Uamuzi wa Trump unaua polepole wakimbizi Kenya

Watoto hupewa maziwa kila baada ya saa tatu katika hospitali walikofurika. Kusudi la kuwapa maziwa mara kwa mara ni kuongeza ulaji wao wa vi...

Watoto hupewa maziwa kila baada ya saa tatu katika hospitali walikofurika. Kusudi la kuwapa maziwa mara kwa mara ni kuongeza ulaji wao wa virutubisho muhimu, lengo likiwa kuwasaidia kukabiliana na utapiamlo na kurejesha afya zao.

BBC News, Kakuma

Mamia ya maelfu ya watu "wanakufa njaa polepole" katika kambi za wakimbizi nchini Kenya baada ya kupunguzwa kwa ufadhili wa Marekani kwenye mgao wa chakula, afisa wa Umoja wa Mataifa ameliambia Shirika la Utangazaji la Uingereza (BBC).

Imeelezwa kuwa katika hospitali iliyoko kwenye kambi kubwa ya Kakuma kaskazini-magharibi mwa taifa la Afrika Mashariki, ambapo ni makazi ya  wakimbizi takribani 300,000 waliokimbia machafuko katika nchi mbalimbali barani Afrika na Mashariki ya Kati, hali ni mbaya.

Imeelezwa kuwa watoto waliokondeana wamejazana katika wodi ya vitanda 30 ya Hospitali ya Amusait ya Kakuma, wakiwatazama wageni bila hisia huku wakipatiwa matibabu ya utapiamlo mkali.

Mtoto mmoja, Hellen, hawezi kujongea. Sehemu za ngozi yake zimekunjamana na kutoa magamba, zikiacha mabaka mekundu – matokeo ya utapiamlo, daktari mmoja ameiambia BBC.

Pembeni ya njia amelala mtoto wa miezi tisa, James, mtoto wa nane wa Agnes Awila, mkimbizi kutoka kaskazini mwa Uganda.

"Chakula hakitoshi, watoto wangu wanakula mara moja tu kwa siku. Kama hakuna chakula unawapa nini?" anauliza.

James, Hellen na maelfu ya wakimbizi wengine huko Kakuma wanategemea Shirika la Mpango wa Chakula Duniani (WFP) la Umoja wa Mataifa kwa riziki muhimu.

Lakini shirika hilo lililazimika kupunguza kwa kiasi kikubwa operesheni zake za misaada katika nchi nyingi baada ya Rais Donald Trump kutangaza kupunguzwa kwa misaada mapema mwaka huu, kama sehemu ya sera yake ya "America First".

Marekani ilikuwa ikitoa takriban asilimia 70 ya ufadhili wa operesheni za WFP nchini Kenya.

WFP inasema kwamba kutokana na kupunguzwa kwa ufadhili, shirika hilo limelazimika kupunguza mgao wa wakimbizi hadi asilimia 30 ya kiasi cha chini kinachopendekezwa ambacho mtu anapaswa kula ili kubaki na afya.

"Ikiwa tuna hali inayoendelea ambapo hili ndilo tunaweza kudhibiti, basi kimsingi tuna idadi ya watu wanaokufa njaa polepole," anasema Felix Okech, mkuu wa operesheni za wakimbizi wa WFP nchini Kenya.

Baadhi ya watoto wenye utapiamlo katika Hospitali ya Amusait wanaweza kulishwa tu kupitia mirija.

Baadhi ya watoto wenye utapiamlo katika Hospitali ya Amusait hulishwa tu kwa kutumia mirija. Hii inaashiria kuwa hali yao ya utapiamlo ni mbaya sana kiasi kwamba hawawezi kula wenyewe au wanahitaji virutubisho maalum vinavyopitishwa moja kwa moja mwilini.

Mukuniwa Bililo Mami, mama wa watoto wawili anasema:.

"Nina shukrani kupokea kidogo hiki [chakula] lakini hakitoshi," anasema mwanamke huyo mwenye umri wa miaka 51, ambaye aliwasili kambini miaka 13 iliyopita kutoka Kivu Kusini, eneo lililokumbwa na vita mashariki mwa Jamhuri ya Kidemokrasia ya Kongo.

Bi. Mami anasema wakimbizi walikuwa "wanakula vizuri" - milo mitatu kwa siku. Lakini sasa kwa kuwa mgao umepungua hadi asilimia 30 ya kiasi chao cha kawaida, chakula alichopewa hakitoshi kudumu mwezi mmoja.

Hadi mwaka huu, Umoja wa Mataifa ulikuwa ukitoa takriban dola milioni 4 (£3m) taslimu moja kwa moja kwa wakimbizi katika kambi za Kenya kila mwezi, iliyokusudiwa kuruhusu familia kununua mahitaji ya msingi.

Na huku kukiwa hakuna matumaini ya ufadhili zaidi inaaminika katika miezi miwili ijayo, wakimbizi hao watakuwa wanakabiliwa na njaa .