BODABODA, MACHINGA WASEMA HAPANA MAANDAMANO APRILI 24

Waendeshaji bodaboda, bajaji, na machinga jijini Dar es Salaam wamekataa wito wa Chadema wa kushiriki maandamano ya Aprili 24, 2025, kueleke...

Waendeshaji bodaboda, bajaji, na machinga jijini Dar es Salaam wamekataa wito wa Chadema wa kushiriki maandamano ya Aprili 24, 2025, kuelekea Mahakama ya Kisutu kwa ajili ya kesi ya Tundu Lissu.

Viongozi wao wamesisitiza kuwa wanapendelea kufanya kazi na kujipatia kipato badala ya kupoteza muda kwenye maandamano. 

Aidha Wamekumbushia dharau za zamani kutoka kwa baadhi ya viongozi wa Chadema dhidi ya kazi zao, na kusisitiza kuwa wao wanajihusisha na amani na maendeleo, siyo uchochezi.

Makamu Mwenyekiti wa Wajasiriamali Wadogo nchini, Steven Lusinde, ametoa tamko hilo leo Ilala Jijini Dar es salaam akisisitiza kuwa wanachama wao wameamua kutumia siku hiyo kufanya kazi na kujitafutia kipato badala ya kushiriki maandamano.

“Hatuko tayari kushiriki maandamano hayo. Siku hizi tunajitambua, hatuna muda wa kupoteza. Tunajikita katika kazi zetu ili kujipatia riziki na kuendeleza maisha yetu,” alisema Lusinde.

Aidha, alieleza kuwa kundi hilo halihusiki na vitendo vya uchochezi na badala yake linahamasisha amani. Pia alikumbusha kauli ya zamani ya kiongozi mmoja wa Chadema aliyewahi kudharau kazi ya bodaboda kwa kuitaja kuwa ni ‘kazi ya laana’, jambo ambalo limewaudhi wahusika wengi.

Naye Mwenyekiti wa Shirikisho la Maofisa Wasafirishaji nchini, Said Kagomba, alisema kuwa walipokea taarifa kupitia vyombo vya habari kuhusu wito wa Chadema kwa wananchi kujitokeza kwa wingi mahakamani siku hiyo. Hata hivyo, alibainisha kuwa wao hawatahusika na maandamano hayo, huku akiomba mamlaka husika, hasa Jeshi la Polisi, kuchukua hatua za kuhakikisha amani inatawala.

“Leo wanatuhamasisha tushiriki maandamano, lakini hawa hawa waliwahi kudharau kazi zetu—ambazo zimetuwezesha kujenga nyumba, kusomesha watoto wetu na kushiriki katika shughuli mbalimbali za maendeleo,” alisema Kagomba.

Kwa upande wake, Mwenyekiti wa Chama cha Waendesha Bajaji wenye ulemavu kutoka Kariakoo, Gosbart Kajaraba, alisema kuwa hawana mpango wa kushiriki maandamano hayo kwani wanatambua athari zake kwa amani na shughuli zao za kila siku.

“Tunaamini katika utulivu. Tunahitaji mazingira tulivu ili tuendelee kuzalisha mali na kunufaika na fursa mbalimbali zinazotolewa na serikali,” alisema Kajaraba.

Nao viongozi wa machinga katika soko la Ilala, wakiongozwa na Bakari Mkupa, walisema tayari wamewasiliana na viongozi wa masoko yote kuhakikisha hakuna atakayeshiriki maandamano hayo. Alisisitiza kuwa maeneo ya masoko hayatatumika kwa shughuli za kisiasa, bali kwa kazi ya kila siku.