MASAUNI:MAADHIMISHO YA MUUNGANO 2025 KUFANYIKA KIMIKOA

  Waziri wa Nchi Ofisi ya Makamu wa Rais (Muungano na Mazingira) Mhe. Mhandisi Hamad Yussuf Masauni amesema Maadhimisho ya miaka 61 ya Muung...

 

Waziri wa Nchi Ofisi ya Makamu wa Rais (Muungano na Mazingira) Mhe. Mhandisi

Hamad Yussuf Masauni amesema Maadhimisho ya miaka 61 ya Muungano wa

Tanganyika na Zanzibar mwaka huu yatafanyika Kimikoa ambapo kilele chake kitakuwa

Aprili 26, 2025.

Amesema tangu kuasisiwa kwa Muungano kumekuwa na mafanikio makubwa katika

nyanja za kisiasa, kiuchumi na kijamii na umeendelea kuwa moja kati ya vielelezo vikuu

vya Umoja, Udugu na Utaifa wetu kama Watanzania na kumeweza kunufaika na kukuza

uhusiano baina ya nchi yetu na Jumuiya ya Kimataifa kwa manufaa ya pande zote za

Muungano.

Ameyasema hayo wakati wa kongamano kuelekea Miaka 61 ya Jamhuri ya Muungano

wa Tanzania lililofanyika Aprili 22, 2025 jijini Dar es Salaam ambapo kaulimbiu ya

mwaka huu ni ‘Miaka 61 ya Jamhuri ya Muungano wa Tanzania: Muungano wetu ni

dhamana, Heshima na Tunu ya Taifa: Shiriki Uchaguzi Mkuu wa Mwaka 2025’’.

“Muungano huu ni wa watu, hivyo ni Muungano unaoishi ili kutimiza matakwa na

malengo ya wananchi wake. Ni kwa sababu hiyo basi, licha ya mafanikio mengi

yaliyopatikana, zimekuwepo pia changamoto mbalimbali ambazo zimekuwa zikijitokeza

kwa nyakati tofauti na kupatiwa ufumbuzi kwa lengo la kuuimarisha Muungano wetu.”

“Sehemu kubwa ya Watanzania ambao ni vijana kwa mujibu wa Sensa ya Taifa ya Watu

na Makazi ya mwaka 2022, hawana uelewa wa kutosha kuhusu Muungano ikiwemo

Viongozi. Ni kwa kutambua changamoto hiyo, ndiyo maana jitihada zinafanyika ili

kukuza uelewa na ufahamu wa historia na matukio muhimu ya Taifa letu.” Amesema

Waziri Masauni.

Aprili 26, 1964, Jamhuri ya Tanganyika chini ya uongozi wa Hayati Baba wa Taifa

Mwalimu Julius Kambarage Nyerere na Jamhuri ya Watu wa Zanzibar chini ya uongozi

wa Hayati Sheikh Abeid Amani Karume, ziliafikiana kwa mkataba kuunganisha nchi hizi

mbili huru kuwa nchi moja inayoitwa Jamhuri ya Muungano wa Tanzania.

“Kwa namna na umuhimu wa kipekee, natoa pongezi kwa Viongozi wetu Mheshimiwa

Dkt. Samia Suluhu Hassan, Rais wa Jamhuri ya Muungano wa Tanzania na

Mheshimiwa Dkt. Hussein Ali Mwinyi, Rais wa Zanzibar na Mwenyekiti wa Baraza la

Mapinduzi, kuweka suala la kuimarisha Muungano kuwa ni moja ya vipaumbele na

kuendelea kudumisha Muungano wetu.

Kwa upande wake, Naibu Katibu Mkuu (Muungano) Ofisi ya Makamu wa Rais Bw.

Abdallah Mitawi amesema Aprili 22, 1964 ndio siku ambayo hati ya Muungano ilisainiwa

katika Ikulu ya Zanzibar na aliyekuwa Rais wa Tanganyika Hayati Mwl. Julius

Kambarage Nyerere na aliyekuwa Rais wa Zanzibar, Hayati Sheikh Abeid Amman

Karume.

Ameongeza kuwa mazungumzo ya kufanikisha hayo yote yalikuwa ya siri kubwa

kutokana na umuhimu wa tukio hilo na kwa kipindi hicho Zanzibar ilikuwa na watu

wanaokadiliwa kuwa 300,000 na Tanganyika kuwa na watu milioni 12.

Aprili 25, 1964 ndio siku ambayo hati ililidhiwa ambapo kwa Zanzibar ililidhiwa na

Baraza la Mapinduzi na Bara ililidhiwa na Bunge la Tanganyika na kusainiwa na Mwl

Nyerere Aprili 26, 1964 ndio maana hadi leo Aprili 26 taifa huadhimisha miaka kadhaa

ya Muungano wa Tanganyika na Zanzibar na Aprili 27, 1964 likawa Bunge la mwanzo la

Jamhuri ya Muungano wa Tanzania.