VIONGOZI WA DINI WAJIBEBESHA JUKUMU LA AMANI KUELEKEA UCHAGUZI MKUU 2025

  Viongozi wa Dini wamebeba dhamana kubwa ya kuhakikisha Watanzania wanaelekea kwenye uchaguzi mkuu wakiwa salama kwa kuendelea kuhubiri ama...

 

Viongozi wa Dini wamebeba dhamana kubwa ya kuhakikisha Watanzania wanaelekea kwenye uchaguzi mkuu wakiwa salama kwa kuendelea kuhubiri amani, umoja na mshikamano, hasa katika kipindi hiki ambacho taifa linajiandaa na uchaguzi mkuu.

Katika Kongamano la Amani kwa Viongozi wa Dini kuelekea uchaguzi mkuu wa mwaka 2025-2030, viongozi wa dini kutoka Mkoa wa Dar es Salaam wamekutana kwa pamoja kujadili nafasi yao muhimu katika kulinda na kutetea amani ya nchi.

Mwenyekiti wa Kamati ya Amani ya Mkoa wa Dar es Salaam, Shehe Walid Omary, amesema kuwa amani ni tunu adhimu ambayo inapaswa kulindwa kwa nguvu zote. Ameongeza kuwa viongozi wa dini wana wajibu wa kuwa mstari wa mbele katika kuzuia dalili zozote zinazoweza kusababisha uvunjifu wa amani.

Shehe Omary amesisitiza kuwa ni wajibu wa kila kiongozi wa kiroho kuhakikisha ujumbe wanaoutoa unalenga kuleta mshikamano na kuepuka kusababisha mgawanyiko katika kipindi hiki cha kuelekea uchaguzi. Aidha, amewataka viongozi hao kuwa makini na kujiepusha kabisa na vitendo vyovyote vya rushwa.

Katibu Mkuu wa Kitaifa wa Kanisa la Methodist, ambaye pia ni Makamu Mwenyekiti wa Kamati ya Amani ya Wilaya ya Kinondoni, Askofu Allen Siso, amesema ni muhimu kwa viongozi wa dini kuendelea kusimama imara katika kuhubiri amani kama sehemu ya wajibu wao mkuu.

"Sisi viongozi wa dini tuna nafasi ya kipekee na dhamana kubwa katika dunia ya leo. Sisi ni taa ya maadili, walimu wa haki, na sauti ya matumaini kwa wale waliovunjika moyo. Kiongozi wa dini anapaswa kuwa sehemu ya suluhisho, si sehemu ya tatizo," amesema Askofu Siso kwa msisitizo.

Kwa upande wake, Mwenyekiti wa Jumuiya ya Wanawake wa Kiislamu Tanzania (JUWAKITA), Shamim Khan, amewataka wanasiasa kutumia lugha za staha na heshima katika kampeni zao na kuepuka matusi au maneno yoyote ya chuki ambayo yanaweza kuleta mfarakano.

Bi. Khan ameongeza kuwa mfumo dume unapaswa kukemewa vikali na nafasi ziweze kutolewa kwa wanawake kugombea nafasi mbalimbali za uongozi. Hii itasaidia kuongeza idadi ya wanawake katika ngazi za maamuzi.

"Lugha nzuri huleta upendo na mshikamano. Siasa zetu zinapaswa kujengwa katika misingi ya heshima. Mimi mwenyewe nimewahi kuwa Mbunge wa kuchaguliwa pekee mwanamke katika Jimbo la Morogoro Mjini na niliongoza kwa ufanisi. Ninawahamasisha wanawake wajitokeze kwa wingi kugombea," amesema Shamim Khan kwa kujiamini.

Kongamano hili limekuja wakati muafaka, likiwaalika viongozi wa dini kutumia ushawishi wao kuhakikisha uchaguzi mkuu wa Tanzania unakuwa wa amani, haki, na unaoheshimu demokrasia. Ujumbe wao wa umoja na upendo unaweza kuwa nguvu kubwa katika kuongoza taifa kuelekea mustakabali wenye utulivu na maendeleo.