 1978 na Sheria ya Bodi ya Biashara ya Ndani namba 15 ya mwaka 1973 ni zaidi ya kufanya maonesho ya kimataifa ya biashara kama watu walivyozoea ya sabasaba.
Ikiwa kama mamlaka ina kazi kubwa ya kudhibiti shughuli zinazohusiana na biashara ya ndani na nje ambayo hapo awali ilifanywa na Bodi ya Biashara ya Nje na Bodi ya Biashara ya Ndani.
Mkurugenzi Mkuu wa TanTrade, Latifa Khamis akizungumza na wahariri wa vyombo vya habari nchini hivi karibuni ikiwa ni mwendelezo wa vikao vinavyoratibiwa na Ofisi ya Msajili wa Hazina vya taasisi za umma na makampuni ambayo serikali yanahisa kujieleza kwa umma anasema kazi kubwa ya mamlaka hiyo ni kutafuta masoko na uwekezaji.
Maelezo ya Mkurugenzi Mkuu Latifa ambayo alitoa katika mada yake na kufafanua zaidi katika maswali na majibu yana akisi kitu ambacho watanzania wengi hawakijui kuwa sheria ya kuanzisha TanTrade pamoja na kuwa hatua kubwa katika kuimarisha mchakato wa mageuzi ya biashara nchini Tanzania, kazi yake ni kuendeleza biashara za ndani na nje na kudhibiti maonesho ya biashara ya yanayofanyika Tanzania yakiwemo ya kimataifa.
Lengo la msingi kuwapo kwa mamlaka hiyo ni kukabiliana na vikwazo vinavyowakabili wafanyabiashara, wauzaji bidhaa nje na wazalishaji wa bidhaa na huduma kwa nia ya kuongeza utendaji wa sekta ya biashara katika uchumi na hapa kuna kitu kinaitwa branding ambacho kinatengenezewa pamoja mambo mengine mkakati.
Ukiangalia maelezo ya Mkurugrenzi Mkuu Latifa kwa ujumla wake moja ya jukumu kubwa na muhimu la Mamlaka ya Maendeleo ya Biashara Tanzania (TANTRADE) ni kusaidia uwekaji wa mazingira rafiki kwa bidhaa na huduma zinazozalishwa nchini ili kuyafikia masoko ya ndani, kikanda na kimataifa.
Lakini pia wana jukumu jingine la kutambua na kushauri mbinu bora za kutatua changamoto zinazokwamisha maendeleo ya biashara katika mnyororo wa thamani na kutoa ushauri na mafunzo kwa Jumuiya ya Wafanyabiashara juu ya namna bora ya kusimamia shughuli za biashara ya ndani na za nje .
Pia ina jukumu la kujenga na kukuza utamaduni wa kuuza bidhaa nje kwa wafanyabiashara wadogo, wa kati na wakubwa kwa njia mbalimbali.
Ukitazama majukumu hayo unatambua kwamba shughuli ya Tantrade ambayo pia kwa miaka mitano wamefanikiwa kuratibu matukio mbalimbali ikiwemo programu za utafiti, makongamano na misafara ya kibiashara, maonesho na mikutano ya kuunganisha wazalishaji na wanunuzi ambayo yameongeza makusanyo katika mfuko wa Hazina kwa asilimia 20.15 kwa kipindi cha miaka mitano, ni kusukuma na kuhakikisha uendelevu wa biashara ya Tanzania katika soko la dunia.
Akizungumzia ufanisi unaowezesha na wao kusonga mbele Latifa anasema:“Katika kipindi cha miaka mitano TanTrade ilipanga kukusanya jumla ya shilingi 52,562,298,340 na imefanikiwa kukusanya shilingi 40,004,650,548 sawa na asilimia 76.
"Ni kutoka vyanzo mbalimbali ikiwa ni pamoja na ruzuku kutoka Serikali Kuu kwa ajili ya mishahara na miradi ya maendeleo na vyanzo vya mapato ya ndani ikiwemo ada inayotozwa kwenye uratibu na usimamizi wa maonesho, upangaji wakati usio wa maonesho pamoja na ushiriki na viingilio vya Maonesho ya DITF.”
