Balozi Matinyi Auza Vivutio vya Tanzania Katika Maonesho Makubwa ya Kimataifa nya Utalii nchini Finland

  Balozi wa Tanzania nchini Sweden, Mhe. Mobhare Matinyi akielezea vivutio vya utalii vya Tanzania pamoja na filamu ya Tanzania: The Royal T...

 

Balozi wa Tanzania nchini Sweden, Mhe. Mobhare Matinyi akielezea vivutio vya utalii vya Tanzania pamoja na filamu ya Tanzania: The Royal Tour, wakati wa Maonesho ya Utalii ya Kimataifa ya Matka, yanayoendelea jijini Helsinki, Finland

 Balozi wa Tanzania nchini Sweden, Mhe. Mobhare Matinyi, ameing’arisha Tanzania katika jukwaa la kimataifa kwa kutangaza vivutio lukuki vya utalii kwenye Maonesho ya Kimataifa ya Utalii ya Matka yanayofanyika jijini Helsinki, Finland, kuanzia tarehe 14 mpaka 18 Januari, 2026.

Katika maonesho hayo yanayotajwa kuwa miongoni mwa makubwa zaidi barani Ulaya, Balozi Matinyi, ambaye pia anawakilisha Tanzania katika nchi za Nordic, Baltik, na Ukraine, ametumia fursa hiyo kuelezea mafanikio makubwa ya Tanzania, ikiwemo ushindi wa Tuzo za Utalii za Dunia mnamo Desemba 6, 2025, nchini Bahrain kwa mwaka wa tatu mfululizo.

Mikakati ya Kuitangaza Tanzania

Balozi Matinyi aliangazia jitihada za Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, kupitia filamu maarufu ya Tanzania: The Royal Tour. Alieleza namna filamu hiyo ilivyofungua milango ya utalii duniani kote kwa kuonyesha utajiri wa nchi kupitia mwongozo wa Rais mwenyewe.

Vivutio vilivyoibua msisimko ni pamoja na:

• Maajabu ya Asili: Tanzania ikiwa na vivutio vitatu kati ya Maajabu Saba ya Asili ya Afrika.

• Urithi wa Dunia (UNESCO): Maeneo saba ikiwemo Mlima Kilimanjaro, Hifadhi ya Serengeti (uhamaji wa wanyamapori), na Bonde la Ngorongoro.

• Utamaduni na Historia: Utajiri wa makabila 126, michoro ya kale ya Kondoa, Mji Mkongwe wa Zanzibar, pamoja na miji ya kihistoria ya Bagamoyo na Kilwa.

Ushirikiano na Wadau wa Kimataifa

Balozi wa Tanzania nchini Sweden, Mhe. Mobhare Matinyi (kulia) pamoja na Afisa Ubalozi Abel Maganya, wakizungumza na Bw. Peter Hallgren wa kampuni ya Flygresor ya Sweden kwenye banda la Tanzania.

Katika kuimarisha diplomasia ya uchumi na utalii, Balozi Matinyi alifanya mazungumzo ya kimkakati na viongozi wa kampuni kubwa za usafiri na utalii kutoka Denmark, Sweden, na Finland. Miongoni mwa wadau hao ni:

• Karin Gert Nielsen (CEO wa Atlantic Link) na Johnny Frandsen (Danish Travel Show).

• Peter Hallgren (Meneja wa Flygresor, Sweden).

• Wakurugenzi wa kampuni za Finland kama Jyrki Nilson (GapEdu) na Juha Valtanen (Amanihoiva Limited).

Ushiriki wa Wadau wa Ndani

Balozi wa Tanzania nchini Sweden, Mhe. Mobhare Matinyi, akizungumza na Mkurugenzi Mwendeshaji wa kampuni ya GapEdu ya Finland, Bw. Jyrki Nilson, kwenye banda la Tanzania 

Ubalozi wa Tanzania nchini Sweden umeratibu ushiriki huu kwa kushirikiana na kampuni binafsi za kitanzania za Lifestyle Safaris & Holidays na Lifetime Safaris. Tanzania inaungana na nchi zingine za Afrika kama Kenya, Uganda, Afrika Kusini, na Misri katika kuwania soko la watalii 56,000 waliojitokeza tangu siku ya kwanza ya maonesho hayo.

Maonesho ya Matka yanajumuisha zaidi ya kampuni 950 za utalii na usafiri wa ndege kutoka duniani kote, yakiweka msingi imara wa kuongeza idadi ya watalii kutoka ukanda wa nchi za Nordic kwenda Tanzania.