TANZANIA YAJIANDAA KUTEKELEZA MAAZIMIO YA KIMATAIFA YA USALAMA SEKTA YA USAFIRI WA ANGA

Na Mwandishi Wetu Mamlaka ya Usafiri wa Anga Tanzania (TCAA) imezungumzia hatua muhimu zinazochukuliwa na serikali kutekeleza maazimio ya ki...

Na Mwandishi Wetu

Mamlaka ya Usafiri wa Anga Tanzania (TCAA) imezungumzia hatua muhimu zinazochukuliwa na serikali kutekeleza maazimio ya kimataifa yanayolenga kuimarisha usalama na udhibiti wa mipaka katika sekta ya usafiri wa anga. 

Kutokana na umuhimu wa utekelezaji wa maazimio hayo ya kimataifa, TCAA imeitisha kikao cha wadau wa usafiri wa anga Ijumaa, Juni 23, 2025, kuanzia saa 3:00 asubuhi katika jengo la Aviation House, Dar es Salaam.

Kikao hicho kityajikita kujadili utekelezaji wa mifumo miwili muhimu iliyoagizwa kimataifa kwa ajili ya usalama wa anga: Mfumo wa Taarifa za Wasafiri Kabla ya Kuwasili (APIS) na Mfumo wa Kielektroniki wa Udhibiti wa Mipaka (eBMC).

Kwa mujibu wa TCAA, Tanzania, kama nchi mwanachama wa Shirika la Kimataifa la Usafiri wa Anga (ICAO) na Umoja wa Mataifa (UN), imelazimika kutekeleza maazimio kadhaa yanayohusu usalama wa anga, ikiwemo Azimio la Baraza la Usalama la Umoja wa Mataifa Na. 2178 (2014), 2396 (2017), na 2482 (2019). 

Maazimio haya yanaitaka kila nchi mwanachama kuanzisha na kusimamia mfumo wa ukusanyaji wa taarifa za abiria kabla ya kuwasili au kuondoka, lengo kuu likiwa ni kudhibiti vitendo vya ugaidi na uhalifu wa kuvuka mipaka.

'Tanzania, kama sehemu ya jamii ya kimataifa, inatakiwa kuhakikisha kuwa mipaka yake inabaki salama na haitumiki kama njia ya wapiganaji wa kigaidi wa kigeni (FTFs) au wahalifu wengine kuingia au kutoka nchini' ilisema sehemu ya taarifa hiyo. 

Taarifa imesema kutokana na umuhimu wa usalama wa anga kimataifa, ICAO imehimiza nchi zote kutekeleza maazimio haya kwa haraka.

Hata hivyo,Kutokana na gharama kubwa za utekelezaji wa miradi hiyo, ikiwemo uchakataji wa data, uboreshaji wa mifumo, utekelezaji wa sheria za faragha za taarifa za usalama wa mifumo, na utunzaji wa taarifa, TCAA imependekeza kuwapo kwa chanzo cha fedha kisichokoma ili kuhakikisha uendelevu wa mifumo.

Tayari TCAA inafikiri kuanzisha tozo kutoka kwa wasafiri wa kimataifa.

TCAA imesema katika taarifa yuake maamuzi ya kukukbaliana na maazimio hayo ni kutokana manufaa makuu ya utekelezaji wa mifumo ya APIS na eBMC nchini. 

Manufaa hayo nio pamoja na kuimarisha tahadhari ya hatari kabla ya kuwasili: Hii itasaidia kutambua na kuzuia magaidi au wahalifu kuingia nchini kupitia anga, hivyo kuimarisha usalama wa taifa.

Pia mifumo hiyo itasaidia kuongeza ufanisi wa udhibiti wa taratibu za uhamiaji: Mfumo wa kielektroniki utarahisisha mchakato wa uhamiaji na kupunguza msongamano viwanja vya ndege, na hivyo kuboresha uzoefu wa abiria.

Aidha mifumo hiyo itaboresha urahisishaji wa usafiri kwa kupunguza muda wa kukagua abiria na kuboresha mfumo wa usimamizi wa mipaka, na hivyo kuweka mazingira bora ya usafiri na biashara.

Baraza la Usalama la Umoja wa Mataifa na ICAO vimekuwa vikishinikiza nchi  wanachama kutekeleza hatua hizi muhimu za usalama ili kukabiliana na changamoto za usalama wa anga kimataifa, ikiwemo tishio la ugaidi.

Mkutano huo utajadili pia mapendekezo ya TCAA kwa serikali ili yenye lengo la kuhakikisha utekelezaji wenye ufanisi na endelevu wa mifumo. 

Miongoni mwa mapendekezo yaliyopelekwa ni pamoja na haja ya uwapo wa fedha za matengenezo na uendeshaji wa mifumo usiokoma ili kuhakikisha mifumo hiyo inafanya kazi ipasavyo muda wote.

Aidha kumetakiwa kuwapo na wataalamu wa kutosha wanaojua jinsi ya kutumia na kusimamia mifumo hii kwa ufanisi na kuangaliwa upya kwa taratibu ili ziendane na mahitaji ya mifumo mipya.

TCAA imetoa wito kwa wadau wote, ikiwemo kampuni za ndege, mawakala wa usafiri, na umma kwa ujumla, kutoa maoni yao kuhusu mapendekezo hayo. 

Kwa mujibu wa taarifa ya TCAA, mamlaka hiyo pia inakaribisha maoni ya maandishi  kabla ya mkutano, na maswali yanapaswa kuwasilishwa mapema, wakiwasiliana na Bw. Wales Chiwawa kupitia barua pepe: wales.chiwawa@tcaa.go.tz au tcaa@tcaa.go.tz.