CHAN HII HAPA! Ni Taifa Stars na Burkina Faso: Usiku wa kisu kikali, burudani ndefu

Na Mwandishi wetu, BSKY Media Funga mkanda, piga goti, na utulie! Ulimwengu wa soka la Afrika unakodoa macho yake yote jijini Dar es Salaam ...

Na Mwandishi wetu, BSKY Media

Funga mkanda, piga goti, na utulie! Ulimwengu wa soka la Afrika unakodoa macho yake yote jijini Dar es Salaam leo Agosti 2, 2025, kwa ajili ya uzinduzi wa mashindano makubwa kabisa barani, Mashindano ya Mataifa ya Afrika kwa Wachezaji wa Ndani (CHAN).

Ndio,leo, Agosti 2, 2025,usiku wa saa mbili, Tanzania inaandika historia mpya. Kwa mara ya kwanza tangu ipate uhuru wake mwaka 1961, taifa hili linashuhudia ufunguzi wa mashindano haya makubwa ya kimataifa.

Huu si tu mchezo, bali ni sherehe ya utamaduni, urembo, na uzalendo. Uwanja wa Benjamin Mkapa unatarajiwa kuwaka moto kwa shamrashamra, burudani kabla ya mechi, na kisha burudani kubwa kabisa: mchezo wa ufunguzi kati ya wenyeji wa nyumbani, Taifa Stars, na timu ya nguvu kutoka Afrika Magharibi, Burkina Faso. Huku Waziri Mkuu, Mhe. Kassim Majaliwa, akitarajiwa kuwa mgeni rasmi, ni wazi kwamba heshima na uzito wa tukio hili haupimiki.

Kwa namna yoyote ile kwa tafsiri yoyote ile, pambano la ufunguzi kati ya wenyeji, Taifa Stars, na timu ya kutegemewa kutoka Afrika Magharibi, Burkina Faso litakuwa la kihistoria.

Kocha wa Taifa Stars atamba, Burkinabé wajipanga kutoa mateso

Kocha Mkuu wa Taifa Stars, Hemed Suleiman 'Morocco', amejawa na matumaini na anasisitiza umuhimu wa msaada wa nyumbani. 

Ameshawahi kusikika akisema:"Tumejiandaa vilivyo kwa ajili ya CHAN 2025. Kucheza nyumbani, mbele ya mashabiki wetu wenye shauku, bila shaka kutatupa nguvu ya ziada," 

Pia jana akizungumza na waandishi wa habari alisisitiza kuwa malengo yao makubwa ni kushinda CHAN na kubakisha taji hilo nyumbani.

Ukiangalia kauli za Kocha na viongozi wengine wa kitaifa unaona kwamba mchezo huu si wa kawaida, na malengo yamewekwa wazi. 

Rais Samia Suluhu Hassan amewaomba wachezaji wa Taifa Stars kuhakikisha kombe la CHAN linabaki nyumbani. Alisema hayo katika uzinduzi wa Kituo cha Biashara na Uwekezaji Afrika Mashariki, Rais Samia alisema ana imani kubwa na wachezaji hao. 

"Kama alivyotangaza Profesa Kabudi, mcheza kwao hutunzwa, hivyo basi kombe likibaki hapa kuna tunzo yenu kutoka kwa mama yenu," alisema Rais Samia, akithibitisha zawadi ya bilioni moja iliyotangazwa hapo awali.

Kwa upande mwingine, kocha wa Burkina Faso, Issa Balboné, hajataka kubaki nyuma. Amesisitiza kwamba timu yake imejifunza kutokana na makosa ya mashindano yaliyopita na wamekuja na dhamira mpya. 

"Tumejifunza kutokana na makosa ya mashindano yaliyopita. Tulirekebisha makosa yetu na azma yetu ni wazi: kupita hatua ya makundi safari hii," alisema Balboné kwa ujasiri. Mchezaji wao wa ulinzi, Patrick Malo, aliongeza, "Tunabeba jukumu la ligi yetu na nchi. Hii ni fursa yetu kuonesha ubora wa soka la Burkina Faso. Tuko tayari kupambana."

Hata hivyo Historia inatoa hamasa kwa Taifa Stars ya kutembea kifua mbele! Taifa Stars na Burkina Faso wamekutana mara mbili katika historia, zote kwenye mechi za kufuzu AFCON mwaka 2006 na 2007. Habari njema ni kwamba Taifa Stars iliibuka kidedea katika mechi zote mbili: 2-1 nyumbani na 1-0 ugenini. Historia hii ni chachu ya kujiamini kwa vijana wetu.

TRC Yatoa Treni Mchongoko, Rodney Ahimiza Hamasa

Katika kuongeza hamasa, Serikali kupitia Shirika la Reli Tanzania (TRC) imeweka mikakati thabiti ya kurahisisha usafiri. Kulingana na Katibu Mkuu wa Wizara ya Habari, Utamaduni, Sanaa na Michezo, Ndg. Gerson Msigwa, kutakuwa na treni maalum ya SGR Mchongoko itakayosafirisha mashabiki kutoka Dodoma hadi Dar es Salaam mchana wa leo, ikiwarahisishia wakazi wa Dodoma na mikoa jirani kufika Dar es Salaam kushuhudia mchezo na burudani.

Kaimu Mkurugenzi wa Idara ya Habari, Rodney Thadeus, ametoa wito kwa Watanzania kujitokeza kwa wingi. Amesema bei za viingilio ni rafiki kwa kila mtu: VVIP shilingi 10,000, VIP B shilingi 5,000, na Mzunguko shilingi 2,000. Zaidi ya mpira, kutakuwa na burudani ya muziki wa Singeli na kuwapa wafanyabiashara fursa ya kuchangamkia biashara mbalimbali ili kusaidia pato la nchi.

Hakuna shaka, leo si siku ya kukaa nyumbani. Soka ni zaidi ya mchezo, ni utamaduni wetu. Jitokeze, vaa jezi, na tuipe timu yetu nguvu ya kishabiki!