SERIKALI YATAKA 'BRAND NAME' YA KITANZANIA

Na Beda Msimbe, BSKY Media, Kibaha SERIKALI imeagiza Kituo cha Uwekezaji Tanzania – TIC kuona muhimu mkubwa wa bidhaa zinaoztengenezwa ha...

Na Beda Msimbe, BSKY Media, Kibaha SERIKALI imeagiza Kituo cha Uwekezaji Tanzania – TIC kuona muhimu mkubwa wa bidhaa zinaoztengenezwa hapa nyumbani kubeba jina la nyumbani hata kama inatengenezwa na kampuni ya kigeni. Kauli hiyo imetolewa na Katibu Mkuu Wizara ya habari, Utamaduni, Sanaa na Michezo na Msemaji mkuu wa serikali Gerson Msigwa wakati akizuru eneo la Kongani la viwanda la Tanzania na China, SINO TAN lilipo Kwala, Vigwaza halmashauri ya Kibaha mkoani Pwani. Alitoa agizo hilo wakati akikagua utengenezaji wa vilainishi katika kampuni ya Hengli Petrochemical. Kampuni hiyo inatengeneza vilainishi aina ya Lishuang. Msigwa alisema ni rahisi watanzania wakatambua bidhaa zinazotengenezwa hapa nyumbani zenye ubora mkubwa ambapo pia zikiwa na majina ya nyumbani zitaelekeza dunia mahali ambapo bidhaa hiyo inatengenezwa. " Tunapofanya kampeni ya tumia vya nyumbani na bidhaa zikiwa na Katika jina la kigeni tutawachanganya Watanzania na pia waliopo nje hawatajua kwamba bidhaa hizo zimetoka Tanzania" alisema Msigwa. Katibu mkuu huyo pia alimuuliza msimamiziwa Kongani hiyo kama kuna shida yoyote kutumia majina ya kitanzania kama Serengeti, akasema kwamba hakuna shida. Alisema kwa kutumia majina ya nyumbani watengenezaa bidhaa hao watajenga uaminifu na Urafiki, kwani wateja mara nyingi huamini zaidi bidhaa zinazotumia majina yanayofahamika na yanayohusiana na mazingira yao. wataalamu wanasema kwamba jina la nyumbani linaweza kuleta hisia za ukaribu na kuwafanya wateja wajisikie kama bidhaa hiyo imetengenezwa kwa ajili yao. Aidha katika soko la dunia lenye ushindani mkubwa, jina la nyumbani linaweza kusaidia bidhaa kujitofautisha na bidhaa zingine zinazofanana na pia kuimarisha Utambulisho wa Chapa na kusaidia kujenga chapa yenye nguvu na yenye ushawishi katika soko. Kongani ya viwanda ya SINO-TAN ni eneo la mradi wa kimkakati lililoko Kwala, Mkoa wa Pwani lenye ukubwa wa ekari 2,500. Aidha eneo hilo lenye mtaji wa mwekezaji wa dola za Marekani milioni 327 (sawa na shilingi Bilioni 882),mradi utakapokamilika, utakuwa na viwanda vikubwa na vya kati 200 na viwanda vidogo 300 vinavyohusiana na usindikaji wa vyakula,utengenezaji wa vifaa, viwanda vya dawa, vifaa vya ujenzi,usindikaji wa viatu na nguo na Viwanda vya kemikali. Akijibu swali katika mkutano na waandishi wa habari kuhusu viwanda katika eneo hilo alisema kwamba pamoja na kwamba kwa sasa wanatengeneza bidhaa za nguo kutokana na majora yanayoletwa kutoka nje, mpangfo ni kuwepo kwa kiwanda cha kusokota nyuzi ambazo zitatumika katika kutengeneza bidhaa mbalimbali ikiwamo maduveti. Katika mkutano wake na waandishi wa habari Msemaji wa Serikali Msigwa alisema kwamba kongani hilo linatarajiwa kutoa ajira za moja kwa moja 100,000 na ajira zisizo za moja kwa moja 500,000 na litajengwa kwa awamu Tano. Aidha, ujenzi wa awamu ya kwanza ulioanza Mei, 2022 upo katika hatua za mwisho; na mpaka sasa kuna viwanda 3 ambavyo tayari vinazalisha na vingine 3 vipo katika hatua za mwisho za kufunga mitambo huku viwanda vingine 4 vikitarajiwa kuanza ufungaji wa mitambo ifikapo mwisho wa mwezi Aprili 2025. Pia alisema kweamba eneo hilo litakuwa na uwezo wa kuzalisha bidhaa zenye thamani ya dola za Marekani bilioni 6 (sawa na shilingi Trilioni 16.2) kwa mwaka na Serikali itakusanya kodi na ushuru kila mwaka kwa makadirio ya shilingi trilioni 1.2. Tayari serikali imeweka mazingira wezeshi ambapo mwekezaji anayatumia kuvutia wawekezaji wengine. Baadhi ya mambo ambayo serikali imeyafanya ni pamoja na uunganishaji wa awali wa maji kupitia mamlaka zinazohusika, kwa ajili ya matumizi ya ujenzi. Pia Serikali inaendela na mpango wa kuiunganisha kongani hii na maji ya kutosha kwa ajili ya uzalishaji viwandani, Jambo jingine ni ujenzi wa barabara za zege zinazounganisha kongani hii na Barabara ya Morogoro, kuunganisha mtandao wa nyaya za Fiber Optic (Mkongo wa Taifa), na Shirika la Umeme Tanzania (TANESCO) kumalizia kazi ya kuunganisha kongani hii na umeme wa Megawati 50.