TCAA yatoa haki za ziada kwa mashirika ya Ndege ya Ethiopia, Qatar

Na Mwandishi wetu, BSKY Media Mamlaka ya Usafiri wa Anga Tanzania (TCAA) imetoa haki za ziada, kwa kipindi cha miezi sita, kwa Shirika la Nd...

Na Mwandishi wetu, BSKY Media

Mamlaka ya Usafiri wa Anga Tanzania (TCAA) imetoa haki za ziada, kwa kipindi cha miezi sita, kwa Shirika la Ndege la Ethiopia (Ethiopian Airlines) na Qatar Airways ili kusaidia na kuwezesha safari za ndani na kikanda kwenda maeneo makuu ya Tanzania.

Aidha waendeshaji wa ndani wa Tanzania wamepewa kibali cha udhibiti kuruhusiwa kushirikiana na waendeshaji waliosajiliwa kimataifa kupitia mikataba ya Codeshare au Block Permit. Hii itaruhusu kuendelea kwa shughuli za usafiri ndani ya Tanzania bila usumbufu.

Katika tangazo kwa umma la Mamlaka hiyo lililotolewa Juni 18,2025, limesema hatua hizo zilizochukuliwa zimelenga kuhakikisha mwendelezo wa huduma za usafiri wa anga nchini na uhusiano usiofeli kwenda na kutoka maeneo yote ya Jamhuri ya Muungano wa Tanzania.

Aidha hatua hizo zimechukuliwa, siku kadhaa baada ya tangazo la Umoja wa Ulaya (EU) la Juni 3, 2025, kuhusu kuzuiwa kwa baadhi ya mashirika ya ndege yaliyosajiliwa Tanzania kuruka kwenye Anga ya nchi za Ulaya (EU).

Tangazo hilo limesema hatua hizo ikiwemo haki za ziada zimechukuliwa ili kulinda sekta ya utalii, kuhakikisha mwendelezo wa biashara, na kurahisisha uhamaji wa kimataifa.

Mamlaka hiyo pia imesema hatua hiyo itaruhusu kuendelea kwa shughuli za usafiri ndani ya Tanzania bila usumbufu.

TCAA pia imesema inaendelea kushauriana na waendeshaji wa ndani, wadau wa utalii, na washirika wa maendeleo ili kupunguza usumbufu wowote unaoweza kujitokeza.

Tangazo hilo pia limesema Serikali ya Tanzania, kupitia TCAA na Wizara ya Uchukuzi, inafanya mazungumzo kikamilifu na Umoja wa Ulaya ili kushughulikia masuala yaliyobainishwa. 

"Juhudi hizi zinalenga kuhakikisha kuwa, mara baada ya kutatuliwa, Tanzania itaondolewa kwenye Orodha ya Usalama wa Anga ya EU hivi karibuni," inasema sehemu ya taarifa hiyo kwa vyombo vya habari

Tangazo la EU la Juni 3, 2025, lilijumuisha baadhi ya mashirika ya ndege yaliyosajiliwa Tanzania kwenye Orodha yao ya Usalama wa Anga, jambo lililopelekea wasiwasi fulani miongoni mwa wasafiri na wadau wa biashara.

"Uamuzi huu wa EU hauathiri mashirika ya ndege ambayo hayajasajiliwa Tanzania na hivyo hayadhibitiwi na TCAA," ilifafanua taarifa hiyo.

Pia taarifa hiyo iliwataka wananchi wanaotaka kuzuru Tanzania kuendelea na mipango yao ya safari kuja nchini kwa utalii na masuala mengine ya kiuchumi au kiafya.

Tangazo hilo lilisisitiza kwamba Tanzania inasalia kuwa wazi na kufikika, na sekta ya anga inaendelea kufanya kazi chini ya viwango vya kimataifa vya usalama na udhibiti. 

"Mipango hii ya muda imesanifiwa mahsusi ili kuhifadhi mwendelezo wa biashara, imani ya wawekezaji, na kutegemewa kwa huduma katika kipindi hiki," ilisema taarifa hiyo.