RAIS SAMIA AZINDUA TUME YA UCHUNGUZI WA VURUGU ZA UCHAGUZI, AIPIGIA MSTARI KUCHUNGUZA FEDHA ZA WAANDAMANAJI, NGO

Rais Samia Suluhu Hassan amezindua Tume ya Uchunguzi wa vurugu zilizotokea siku ya Uchaguzi Mkuu wa Oktoba 29, 2025, huku akiitaka kuchunguz...

Rais Samia Suluhu Hassan amezindua Tume ya Uchunguzi wa vurugu zilizotokea siku ya Uchaguzi Mkuu wa Oktoba 29, 2025, huku akiitaka kuchunguza chanzo cha fedha wanazodaiwa kupewa vijana walioandamana.

Rais Samia alisema hayo jana Ikulu, Chamwino mkoani Dodoma wakati akiizindua na kuipa Tume miezi mitatu kukamilisha uchunguzi huo. Alisisitiza kuwa kilichotokea siku ya uchaguzi hakikutarajiwa kutokea nchini kutokana na historia ya amani na utulivu wa kisiasa.

“Hata kama tuna vipindi tulikuwa hatuna utulivu wa kisiasa lakini hatukufikia kiasi hiki kilichofikia. Tume itakabidhiwa hadidu za rejea watakazokwenda kuziangalia na kuzifanyia kazi,” alisema Rais Samia.

Hadidu za Rejea Muhimu za Tume

Rais Samia aliiagiza Tume kuangalia na kuchunguza mambo mbalimbali, ikiwemo kiini cha vurugu na matamshi ya vyama vya siasa. Hadidu kuu za rejea ni:

Kiini cha Tatizo: 

Kuchunguza sababu hasa zilizosababisha vijana kuingia barabarani na kufanya vurugu.

Madai ya Haki: 

Kubaini ni haki gani hasa vijana wanazodai ili Serikali iweze kuzifanyia kazi kwa haraka na kuzipata.

Fedha na NGO:

 Kuchunguza chanzo cha fedha walizolipwa vijana waandamanaji na kuangalia ushiriki (role) wa Taasisi Zisizo za Serikali (NGO) za ndani na nje ya nchi katika vurugu hizo.

Matamshi ya Upinzani: 

Kuangalia matamshi ya vyama vya upinzani vilivyoahidi kuzuia uchaguzi na kubaini kiini cha kauli hizo. Tume pia iangalie uhusiano wa vyama hivyo na Tume Huru ya Taifa ya Uchaguzi (INEC) na Msajili wa Vyama.

Mbinu za Kukabiliana: 

Kuangalia njia zilizochukuliwa kukabiliana na vurugu zilizotokea, kwa kuzingatia kuwa Tume ina wajumbe wastaafu wa jeshi na polisi.

Rais Samia alieleza kuwa lengo la kuunda Tume hii ni kukusanya mapendekezo ambayo yatatumika kama ajenda kwenye Tume ya Maridhiano iliyoahidiwa awali, akisisitiza kuwa uundaji wa Tume hiyo umeendana na Sheria ya Tume za Uchunguzi ya Mwaka 2023.

 MWENYEKITI WA TUME

Rais Samia alimteua Jaji Mkuu Mstaafu Mohamed Chande Othmani kuwa Mwenyekiti wa Tume. Jaji Chande ni kiongozi mweledi mwenye uzoefu mkubwa katika tasnia ya sheria, utoaji wa haki, na masuala ya haki za binadamu, kitaifa na kimataifa. Anaheshimika kimataifa kutokana na uelewa wake wa sheria na siasa za kimataifa, hasa katika masuala ya utunzaji wa amani.

WAJUMBE WA TUME

Jaji Mkuu Mstaafu Ibrahim Juma: 

Aliteuliwa kama mjumbe, ambaye alihudumu kama Jaji Mkuu wa Mahakama ya Tanzania tangu mwaka 2017 hadi alipostaafu mwaka 2025. Kabla ya hapo, aliwahi kuwa Jaji wa Mahakama ya Rufani, Jaji wa Mahakama Kuu na Profesa wa Sheria katika Chuo Kikuu cha Dar es Salaam.

Balozi Mstaafu Ombeni Sefue: 

Ni Mwanadiplomasia na Katibu Mkuu Kiongozi Mstaafu. Katika utumishi wake, aliwahi kuwa Katibu wa Baraza la Mawaziri, Katibu wa Baraza la Usalama la Taifa na Mkuu wa Utumishi wa Umma. Pia alisimamia kazi za Tume mbalimbali za uchunguzi zilizoundwa na Rais.

Balozi Mstaafu Radhia Msuya: 

Ni Mwanadiplomasia. Alihudumu kama Balozi wa Tanzania katika nchi mbalimbali kama vile Afrika Kusini, Namibia, Lesotho, Botswana, na Jumuiya ya Maendeleo ya Kusini mwa Afrika (SADC). Alitunukiwa Nishani ya Heshima ya National Order of Merit na Rais wa Ufaransa.

Balozi Mstaafu Paul Meela: 

Ni Mwanadiplomasia na Balozi Mstaafu, ambaye pia ni Luteni Jenerali Mstaafu wa Jeshi la Ulinzi la Wananchi wa Tanzania (JWTZ). Aliwahi kuwa Balozi wa Tanzania nchini Jamhuri ya Kidemokrasia ya Congo (DRC) na alishiriki katika shughuli za amani Darfur (Sudan) na usuluhishi chini ya Rais wa zamani wa Kenya, Uhuru Kenyatta.

IGP Mstaafu Said Mwema: 

Ni Mkuu wa Jeshi la Polisi Tanzania (IGP) Mstaafu. Katika utumishi wake, alifanikisha mageuzi makubwa ikiwemo kuandaa na kutekeleza mkakati wa Polisi Jamii na kuliongoza Jeshi la Polisi kupambana na uhalifu wa kuvuka mipaka, ugaidi, na biashara haramu.

Balozi Mstaafu David Kapya:

 Ni Mwanadiplomasia. Aliwahi kufanya kazi mbalimbali katika utatuzi wa migogoro, ikiwemo kuwa Msaidizi Mahususi wa Rais wa Awamu ya Tatu, Benjamin Mkapa, katika mazungumzo ya kutafuta amani Mashariki mwa DRC.

Dkt. Stergomena Tax: 

Ni kiongozi mwandamizi Mstaafu mwenye uzoefu katika uongozi, diplomasia, na utangamano wa kikanda. Aliwahi kuwa Katibu Mtendaji wa Jumuiya ya SADC na pia alihudumu kama Waziri wa Ulinzi na Waziri wa Mambo ya Nje nchini Tanzania.