HATARI: JESHI LA MAJI LA UINGEREZA LAPOTEZA UTUKUFU WAKE

Jeshi la Maji la Uingereza (Royal Navy), ambalo kwa karne nyingi limekuwa nembo ya nguvu na usalama wa bahari duniani, hivi sasa limetumbuki...

Jeshi la Maji la Uingereza (Royal Navy), ambalo kwa karne nyingi limekuwa nembo ya nguvu na usalama wa bahari duniani, hivi sasa limetumbukia katika hali ya sintofahamu na hatari baada ya kuishiwa kabisa na maafisa wenye cheo cha juu cha jemedali wa jeshi la maji (Full Admiral). 

Kustaafu kwa Admiral, Sir Keith Blount mapema wiki hii, kumeacha pengo kubwa ambalo halijawahi kutokea katika historia ya jeshi hilo kwa takriban miaka 500. Hali ya kukosekana kwa mtyu mwingine wa ngazi yake kumezua hofu kubwa miongoni mwa wataalamu wa kijeshi ambao wameonya kuwa jeshi hilo sasa lipo katika hali mahututi na huenda likawa linaelekea ukingoni mwa kupotea kabisa.

Gazeti la daily Mail  limeandika kwamba hii ni mara ya kwanza tangu kuanzishwa kwa jeshi hilo na Mfalme Henry wa Nane mwaka 1546 ambapo hakuna ofisa mwenye cheo hicho cha nyota nne, hali inayotajwa kuwa ni kielelezo cha kudorora kwa hadhi ya Uingereza kijeshi. 

Rekodi za kihistoria zinaonyesha kuwa cheo cha Admiral kimekuwepo hata kabla ya jeshi hilo kurasimishwa, kikiwa na mizizi tangu mwaka 1297. Katika kipindi cha Vita Kuu ya Pili ya Dunia, jeshi hilo lilikuwa na Maadmiral 38, idadi inayolinganishwa kwa mshangao na hali ya sasa ambapo hakuna hata mmoja aliyebaki kuongoza jahazi hilo ambalo linaonekana kuzama.

Aliyekuwa mkuu wa jeshi hilo zamani, Admiral Lord West, ameelezea kusikitishwa kwake na hali hiyo akisema kuwa kupotea kwa viongozi hao wa juu ni tafsiri ya wazi ya hali mbaya iliyopo ndani ya jeshi. Ameonya kuwa ikiwa serikali itaendelea kupunguza bajeti na idadi ya askari wa majini, basi jeshi hilo litakosa sifa ya kuwa na kiongozi wa ngazi hiyo. Ameitaka serikali kuchukua hatua za haraka kuwekeza kwenye ulinzi na kuimarisha jeshi hilo kabla halijatoweka kabisa kwenye ramani ya nguvu za kijeshi duniani.

Hofu zaidi imeongezeka baada ya nafasi ya Sir Keith Blount ndani ya umoja wa kijeshi wa NATO kuchukuliwa na ofisa kutoka Jeshi la Anga (RAF), jambo ambalo ni nadra kutokea na linaonyesha jinsi Jeshi la Maji linavyopoteza ushawishi wake. 

Hata hivyo, baadhi ya viongozi wastaafu kama Sir Chris Parry wametoa mtazamo tofauti wakisema kuwa uwezo na weledi wa kiongozi ni muhimu zaidi kuliko cheo chake, huku wakisisitiza kuwa ni bora kuwa na kamanda shupavu kuliko kuwa na Admiral asiyekuwa na sifa.

Wakati kukiwa na malalamiko hayo, Wizara ya Ulinzi ya Uingereza imejitetea ikisema kuwa jeshi hilo bado linaongozwa na viongozi wenye uzoefu mkubwa na kwamba kuna uwekezaji mkubwa unaofanyika katika ujenzi wa meli mpya 13 za kisasa. 

Licha ya utetezi huo, ukweli unabaki kuwa meli za kivita za Uingereza kwa sasa ni chache zaidi kuliko wakati mwingine wowote katika historia, jambo linaloacha swali kubwa kama kweli Uingereza itaweza kurejesha utukufu wake wa zamani wa kutawala mawimbi ya bahari ama ndiyo mwisho wa enzi za jeshi hilo maarufu.

CHANZO: DAILY MAIL