Mustafa Hassanali kuwakilisha Tanzania Mkutano wa Kimataifa wa BRICS+ Kuhusu Mitindo

Na Mwandishi Wetu Mbunifu wa mitindo, mjasiriamali wa utamaduni, na Mwanzilishi na Mkurugenzi Mtendaji wa Swahili Fashion Week , Mustafa Has...

Na Mwandishi Wetu

Mbunifu wa mitindo, mjasiriamali wa utamaduni, na Mwanzilishi na Mkurugenzi Mtendaji wa Swahili Fashion Week , Mustafa Hassanali  yuko nchini Russia akiiwakilisha Tanzania katika Mkutano wa Kimataifa wa Mitindo,( BRICS+ Fashion Summit) .

Mkutano huu wa BRICS+ Fashion Summit unaoanza kesho Agosti 28 hadi 30 ni mojawapo ya mikutano muhimu zaidi ulimwenguni katika kuunda mustakabali wa bunifu mbalimbali za mitindo duniani. 

Mkutano huo unakutanisha viongozi wa taasisi mbalimbali za mitindo, makampuni ya nguo na viwanda, watunga sera, wataalam wa tasnia, wabunifu, na wanunuzi kutoka zaidi ya nchi 60.

Ushiriki wa Mustafa Hassanali unasisitiza ahadi ya Tanzania katika kuinua ubunifu wa Kiafrika, diplomasia ya kitamaduni, na uongozi wa sekta binafsi kwenye jukwaa la kimataifa.

Hassanali uwepo wake ni kuwakilisha mitindo yetu

Kwa miaka mitatu mfululizo, Mkutano huo umekuwa ndio jukwaa kwa tasnia za mitindo zinazochipukia kutoka nchi zaidi ya 90, ukikuza ushirikiano wa kimataifa na fursa za biashara. 

Ukiwakutanisha  wadau kutoka nchi mathalani Brazil, Ecuador, Falme za Kiarabu (UAE), Indonesia, Afrika Kusini, India, China, na kwingineko, umekuwa kitovu cha diplomasia ya kitamaduni na uchumi wa ubunifu. 

Aidha kuzidi kukua Jiji la Moscow kama kitovu cha mitindo duniani kunafanya Jiji hilo kuwa sehemu bora kabisa kwa mazungumzo kuhusu mitindo na uchumi wake.

Kwa mujibu wa maelezo ya Mustafa Hassanali,Mwaka huu, Mkutano utajikita katika masuala ya uendelevu (sustainability), ubunifu na uvumbuaji (Creativity and innovation), elimu ya kitaaluma, biashara ya kimataifa, na changamoto zinazokabili mataifa ya BRICS+ na dunia kwa ujumla katika fasheni na ubunifu.

“Mkutano wa BRICS+ Fashion Summit ni zaidi ya maonesho ya mitindo tu—ni jukwaa la mazungumzo, ushawishi, na mabadiliko. Unayapa mataifa yanayochipukia kama Tanzania fursa ya kuchangia katika kuunda uchumi wa ubunifu wa dunia, huku pia ukikuza biashara, uwekezaji, na ushirikiano wa kitamaduni,” alisema Mustafa Hassanali.

Mustafa Hassanali mwenye uzoefu wa zaidi ya miongo miwili katika kuendeleza mitindo na tasnia za ubunifu barani Afrika, anaheshimika sio tu kama mbunifu, bali pia kama mwasisi wa Swahili Fashion Week, mojawapo ya majukwaa makubwa ya mitindo barani Afrika.

Kutokana na kuwepo kwa jukwaa hili kumefanya Tanzania kuwa kitovu cha mitindo Afrika Mashariki. Zaidi ya kufanya shughuli za mitindo, Hassanali pia ni Mwenyekiti wa Chama cha Mitindo Tanzania (Fashion Association of Tanzania) na Mjumbe wa Bodi ya Shirikisho la Sekta Binafsi Tanzania (TPSF), akichangia kikamilifu katika ushirikishwaji wa sekta binafsi, biashara, uwekezaji, na ubadilishanaji wa kitamaduni.

Sanjari na Mkutano huo, kutakuwa na Wiki ya Mitindo ya Moscow (Agosti 28 – Septemba 2, 2025) itawahusisha wabunifu kutoka Russia pamoja na chapa kutoka nchi 10, ikiwemo Brazil, Afrika Kusini, China, India, na Uhispania.