Anasema kuwa, maonesho ya Biashara ya Kimataifa ya Sabasaba ambayo yamekuwa yakifanyika kila mwaka yamezidi kuongeza thamani yake kwa kipindi cha miaka mitano kutokana namna yanavyofanya kuwaweka karibu wafanyabiashara wa ndani na nje katika hali ya kutafuta masoko ya uhakika ya bidhaa.
Mkurugenzi huyo anasema,kampuni za ndani na nje, washiriki, idadi ya nchi zilizoshiriki maonesho hayo, watembelea maonesho pamoja na ajira zilizozalishwa vimeongezeka na hivyo yamezidi kuongeza wigo wa biashara za ndani na nje ya nchi.
Kwa kuzingatia uanzishwaji wake mamlaka hii kwa kutumia wataalamu wake wa ndani wamefanya mambo makubwa ya kuweka thamani katika mnyororo wa bidhaa ambazo Tanzania ina fursa nazo sana nchi za nje baada ya kufanya utafiti na kuridhika na mwenendo wake.
“TanTrade imekamilisha maombi ya ufadhili ya kuendeleza rajamu (branding) ya Taifa ya Viungo (Tanzania Spice Label) kwa kushirikiana na Kituo cha Biashara cha Kimataifa (ITC) pamoja na wadau wa sekta ya viungo.
"Hadi Agosti, 2023 TanTrade imekamilisha rajamu ya iliki, tangawizi, mdalasini, pilipili manga na karafuu vilevile, mamlaka inaendelea na taratibu za kukamilisha rajamu za bidhaa nyingine ikiwemo asali, korosho, kahawa na chai pamoja na mafunzo kwa wafanyabiashara 6,979 kupitia programu 26 ili kuimarisha uwezo wa kujiendesha kiushindani.” anasema Latifa akidhihirisha kwamba Mamlaka anayoongoza ni zaidi ya kuonekana ikiratibu maonesho ya Sabasaba katika viwanja vya Mwalimu Nyerere, Barabaa ya Kilwa.
Latifa anasema, mamlaka hiyo imeendelea kusaka masoko nje ya nchi ya bidhaa mbalimbali zinazolishwa nchini ikiwemo mazao ya biashara na madini ili kuongeza wigo wa uzalishwaji na kuongeza thamani ya mnyororo kwa wazalishaji.
Kutokana na mazingira yake chini ya usimamizi madhuubuti wa Latifa,TanTrade imefanya uchambuzi wa takwimu katika mfumo wa ITC kutambua bidhaa zinazohitajika kwenye masoko mbalimbali duniani.Nchi ambazo zinaonekana kuhitaji bidhaa za kilimo na madini kutoka Tanzania ni pamoja na India, Umoja wa Falme za Kiarabu, Uswisi, Vietnam, China, Pakistani, Japani, Marekani, Oman, Qatar, Kuwait na Saudi Arabia.
Watanzania wa kawaida kwa sasa wanapaswa kutambua kwamba Mamlaka hii ipo kwa ajili ya kuendeleza masoko ya bidhaa zao iwe kwa wajasirimali wadogo, wakati na wakubwa kinachostahili ni kupenya katika soko na kuwa na ushirikiano ili kuwa na soko endelevu la bidhaa ambazo zinafanikiwa kuuzwa nje.
Latifa anasema kwamba Tantrade wanajukumu kubwa la kukuza na kuendeleza biashara ya ndani na nje ya nchi ili kukuza uchumi wa Tanzania kuupaisha na kuifanya kuwa endelevukwa kuhakikisha Tanzania inakuwa kitovu cha bidhaa mbalimbali zinazotokana na mnyororo wa kilimo, ufugaji, madini na viungo.
