Saa 72 za Tamasha la Gulio Kariakoo

Waziri wa Viwanda na Biashara Dkt. Selemani Jafo   . Tamasha lasisitiza amani na kodi   Na Mwandishi wetu Mitaa ya Mkunguni na Tanda...

Waziri wa Viwanda na Biashara Dkt. Selemani Jafo

 

. Tamasha lasisitiza amani na kodi

 Na Mwandishi wetu

Mitaa ya Mkunguni na Tandamti katika jiji la Dar es Salaam imegeuka kitovu cha biashara na burudani kwa saa 72 mfululizo, kuanzia Agosti 15 hadi 18, 2025, baada ya kuzinduliwa kwa tamasha la pili la Gulio la Kariakoo (Kariakoo Festival).

Tamasha hili ambalo linakutanisha zaidi ya wafanyabiashara 150 kutoka ndani na nje ya nchi, linalenga kuimarisha dhana ya biashara ya saa 24, wazo lililopewa baraka na viongozi mbalimbali, na kuwapa wananchi fursa ya kununua bidhaa kwa bei nafuu bila kujali mchana au usiku.

Hekaheka katika mitaa hiyo zilianza mapema, zikivutia maelfu ya wanunuzi na wageni waliotaka kushuhudia jinsi soko hili maarufu Afrika Mashariki na Kati linavyofanya kazi usiku na mchana, baada ya ufunguzi uliofanywa na Waziri wa Viwanda na Biashara, Dkt. Selemani Jafo ambaye ujio wake uliambatana na Kamishna Mkuu wa Mamlaka ya Mapato Tanzania (TRA), Yusuph Mwenda.

Soko la kimataifa la Kariakoo

 

Mbali na biashara na miamala ya kifedha, tamasha hili pia liliambatana na Kongamano Kubwa la Kibiashara, lililotoa fursa kwa wafanyabiashara na taasisi za serikali kukutana uso kwa uso.

Pia kulikuwapo na Kongamano hilo lilihudhuriwa na viongozi kama Waziri wa Viwanda na Biashara, Dkt. Selemani Jafo, na Kamishna Mkuu wa Mamlaka ya Mapato Tanzania (TRA), Yusuph Mwenda, ambao walijibu maswali na kujadili changamoto zinazowakabili wafanyabiashara.

Kamishna Mkuu wa Mamlaka ya Mapato (TRA) Bw. Yusuph Mwenda

NMB, kama mdhamini mkuu, ilitumia fursa hiyo kutoa elimu juu ya huduma zake za kifedha, ikiwemo kadi maalum za biashara, na kukuza dhana ya uchumi usiotegemea pesa taslimu. Hii ilifanya Gulio la Kariakoo kuwa zaidi ya soko, bali jukwaa la kuelimishana na kutafuta suluhu.

 

Malengo Yanayofikiwa na Ahadi za Baadaye

Saa 72 za gulio zinatumika kama kipimo cha kufanikiwa kwa wazo la biashara ya saa 24. Mafanikio hayo yamepokelewa vyema na Mwenyekiti wa Jumuiya ya Wafanyabiashara Kariakoo (JWK), Severine Mushi, ambaye amepongeza ushirikiano uliotolewa na wadhamini na serikali.

 

Waziri wa Viwanda na Biashara Dkt. Selemani Jafo akiwa kwenye picha ya pamoja na wakuu wa taasisi za umma zinazohusika na usimamizi na uratibu wa wafanyabiashara nchini

Aidha, Meneja Mkuu wa Shirika la Masoko ya Kariakoo, CPA Ashraph Abdulkarim, amethibitisha kuwa maandalizi ya kuwarejesha wafanyabiashara ndani ya soko jipya yanaendelea vizuri, huku akishukuru mchango wa Serikali ya Awamu ya Sita chini ya Rais Dkt. Samia Suluhu Hassan kwa kutoa fedha Bilioni 28 kwa ajili ya ukarabati. Alisema mafanikio ya gulio hili yanaashiria mwanzo mpya na matumaini makubwa kwa uchumi wa wafanyabiashara wa Kariakoo na wa Tanzania kwa ujumla.

 Katika shamrashamra za ufunguzi  Waziri wa Viwanda na Biashara, Dkt. Selemani Jafo, ametoa wito kwa wafanyabiashara wa eneo hilo kuwa mabalozi wa amani wakati nchi ikielekea katika Uchaguzi Mkuu. Wito huu unalenga kuhakikisha biashara zinafanyika kwa usalama huku wafanyabiashara wakitimiza wajibu wao wa kulipa kodi kwa uaminifu.

 

Juhudi za Kifedha na Udhamini

Tamasha hili ambalo limedhaminiwa na Benki ya NMB kwa kitita cha Shilingi Milioni 100,  lilimpa nafasi  Kamishna Mkuu wa Mamlaka ya Mapato Tanzania (TRA), Yusuph Mwenda kusisitiza umuhimu wa wafanyabiashara kulipa kodi kwa mujibu wa sheria, akihakikisha TRA iko tayari kutatua kero zao.

 Naye Meneja wa NMB Kanda ya Dar es Salaam, Seka Urio, ameeleza kuwa udhamini huo unaonyesha dhamira ya benki hiyo ya kushirikiana na wafanyabiashara wa ngazi zote kwa kuwapatia huduma zenye masuluhisho muhimu na rafiki.

 

Matarajio na Fursa za Kiuchumi

Mratibu wa tamasha hilo, George Lupenza, amesema zaidi ya wafanyabiashara 150 kutoka ndani na nje ya nchi wanashiriki kwenye gulio hilo, ambalo litadumu kwa saa 72 mfululizo. Tamasha hili, ambalo ni msimu wa pili kufanyika, linatoa fursa wananchi kununua bidhaa kwa bei nafuu na kujua mahali pa kuzipata pale watakapozihitaji.

 

Mratibu wa tamasha la Gulio la Kariakoo (Kariakoo Festival) George Lupenza 

Meneja Mkuu wa Shirika la Masoko ya Kariakoo, CPA Ashraph Abdulkarim, ameongeza kuwa tamasha hilo ni fursa nzuri kwa wadau wa soko la Kariakoo kuwafikia wateja wa ndani na wa nje ya nchi. Pia, amemshukuru Rais Dkt. Samia Suluhu Hassan kwa kutoa fedha Bilioni 28 kwa ajili ya ujenzi na ukarabati wa soko hilo, huku Shirika likiwa katika maandalizi ya mwisho ya kuwarejesha wafanyabiashara ndani ya soko.