KARDINALI PENGO AFARIKI DUNIA JKCI, RAIS SAMIA AMLILIA

TANZANIA imegubikwa na huzuni kufuatia kifo cha Askofu Mkuu Mstaafu wa Jimbo Kuu la Dar es Salaam, Mwadhama Kardinali Polycarp Pengo, aliyef...

TANZANIA imegubikwa na huzuni kufuatia kifo cha Askofu Mkuu Mstaafu wa Jimbo Kuu la Dar es Salaam, Mwadhama Kardinali Polycarp Pengo, aliyefariki dunia usiku wa kuamkia leo Februari 19, 2026, katika Taasisi ya Moyo ya Jakaya Kikwete (JKCI).

Taarifa ya kifo cha nguli huyo wa imani imetolewa na Askofu Mkuu wa Jimbo Kuu la Dar es Salaam, Yuda Thadeus Ruwa’ichi (OFM Cap), aliyeeleza kuwa Kardinali Pengo alifikwa na umauti majira ya saa nne usiku wakati akipatiwa matibabu. Kardinali Pengo anafariki akiwa na umri wa miaka 81.

Rais Samia Atuma Salamu za Rambirambi

Rais wa Jamhuri ya Muungano wa Tanzania, Mhe. Dkt. Samia Suluhu Hassan, ameeleza kushtushwa na kifo hicho akimtaja Kardinali Pengo kama kiongozi mzalendo, mnyenyekevu, na aliyesimama kidete kulinda amani na utulivu wa nchi.

"Tumepoteza mhimili wa kiroho na kiongozi aliyeamini katika umoja wa Watanzania bila kujali tofauti zao za kidini. Maisha yake yamekuwa darasa la uzalendo na uadilifu," ilieleza sehemu ya salamu za Rais.

Historia ya Maisha: Kutoka Sumbawanga hadi Ukadinali

Kardinali Polycarp Pengo alizaliwa Agosti 5, 1944, mkoani Rukwa. Alipewa daraja la upadri mwaka 1971 na baadaye akajipatia Shahada ya Uzamivu (Doctorate) katika Teolojia ya Maadili huko Roma, Italia, mwaka 1977.

Kipaji chake cha uongozi kilionekana mapema ambapo mwaka 1983 aliteuliwa kuwa Askofu wa Nachingwea (sasa Lindi) na baadaye Tunduru-Masasi. Mwaka 1992, alichukua kijiti cha kuwa Askofu Mkuu wa Dar es Salaam kutoka kwa Kardinali wa kwanza nchini, Laurean Rugambwa. Mnamo Februari 21, 1998, Papa Yohane Paulo II alimfanya kuwa Kardinali, nafasi iliyomfanya kuwa mshauri wa karibu wa Papa na mshiriki katika kura za kuwachagua Mapapa wawili (Benedikto XVI na Fransisko).

Mwandishi Beda Msimbe akiwa na Mwadhama Kardinali Polycarp Pengo, St. Joseph Dar es Salaam. Mazungumzo kuhusu Kanisa, Maadili, na Siasa za Tanzania. Alama ya msimamo na utumishi uliotukuka

Msimamo wa Chuma: Vita dhidi ya 'Wanamaombi' na Hostia

Kardinali Pengo atakumbukwa kwa msimamo wake usioyumba katika kulinda taratibu za Kanisa Katoliki. Moja ya matukio yaliyotikisa uongozi wake ni mgogoro na kundi la "Wanamaombi" ndani ya Kanisa.

Kardinali Pengo alipiga marufuku waumini kupokea Hostia Takatifu kwa kupiga magoti, akitaka utaratibu wa Kanisa wa kusimama ufuatwe ili kuleta umoja na nidhamu ya kiliturujia. Msimamo huo ulizua mivutano mikubwa iliyopelekea kundi hilo kumfikisha Kardinali mahakamani, wakidai unyanyasaji na kupigwa makanisani wakati wakijaribu kupiga magoti. Hata hivyo, Pengo hakurudi nyuma, akisisitiza kuwa nidhamu ya Kanisa ni lazima iheshimiwe.

Alichokisimamia: Maadili na Ukweli

Katika enzi za uhai wake, Kardinali Pengo hakupepesa macho katika masuala ya kijamii:

Ushoga: Mwaka 2000, alilaani vikali vitendo vya ushoga akivitaja kuwa ni "dhambi mbaya na ya kutisha kuliko zote duniani."

Mapambano dhidi ya UKIMWI: Alipinga matumizi ya kondomu kama suluhisho la pekee, badala yake alisisitiza uaminifu na maadili ya kijinsia kama njia sahihi ya kidini ya kutokomeza janga hilo.

Amani ya Kidini: Mwaka 2004, alikemea vikali migogoro iliyokuwa inachochewa kwa kivuli cha dini, akisisitiza kuwa Mungu hawezi kuhubiri machafuko.

Safari ya Mwisho

Baada ya kustaafu Agosti 15, 2019, Kardinali Pengo aliendelea kuishi maisha ya sala na ushauri hadi mauti yalipomkuta katika hospitali ya JKCI. Kanisa Katoliki na Tanzania kwa ujumla imepoteza kiongozi ambaye hakuwahi kuogopa kusema ukweli hata kama ulikuwa mchungu kwa baadhi ya makundi.

TEC inatarajiwa kutoa ratiba ya mazishi baada ya vikao vya ndani vya Maaskofu kukamilika. Mungu ailaze roho ya marehemu Kardinali Polycarp Pengo mahali pema peponi. 

Amina.