DCMA yaitisha kongamano kujadili mtaala mpya wa muziki na teknolojia

Chuo cha Muziki cha DCMA (Dhow Countries Music Academy) cha Zanzibar kimeandaa kongamano muhimu la siku moja litakaloshirikisha wadau mbalim...

Chuo cha Muziki cha DCMA (Dhow Countries Music Academy) cha Zanzibar kimeandaa kongamano muhimu la siku moja litakaloshirikisha wadau mbalimbali, likijumuisha wataalamu kutoka UNESCO, ili kukagua, kuboresha, na kuthibitisha rasimu ya mtaala mpya wa masomo ya muziki, sauti na teknolojia (Music Performance, Sound and Technology.) itakayofanyika chuoni hapo Jumamosi, Agosti 2, 2025.

Kongamano hili ni hatua muhimu katika kuhakikisha kuwa mtaala  uliopendekezwa unajadiliwa kwa kuzingatia mahitaji ya sasa ya tasnia ya muziki na jamii, huku ukidumisha na kukuza urithi wa kitamaduni na muziki wa Ukanda wa nchi za majahazi.

Akizungumza Mwenyekiti wa Bodi ya Wadhamini wa Chuo cha DCMA, Salma Adim amesema madhumuni makuu ya kongamano hilo ni kupitia, kusafisha, na kuthibitisha rasimu ya mtaala wa masomo ya muziki, sauti na Teknolojia.

Salma ambaye pia ni Katibu Mkuu wa muda wa Jukwaa la Stream East, amesisitiza umuhimu wa ushiriki wa wadau mbalimbali katika mchakato huu. Alisisitiza kuwa ujuzi na maoni kutoka kwa wadau yatachangia pakubwa katika kuunda programu itakayowawezesha wanafunzi kuwa bora zaidi huku wakilinda urithi wa kitamaduni katika muziki.

"Huu ni wakati muhimu kwa DCMA na kwa mustakabali wa muziki wetu," alisema Bi. Salma. "Tunafahamu kuwa tasnia ya muziki inabadilika kwa kasi, hasa kwa ujio wa teknolojia mpya. Mtaala huu mpya utawaandaa vijana wetu kukabiliana na changamoto hizo na kuzitumia kama fursa."

Ushirikiano na mashirika kama Shirika la Umoja wa Mataifa la Elimu, Sayansi na Utamaduni (UNESCO) unaonyesha dhamira ya DCMA katika kutoa elimu bora na inayokidhi viwango vya kimataifa. UNESCO, kama mdau mkuu, inasaidia katika kuhakikisha kuwa mtaala huo unazingatia kanuni za ubora wa elimu na unakuza utofauti wa kitamaduni.

Washiriki wa warsha hii wanatarajiwa kujadili mada mbalimbali zitakazohusu vipengele muhimu vya mtaala, ikiwemo mbinu za ufundishaji, teknolojia za kisasa za sauti na fursa za kibiashara katika tasnia ya muziki. Lengo ni kuhakikisha kuwa wahitimu wa DCMA wanakuwa na ujuzi kamili na stadi zinazohitajika sokoni, si tu katika utendaji wa muziki bali pia katika uzalishaji, uhandisi wa sauti, na usimamizi wa biashara ya muziki.

Kongamano hili pia linafanyika wakati muhimu, ambapo tasnia ya filamu na muziki katika ukanda wa Afrika Mashariki inapitia mabadiliko makubwa kutokana na uzinduzi wa jukwaa la Stream East. Jukwaa hili la kidijitali, ambalo Bi. Salma Adim ni miongoni mwa viongozi wake wakuu, linafungua fursa mpya kwa wasanii wa kikanda kusambaza na kufanyia biashara kazi zao. Hivyo, mtaala mpya wa DCMA unatarajiwa kuunganishwa na fursa hizi za kidijitali, ukiwajengea wanafunzi uwezo wa kutumia majukwaa kama Stream East kukuza vipaji vyao na kujipatia kipato.

"Tunataka kuhakikisha kuwa wanafunzi wetu wanatoka DCMA wakiwa na uelewa mpana wa tasnia ya muziki, ikiwemo namna ya kutumia majukwaa ya kidijitali kusambaza kazi zao na kuwafikia mashabiki wengi zaidi," alieleza Bi. Salma. "Muziki wa Dhow (nchi za majahazi) una historia ndefu na tajiri, na ni muhimu tuendelee kuikuza na kuiwakilisha katika karne ya 21."

Salma alisema Chuo cha DCMA kinawaalika wadau wote muhimu kuthibitisha ushiriki wao ifikapo Jumatano, Julai 30, 2025, kwa kuwasiliana na namba 0777 399 366.