Muuza magazeti wa mwisho wa Ufaransa kutunikiwa heshima ya juu ya taifa hilo

Ali Akbar, ambaye sasa ana miaka 72, ametumia miaka 50 akiuza magazeti huko Left Bank, eneo maarufu jijini Paris. Yeye ndiye muuza magazeti ...

Ali Akbar, ambaye sasa ana miaka 72, ametumia miaka 50 akiuza magazeti huko Left Bank, eneo maarufu jijini Paris. Yeye ndiye muuza magazeti wa mwisho nchini Ufaransa, na labda wa mwisho Ulaya nzima.

Kwa zaidi ya miaka 50, Ali Akbar amezunguka mitaa ya Left Bank, Paris, akiwa ameshika magazeti mikononi mwake na kutangaza habari kuu za siku kwa sauti yenye mvuto wa aina yake.

Sasa, anatarajiwa kutambuliwa rasmi kwa mchango wake katika utamaduni wa Ufaransa ambapo Rais Emmanuel Macron—ambaye alipokuwa mwanafunzi alinunua magazeti kutoka kwake—anatarajia kumpa Nishani ya Heshima (Order of Merit) mwezi ujao, mojawapo ya heshima za juu zaidi nchini Ufaransa.

Mzee huyu ambaye kwa sasa anafanya kazi hiyo kwa liwazo la moyo anasema kwamba alipoanza kuuza magazeti walikuwa wengi lakini sasa kabaki pekee.

"Nilipoanza hapa mwaka 1973, tulikuwa wauza magazeti 35 au 40 hapa Paris," anasema. "Sasa nipo peke yangu. Imekuwa ya kuvunja moyo. Kila kitu sasa ni kidijitali. Watu wanataka tu kuangalia simu zao."

Kabla ya ujio wa mtandao, anasema Akbar aliweza kuuza nakala 80 ndani ya saa ya kwanza tu baada ya gazeti kuchapishwa mchana.

"Hapo zamani, watu walinizunguka wakitafuta gazeti. Sasa inabidi niwafuate wateja ili nijaribu kuuza hata moja," anasema.

"Mimi ni mtu mwenye furaha. Na nina uhuru. Kazi hii imenifanya kuwa huru kabisa. Hakuna mtu anayenipa amri. Ndio maana naiendeleza."

Siku hizi, kwenye mzunguko wake wa mauzo kupitia mikahawa ya eneo maarufu la Saint-Germain, Bw. Akbar anaweza kuuza karibu nakala 30 za gazeti la Le Monde. Anapata nusu ya bei ya mauzo, lakini halipwi kwa nakala anazozirudisha.

Mzee huyu mwenye umri wa miaka 72, mwenye nguvu tele, ni sura inayofahamika na kupendwa sana katika eneo hilo. "Nilifika hapa mara ya kwanza miaka ya 1960 na nimekua pamoja na Ali. Yeye ni kama kaka kwangu," anasema mwanamke mmoja.

"Anamjua kila mtu. Na ni mtu wa kufurahisha sana," anasema mwingine.

Ali Akbar alizaliwa Rawalpindi, Pakistan, na alisafiri kuelekea Ulaya mwishoni mwa miaka ya 1960. Alifika kwanza Amsterdam ambako alipata kazi kwenye meli ya kitalii.

Mwaka 1972, meli hiyo ilitia nanga katika mji wa Ufaransa wa Rouen, na mwaka mmoja baadaye alikuwa Paris. Alipata vibali vyake vya makazi miaka ya 1980.

"Nikiwa Afghanistan njiani kuelekea Ulaya, nilikutana na kundi la watu waliotaka kunifanya nivute bangi. Niliwaambia samahani, lakini nilikuwa na dhamira maishani mwangu,"alisema Akbar katika mahojiano na Shirika la Utangazaji la Uingereza BBC.

Katika eneo la Saint-Germain, ambalo zamani lilikuwa kitovu cha wasomi, alikutana na watu maarufu na waandishi. Anasema  Elton John aliwahi kumnunulia chai ya maziwa kwenye mkahawa wa Brasserie Lipp. Na akiuza magazeti mbele ya chuo kikuu maarufu cha Sciences-Po, alifahamu vizazi vya wanasiasa wa baadaye—kama Rais Macron.

Akihojiwa analionaje eneo la Left Bank kwa sasa tangu alipoanza kuuza gazeti la Le Monde kwa sauti?Anasema:"Hali si ile ile," analalamika. 

"Wakati huo kulikuwa na wachapishaji na waandishi kila mahali—na waigizaji na wanamuziki. Eneo lilikuwa na roho yake. Lakini sasa ni eneo la watalii tu. Roho imeondoka," anasema huku akicheka.