WAZIRI RIDHIWANI: SERIKALI YA AWAMU YA SITA INAJIVUNIA USHIRIKIANO WA WATUMISHI

  Na Mwandishi Wetu Waziri wa Nchi, Ofisi ya Waziri Mkuu, Kazi, Vijana, Ajira na Wenye Ulemavu, Mheshimiwa Ridhiwani Kikwete, ameipongeza Me...

 

Na Mwandishi Wetu

Waziri wa Nchi, Ofisi ya Waziri Mkuu, Kazi, Vijana, Ajira na Wenye Ulemavu, Mheshimiwa Ridhiwani Kikwete, ameipongeza Menejimenti na watumishi wa ofisi yake kwa ushirikiano wao imara. Amesema ushirikiano huu umechangia pakubwa katika mafanikio ya Serikali ya Awamu ya Sita, hususan katika sekta za Kazi, Vijana, Ajira, Watu Wenye Ulemavu na Kinga ya Jamii.

Akizungumza kwenye mkutano na watumishi wa ofisi hiyo leo, Agosti 21, 2025, Mhe. Ridhiwani alilenga kuwashukuru na kuwapongeza kwa utendaji wao wenye ufanisi na tija wakati wote alioongoza ofisi hiyo.

Waziri Kikwete alifafanua kwamba ndani ya miaka minne ya uongozi wa Rais Dkt. Samia Suluhu Hassan, ofisi yake imepata mafanikio makubwa. Baadhi ya mafanikio haya ni pamoja na kupunguza kodi ya mishahara kutoka asilimia 18 hadi 9, kutoa vibali vya kazi 55,642 kwa wageni, na kufupisha muda wa utoaji vibali vya kazi kutoka miezi miwili hadi siku 14.

Mafanikio mengine muhimu ni pamoja na kutoa mikopo nafuu ya shilingi bilioni 3.2 kupitia Mfuko wa Maendeleo ya Vijana, ambapo vijana zaidi ya 164,000 wamefaidika. Aidha, serikali imezalisha ajira zaidi ya milioni 8 kupitia miradi mikubwa kama ule wa Bomba la Mafuta, Reli ya Kisasa (SGR), na Bwawa la Nyerere. Pia, kiwango cha chini cha pensheni kimepandishwa kutoka shilingi 100,000 hadi 150,000 kwa mwezi.

Mhe. Ridhiwani aliongeza kuwa ofisi yake imewezesha Watanzania 7,907 kupata ajira nje ya nchi. Vilevile, imetoa mafunzo ya uanagenzi kwa vijana 121,526 katika sekta za kilimo, TEHAMA na ujenzi, na mafunzo ya uzoefu wa kazi kwa vijana 22,176 kupitia utarajali.

"Mafanikio haya si ya taasisi peke yake, bali ni ya kila mtumishi aliyehusika kwa namna moja au nyingine," alisisitiza Waziri Kikwete. Aliwahimiza watumishi kuongeza ubunifu, matumizi ya TEHAMA, pamoja na uwazi na uwajibikaji wa hali ya juu kwa manufaa ya taifa.

Naye Katibu Mkuu wa Ofisi hiyo, Mary Maganga, alieleza kuwa ofisi imefanikiwa kuandaa nyaraka muhimu za utendaji kazi. Miongoni mwa nyaraka hizo ni pamoja na Sera ya Taifa ya Maendeleo ya Vijana (2007) ya toleo la mwaka 2024, Sera ya Taifa ya Kinga ya Jamii ya mwaka 2023, Mpango Kazi wa Taifa wa Haki na Ustawi kwa Watu Wenye Ualbino (MTHUWWU), na Mpango Maalum wa Vifaa Saidizi (NATS).

Mwongozo na mifumo mingine iliyoandaliwa ni pamoja na Mwongozo wa Uratibu wa Vyama vya Watu Wenye Ulemavu, Mwongozo wa Majadiliano ya Serikali, Vyama vya Wafanyakazi na Vyama vya Waajiri, pamoja na mifumo ya kielektroniki kama Mfumo wa Kitaifa wa Taarifa za Soko la Ajira na Mfumo wa Uratibu wa Kinga ya Jamii.