Kizunguzungu cha aina yake kesi ya Diddy,aomba ifutwe au isikilizwe upya

Na Mwandishi Wetu, Mtayarishaji maarufu wa muziki nchini Marekani, Sean "Diddy" Combs, pamoja na timu yake ya wanasheria, walireje...

Na Mwandishi Wetu,

Mtayarishaji maarufu wa muziki nchini Marekani, Sean "Diddy" Combs, pamoja na timu yake ya wanasheria, walirejea mahakamani Alhamisi kumuomba jaji atengue hukumu yake ya mashtaka ya ukahaba au atoe amri ya kesi mpya. 

Hata hivyo Jaji Arun Subramanian aliahirisha kusikilizwa kwa kesi hiyo na hakutoa uamuzi wa haraka kuhusu ombi la upande wa utetezi.

Diddy, ambaye alikamatwa Septemba mwaka jana, amekuwa mahabusu tangu wakati huo. Mwezi Julai, alihukumiwa kwa makosa mawili ya ukahaba. 

Wanasheria wake wanadai kuwa hukumu hiyo ilitumia vibaya Sheria ya Mann, sheria ya serikali kuu iliyopitishwa mwaka 1910 kupambana na biashara haramu ya binadamu na unyonyaji wa kingono dhidi ya wanawake. Wanasheria hao wanasema kwa kuitumia sheria hiyo katika kesi ya Diddy imekuwa si sahihi

Hukumu na Adhabu Inayopendekezwa

Diddy, mwenye umri wa miaka 55, anatarajiwa kutangaziwa hukumu yake Oktoba 3. Kila shtaka la ukahaba linaweza kumsababishia kifungo cha hadi miaka 10 jela. Hata hivyo, timu yake ya wanasheria inapendekeza apewe kifungo kisichozidi miezi 14, wakisema kwa vile amekaa mahabusu tangu Septemba 2024, atakuwa tayari ametumikia sehemu kubwa ya kifungo hicho.

Upande wa mashtaka, hata hivyo, unatafuta kifungo cha miaka kadhaa zaidi. 

Wanasheria wa Diddy wamesema mashtaka hayo "yamepoteza mwelekeo" kwa kudai adhabu kubwa isiyolingana na makosa. Katika hati za mahakama, wamesema kwamba Diddy ameumizwa vya kutosha na "maisha yake nje ya gereza yamebomolewa kabisa."

"Hadhi ya Bw. Combs kama nyota katika nyanja za muziki, mitindo, vinywaji, vyombo vya habari, na fedha imesambaratishwa na urithi wake umeharibiwa," walisema wanasheria wake. Waliongeza kuwa watoto wake saba "wanasubiri kwa hamu kubwa kurejea kwake katika maisha yao."

Maelezo ya Kesi na Utetezi

Katika kesi hiyo ya Alhamisi, mwanasheria wa utetezi, Alexandra Shapiro, alimuelezea Diddy kama mtu aliyependa kutazama picha au video chafu za mapenzi za watu wasio wataalamu, lakini "hakuwa na lengo la kibiashara." Jaji aliuliza mara kadhaa jinsi hoja hiyo inavyohusiana na mashtaka ya Sheria ya Mann ya kusafirisha watu kwa ajili ya ukahaba.

Diddy alihukumiwa kwa makosa mawili madogo ya kupanga usafiri wa watu kati ya majimbo kwa ajili ya kujihusisha na ukahaba. Hata hivyo, mwezi Julai, aliondolewa mashtaka makubwa zaidi ya kupanga njama za uhalifu na biashara ya ngono yanayohusiana na aliyekuwa mpenzi wake Casandra Ventura na mwanamke mwingine.

Upande wa mashtaka ulisema wakati wa kesi kwamba Diddy alipanga mikutano ya kingono iliyolipwa kati ya watoa huduma za ngono wa kiume na wapenzi wake wa kike, ambao baadhi yao walitoa ushahidi wakisema walipigwa, walipigwa mateke, na kukabwa shingo na yeye. Msanii huyo alikana mashtaka yote yaliyotolewa dhidi yake, na jaji amekataa mara mbili kumpa dhamana.

CHANZO:BBC