DUNIA NA MAREKANI HUKO IRAN NI MWANA KULITAFUTA MWANA KULIPATA

KUNA dalili zote kuwa Marekani inajipanga kutoa pigo jingine dhidi ya Iran. Katika kipindi cha saa chache zilizopita, Rais wa Marekani, Dona...

KUNA dalili zote kuwa Marekani inajipanga kutoa pigo jingine dhidi ya Iran. Katika kipindi cha saa chache zilizopita, Rais wa Marekani, Donald Trump, ametoa ujumbe mzito kwa raia wa Iran wanaopinga utawala wa nchi hiyo akiahidi kuwa msaada unakuja, huku harakati za kijeshi zikiongezeka kwa kasi ya ajabu katika eneo hilo.

Ulimwengu unajiuliza ikiwa Marekani, inajiandaa kuishambulia tena Iran baada ya operesheni ya "Midnight Hammer" iliyofanyika Juni mwaka jana,nini sasa anataka katika taifa hilo lenye utajiri wa mafuta na mahusiano mazuri na mataifa yha Mashariki.

Mwaka jana katika shambulio lililolenga vituo vya nyuklia, Marekani ilitumia zaidi ya ndege mia moja, zikiwemo ndege za  B-2 ambazo ziliruka safari ndefu kutokea Marekani kwenda kudondosha mabomu mazito yenye uwezo wa kupenya ardhini na kubomoa mahandaki ya kijeshi.

Kauli za Rais Trump katika mitandao ya kijamii zimeongeza hofu ya kuanza kwa mapigano mapya. Trump ameionya Iran kuwa kama haitakubali kufanya makubaliano ya kudhibiti mpango wake wa nyuklia, basi shambulio linalokuja litakuwa baya zaidi kuliko yaliyopita. 

Kiongozi huyo amekwenda mbali zaidi kwa kusema kuwa kundi kubwa la meli za kivita liko njiani kuelekea nchini humo, likiwa na uwezo wa kutekeleza majukumu yake kwa kasi na nguvu kubwa kama ilivyoshuhudiwa nchini Venezuela.

Uchunguzi wa vyanzo vya habari vya kijasusi unaonyesha kuwa Marekani tayari ina askari wapatao elfu hamsini katika kanda hiyo, huku vituo vikuu vikiwa Qatar, Jordan, Saudi Arabia na nchi nyingine za Ghuba. 

Picha za satelaiti zilizopigwa hivi karibuni katika kambi kubwa ya anga ya al-Udeid nchini Qatar zinaonyesha kuanza kwa ujenzi wa miundo mipya, jambo ambalo wataalamu wanasema ni ufungaji wa mifumo ya kisasa ya kuzuia makombora ili kujikinga na mashambulizi ya kulipiza kisasi kutoka  Iran.

Mbali na ndege za kivita aina ya F-15 na ndege za upelelezi ambazo zimekuwa zikionekana zikizunguka karibu na anga la Iran, Uingereza nayo imetuma ndege zake za kivita aina ya Typhoon ili kuongeza nguvu ya ulinzi katika ukanda huo. 

Wachambuzi wa masuala ya kijeshi wanasema kuwa kuwasili kwa ndege za upelelezi na zile za kuongoza mashambulizi ni ishara tosha kuwa operesheni ya kijeshi inaweza kutokea muda wowote kuanzia sasa.

Wakati Marekani ikiendelea kufanya mazoezi makubwa ya kijeshi yanayojulikana kama "Operation Agile Spartan" ili kuonyesha uwezo wake wa kutawanya nguvu za anga, ujumbe wa Trump unabaki kuwa mmoja tu: muda unakwisha. Huku kundi la meli za kivita likikaribia pwani ya Iran, swali si tena kama Marekani ina uwezo wa kushambulia, bali ni lini amri ya mwisho itatolewa kuanzisha kile kinachotajwa kuwa shambulio lenye nguvu na vurugu zaidi kuwahi kutokea.