Usidharau Sheria ya Taarifa Binafsi, Faini Yake ni Sh Milioni 100

  Na Mwandishi wetu Taasisi na watu binafsi wanaokusanya na kuchakata taarifa za siri za wananchi wametakiwa kuwa makini na sheria, kwani Tu...

 

Na Mwandishi wetu

Taasisi na watu binafsi wanaokusanya na kuchakata taarifa za siri za wananchi wametakiwa kuwa makini na sheria, kwani Tume ya Ulinzi wa Taarifa Binafsi (PDPC) imeweka wazi kwamba adhabu ya juu kwa kukiuka sheria hiyo ni faini ya shilingi milioni 100.

Sheria mpya ya Ulinzi wa Taarifa Binafsi (Sura ya 44 Toleo la 2023) inalenga kulinda faragha za watu binafsi na kudhibiti matumizi mabaya ya taarifa zao za siri. Kwa mujibu wa sheria hiyo, Tume ina mamlaka ya kuchukua hatua dhidi ya yeyote anayekiuka kanuni zilizowekwa.

Kauli hiyo imetolewa na Mkuu wa Uhusiano na Mawasiliano kwa Umma wa Tume ya Ulinzi wa Taarifa Binafsi (PDPC), Innocent Mungy, wakati wa mafunzo maalum kuelekea Uchaguzi Mkuu, yaliyoandaliwa na Maamlaka ya Mawasiliano Tanzania (TCRA) kwa ombi la Mtandao wa Mabloga Tanzania (TBN).

Mungy alisema kutokana na adhabu kubwa iliyowekwa kushindwa dhidi ya wanaovunja sheria hiyo aliwataka mabloga kuelimisha umma kuhusu sheria hiyo, hasa katika kipindi cha uchaguzi, na kuwaonya kuepuka kuchapisha taarifa binafsi za watu au wagombea.

“Ni kosa kisheria kuingilia mambo binafsi ya watu, na adhabu yake ni kali. Bloga mna wajibu wa kulinda faragha na kuepuka taarifa zinazoweza kuvunja sheria,” alisema Mungy.

Mbali na faini, sheria inaipa Tume uwezo wa kumuamuru mkusanyaji au mchakataji wa taarifa kulipa fidia kwa mtu au taasisi iliyopata madhara kutokana na ukiukwaji wa sheria. Adhabu hii inajumuisha fidia ya kifedha na madhara mengine yasiyohusisha fedha.

Mungy alisema zipo taasisi ambazo tayari sheria imewabana kulazimika kulipa fidia na kurekebisha mambo yao ili wasitandikwe tena yatakapojitokeza malalamiko mengine.

Tume hiyo ambayo imepewa mamlaka ya kisheria ya hukumu mtu yeyote asiyeridhika na uamuzi au adhabu ya Tume anayo haki ya kukata rufaa katika Mahakama Kuu. Hii inatoa fursa ya kupata haki kwa wale watakaohisi wametendewa isivyo haki.

Mungyu alisema Sheria inasisitiza umuhimu wa kufuata misingi ya ulinzi wa taarifa. Mkusanyaji au mchakataji wa taarifa anapaswa kuhakikisha kuwa taarifa zinachakatwa kihalali na kwa uwazi. Taarifa hizo zinapaswa kuwa sahihi, kutoshana na lengo la kukusanywa, na kuhifadhiwa kwa muda unaofaa. Aidha, sheria inakataza usafirishaji wa taarifa nje ya nchi bila kufuata taratibu.

Usajili wa Lazima kwa Wote

Kifungu cha 14 cha sheria kinaeleza kuwa ni kosa kukusanya au kuchakata taarifa binafsi bila kusajiliwa na Tume. Mtu yeyote anayetaka kufanya shughuli hiyo anapaswa kuwasilisha maombi ya usajili kwa Tume na atapewa cheti cha usajili kwa kipindi cha miaka mitano. "Hata taasisi za umma zinazofanya kazi hii zinatakiwa kusajiliwa na kufuata masharti yote," alisema Mungy.

Mtu anayekiuka utaratibu wa usajili anaweza kufunguliwa mashtaka na kupewa adhabu kali. Hii inaonyesha umakini wa Serikali katika kulinda data za wananchi katika karne hii ya teknolojia ya kidijitali.

Sheria hii inalinda taarifa za kibinafsi za watu, kama vile majina, anwani, namba za simu, picha, na hata maoni yao ya kisiasa. Inataka taarifa hizi zikusanywe, zitumike, na zihifadhiwe kwa njia salama na kwa idhini ya mwenye nazo. Madhumuni makuu ya sheria hii ni kulinda faragha ya mtu na kuzuia matumizi mabaya ya taarifa zao, hasa katika ulimwengu wa kidijitali.