TANZANIA YAMPOTEZA MWONGOZA FILAMU VETERANI KASSIM EL SIAGI

MWASISI wa bongo movie na muongozaji filamu, Kassim el Siagi amefariki dunia leo akiwa na umri wa miaka 78 wakati akitibiwa katika hospitali...

MWASISI wa bongo movie na muongozaji filamu, Kassim el Siagi amefariki dunia leo akiwa na umri wa miaka 78 wakati akitibiwa katika hospitali ya Bombo, mkoani Tanga.

Kwa mujibu wa mtoto wa marehemu Abdulrahman, baba yake  alikuwa anaugua tatizo la figo, upungufu wa madini ya sodium na mapafu kujaa maji.

Msiba wa El Siagi ambaye pia alishawahi kuwa Katibu Mkuu wa Klabu ya soka ya Coastal Union, upo maeneo ya Mwanzange CCM karibu na kituo cha polisi cha Mabawa, kwa mtoto wake.

Kassim El- Siagi ni moja ya waasisi wa Utayarishaji Filamu za Kiswahili za Kibiashara nchini(bongo movie) —kipindi hicho akiwa na wenzake Marehemu Mzee Amri Bawji, Jimmy “Master” Mponda na Hakim Bayakub—kupitia filamu zao kama vile; “Shamba Kubwa”, “A Love Story–Tanganyika na Unguja”, “Augua” na “Dunia Hadaa”.

Filamu zake hizo zimeacha alama ya kudumu katika historia ya filamu za Tanzania, zikiguswa na hadhira pana kutokana na ubunifu wake na uwezo wa kusimulia hadithi kwa ufasaha.

Aidha mara ya mwisho alishiriki katika kutoa mafunzo ya utengenezaji na utayarishaji wa filamu  yaliyofanyika jijini Tanga Machi 29,2025.

Akiwa katibu wa soka anakumbukwa kwa misimamo yake migumu ambayo ilimkutanisha na kamati za kitaifa  zilizomjadili mustakabali wake katika soka.

El Siagi ambaye pia ni mwalimu alishawahi kufundisha katika shule ya sekondari Popatlal na kuwa katibu wa mbunge wa tanga ambaye alishawahi kuwa waziri marehemu Nundu.

Taarifa za kifo chake zimeshtua wengi, Bishop Hulka ambaye ameshawahi kuandika kazi kadhaa za El Siagi amesema kwamba tasnia ya filamu imepata pengo kubwa kutokana na umahuiri aliokuwa nao . Aidha alisema alikuwa miongoni mwa Watanzania wa kwanza kuthubutu kuanzisha BongoMovie akiwa na akina Bawji.

Alisema atamkumbuka kwa uthubutu wake na kuonesha njia ya uwapo wa filamu huru baada ya uzalishaji wa filamu uliokuwa unafanywa na taasisi za umma kukwama.

Alisema Kassim el Siagi hakuwa tu muongozaji wa filamu, bali pia alikuwa mwalimu mahiri na kiongozi, akichangia pakubwa katika kukuza vipaji na maendeleo ya tasnia.

Kifo cha Kassim el Siagi ni ukumbusho wa kupotea kwa mmoja wa waasisi na wachangiaji muhimu katika sanaa na elimu nchini. Urithi wake utaendelea kuishi kupitia kazi zake za filamu na athari aliyoiacha kwa vizazi vingi vya wasanii na walimu.

Kwa mujibu wa mtoto wake baba yake ambaye ameacha watoto wanne atazikwa katika makaburi ya Mwanzage CCM kesho saa kumi ambako pia wamezikwa ndugu wengine akiwamo babu yake.

Mungu ailaze roho ya marehemu Kassim el Siagi mahali pema peponi. Amin.