Janani: The Last Stand Kufungua Pazia la ZIFF 2025

Filamu iliyoongozwa na Mathew Biashanga ya Janani: The Last Stand itafungua msimu wa 28 wa Tamasha la Kimataifa la Filamu Zanzibar (ZIFF). O...

Filamu iliyoongozwa na Mathew Biashanga ya Janani: The Last Stand itafungua msimu wa 28 wa Tamasha la Kimataifa la Filamu Zanzibar (ZIFF).

Onesho hilo litakuwa ni uzinduzi wa kidunia katika Tamasha litakalofanyika kuanzia Juni 25 hadi 29, 2025, visiwani Zanzibar.

Uwepo wa onesho hilo la uzinduzi kidunia ulizungumzwa na Mkurugenzi wa Tamasha la ZIFF, Khatibu Madudu wakati akizungumza na waandishi wa habari akitangaza filamu zilizochaguliwa kuoneshwa katika tamasha hilo

"Tunajivunia sana kuwa 'Janani: The Last Stand' imechaguliwa kufungua tamasha letu," alisema Mkurugenzi, akiongeza kuwa filamu hiyo inatoa fursa ya kipekee kwa wapenzi wa filamu kushuhudia kazi hii muhimu ya kihistoria kabla ya kuoneshwa kwingineko duniani.

"Janani: The Last Stand," iliyoachiwa nchini Uganda Desemba 7, 2024, ni filamu ya aina ya "Drama" inayoelezea maisha ya Askofu Mkuu Janani Luwum, kiongozi jasiri aliyepigania haki na uhuru kwa watu wa Uganda wakati wa utawala dhalimu wa Rais Iddi Amin Dada. 

Filamu hii inaonesha msimamo wake usioyumba dhidi ya udikteta na jinsi alivyonyongwa kikatili.

Akizungumzas kuhusu tamasha hilo Ofisa Mtendaji Mkuu Joseph Mwale alisema kauli mbiu ya Tamasha la 28 la ZIFF ni "Tumaini Linalochipukia" akitaja mabadiliko mahususi yanayosukuma mbele uwezo wa filamu kuifunza dunia huku ikibakisha matumaini.

"Mwaka huu, ZIFF inafanyika chini ya kaulimbiu "Tumaini Linalochipukia" au 'Where Hopes Takes Root," ikisisitiza nafasi ya filamu kama chombo cha kuleta matumaini na mabadiliko," alisema Mwale

Tamasha la 28 la ZIFF limepokea idadi kubwa ya filamu, jumla ya zaidi ya filamu 430 zilizozalishwa mwaka 2024 na 2025 kutoka sehemu mbalimbali duniani zilipokelewa.

Kwa mujibu wa Madudu, filamu 174 kati ya hizi zilitoka Afrika Mashariki, zikigawanyika kama ifuatavyo: Kenya (filamu 54), Uganda (filamu 52), Tanzania (filamu 49), Rwanda (filamu 6), Burundi (filamu 1), Jamhuri ya Kidemokrasia ya Kongo (filamu 4), na Somalia (filamu 8).

Nchi nyingine zilizowasilisha idadi kubwa ya filamu ni pamoja na Afrika Kusini (filamu 20), Iran (filamu 79), na Misri (filamu 36). 

Pia kumekuwa na uwasilishaji wa filamu kutoka India, Brazil, Marekani, Uchina, Ufaransa, Italia, Uturuki, Nigeria, Argentina, Hispania, Poland, Uingereza, Ujerumani, Kanada, Indonesia, Shirikisho la Urusi, Qatar, Japani, Falme za Kiarabu, Pakistan, Tunisia, Angola, Malawi, Ureno, Ubelgiji, Zimbabwe, Mayotte, Vietnam, Reunion, Romania, Saudi Arabia, Oman, Moroko, Lebanon, Jamaica, Botswana, Burkina Faso, Ghana, Senegal, Sudan, na Ethiopia, kati ya nchi zaidi ya 100 zilizoshiriki.

Katika filamu zote zilizowasilishwa, filamu 68 zimechaguliwa kuonyeshwa rasmi kwenye tamasha. Hizi ni pamoja na filamu 15 za kipengele cha hadithi ndefu (Feature Fiction), filamu 14 za makala (Documentary), tamthilia 10 za televisheni (Tv Drama Series), na filamu fupi 29.

Makundi ya ushindani ya ZIFF mwaka huu ni pamoja na Filamu Bora ya Kipengele, Filamu Bora ya Makala, Tuzo ya Emerson kwa Filamu Bora ya Zanzibar, Filamu Fupi Bora au Uhuishaji Bora, Filamu Bora ya Afrika Mashariki, Muigizaji Bora (Afrika Mashariki), Muigizaji Bora wa Kike (Afrika Mashariki), Muigizaji Bora (Tanzania), Muigizaji Bora wa Kike (Tanzania), Tuzo ya Mwenyekiti wa ZIFF, pamoja na Tuzo ya Chaguo la Watu.