"Sisi hatutangazi fursa kama haina vigezo, mara nyingi fursa tunazozitangaza sisi zina vigezo tofauti na matangazo ya taasisi nyingine mtaona wengine wanatangaza fursa ya soko la nazi tu kamaliza, lakini TanTrade inakuwa na maelezo ya kitaalamu."
"Na kama halina maelezo ya kitaalamu hatuwezi kutangaza mpaka tumefanya hivyo kujiridhisha kabisa kikamilifu.
Kwa kuzingatia kanuni zake za undeshaji ni dhahiri kuwa TanTrade inaihitaji ushirikiano ili kuweza kusaidia kukuza sekta ya biashara, lengo likiwa ni kuifanya sekta ya biashara na uwekezaji iwe na tija .
haya yanafanyika huku bidhaa za Tanzania nje ya nchi badi zikikabiliwa na changamoto ndogo ndogo hasa kutokuwa na uendelevu wa oda kwani wengi wengi wakuipeleka mara mbili, tatu anakimbia.
"Shida mtu hana uwezo ni peke yake anakuwa mchoyo, badala ashirikishe na wengine hawezi lazima tushirikiane kuimarisha biashara kupitia taaluma yenu.
"Mbali na hilo, biashara yetu huko nje imekabiliwa na utapeli, kuna baadhi ya watu wanapeleka bidhaa zinakuwa hazina ubora sana mfano zina mawe.
"Lakini, kama mamlaka tumekuwa tunakaa nao lengo letu ni ku-protect image ya nchi yetu iwe nzuri ili bidhaa zetu ziweze kuuzika na kuthaminika.
Tantrade ikiwa kwa mwaka wa fedha 2023/2024 imejipanga kufanya mambo mbalimbali ikiwemo; kuendelea kuratibu shughuli za utafutaji masoko na ukuzaji biashara ili kuunganisha wazalishaji, kuendelea na taratibu za uanzishwaji wa Dawati la Waambata wa Kibiashara kwenye Ubalozi mbalimbali wa kimkakati wa Tanzania nje ya nchi,sambamba na kuendeleza ushirikiano na Ubalozi nje ya Nchi katika kutangaza fursa za masoko ya bidhaa na mazao yanayozalishwa nchini, kuratibu ushiriki wa Tanzania kwenye Maonesho ya Expo 2025 Osaka, Japani inadhirisha kwa wananchia kwamba yenyewe ipo kikazi zaidi na si kuratibu tu maonesho ya sabasaba.
"Tuna vipaumbele kuhusu Japan kila wizara, kila sekta inaandaa kipaimbele chake, tuna kamati ambayo ni kubwa zaidi, kwani dunia yote itakuwa pamoja katika kijiji kimoja.
"Sisi katika kuji-expose lazima tuwe na mikakati ambayo mpaka sasa tumeiandaa kila wizara itatupa kipaumbele chake, muonekano wa banda la Tanzania utaonekana kwa vipaumbele na mwelekeo wa nchi.
"Anayeingia anaona nini tunakwenda Japan wenzetu wemeendelea sana, tutakuwa na bidhaa za kipaumbele, sekta miradi na project au innovation (ubunifu)."
Katika mkutano huo na waandishi wa habari pia latifa alizungumzia wanavyofuatilia mikataba ya kibiashara iliyofungwa na nchi hii.
"Kuna mikataba ya biashara ambayo tumeifunga kupitia matukio mbalimbali, hivyo TanTrade inaendelea kufuatilia mikataba ya makubaliano ya kibiashara ambayo imesainiwa katika matukio mbalimbali.
"Ambapo jumla ya mikataba 46 yenye thamani ya shilingi trilioni 17.53 ikiwemo mikubwa ya bandari imesainiwa.
"Baada ya bandari, kuna miradi mingine mkubwa itakuja. Sisi ndio kazi yetu kutafuta masoko na uwekezaji. Katika mazingira ya sasa lazima tufanye PPP (Ushirikiano wa Sekta Binafsi na Umma) kwani ni muhimu sana."
mwisho
COMMENTS