RAIS SAMIA AZINDUA MJI WA SERIKALI MTUMBA, ASISITIZA UFANISI NA UWAJIBIKAJI SERIKALINI

Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, amewataka watumishi wa umma kuhakikisha uwekezaji wa Serikali ...

Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, amewataka watumishi wa umma kuhakikisha uwekezaji wa Serikali katika ofisi na miundombinu ya kazi unaongeza ufanisi na kuboresha huduma kwa wananchi.

Rais Dkt. Samia ameyasema hayo leo, tarehe 30 Oktoba, 2026, wakati wa hafla ya uzinduzi wa Majengo ya Ofisi za Wizara na Taasisi za Serikali, pamoja na Barabara za Lami katika Mji wa Serikali Mtumba, mkoani Dodoma, akiambatana na mgeni wake, Rais wa Jamhuri ya Angola, Mheshimiwa João Manuel Gonçalves Lourenço, aliyehitimisha ziara yake ya kitaifa nchini leo.

Aidha, amewataka watumishi wa umma kuzingatia sheria na taratibu katika utekelezaji wa majukumu yao, akisisitiza kuwa mazingira bora ya kazi yanapaswa kuendana na uwajibikaji na huduma bora.

Katika hatua nyingine, Rais Dkt. Samia ameziagiza mamlaka zinazohusika na upatikanaji wa huduma za maji, afya, nishati, elimu na barabara kuhakikisha zinakidhi mahitaji ya Jiji la Dodoma, ambako idadi ya watu na shughuli za kiuchumi zinazidi kuongezeka.

Vilevile, amehimiza ushirikiano kati ya sekta ya umma na sekta binafsi katika kuvutia uwekezaji utakaopanua huduma na kuongeza fursa za kiuchumi kwa wakazi wa Dodoma.

Rais Dkt. Samia pia amewashukuru waasisi, Marais waliomtangulia, watumishi wa Serikali na sekta binafsi kwa mchango wao katika kufanikisha ujenzi wa ofisi na miundombinu iliyopo katika Mji wa Serikali Mtumba.

Kipekee, ametambua mchango wa Rais wa Awamu ya Tano, Hayati Dkt. John Pombe Magufuli, kwa kuanza kutekeleza kwa vitendo maono ya Baba wa Taifa, Mwalimu Julius Kambarage Nyerere, ya kuhamishia shughuli za Serikali mkoani Dodoma.

Kwa kutambua urafiki wa kihistoria kati ya Tanzania na Angola, na kwa kumuenzi Rais wa kwanza na muasisi wa nchi hiyo, Hayati Dkt. António Agostinho Neto, moja ya barabara zilizopo katika Mji wa Serikali Mtumba, imepewa jina la kiongozi huyo.

Aidha, Rais Dkt. Samia na mgeni wake, Rais Lourenço, pia wametembelea eneo lililotengwa kwa ajili ya ujenzi wa Ubalozi wa Angola katika Mji wa Serikali Mtumba.

Kwa upande wake, Rais Lourenço amesema urafiki wa kihistoria kati ya Tanzania na Angola unapaswa kuzaa fursa za biashara, ajira na uwekezaji kwa wananchi.

"Kazi tuliyonayo kwa sasa ni kugeuza makubaliano tuliyoafikiana kuwa miradi inayotekelezeka, fursa za biashara na manufaa kwa wananchi wetu," amesema Rais Lourenço.

Ametaja uchimbaji na uchakataji wa madini, kilimo na viwanda vya kusindika mazao kuwa maeneo ambayo Tanzania na Angola zinaweza kupanua uwekezaji, kuongeza uzalishaji na kutengeneza ajira kwa wananchi.

Akiwasilisha salamu za Rais wa Zanzibar na Mwenyekiti wa Baraza la Mapinduzi, Mheshimiwa Dkt. Hussein Ali Mwinyi, Makamu wa Pili wa Rais wa Zanzibar, Mhe. Hemed Suleiman Abdulla, amempongeza Rais Dkt. Samia kwa kukamilisha na kuzindua Majengo ya Ofisi za Wizara na Taasisi za Serikali, pamoja na Barabara za Lami katika Mji wa Serikali Mtumba.

Amesema amani na utulivu uliopo nchini vimewezesha kukamilika kwa mradi huo, pamoja na utekelezaji wa shughuli nyingine za maendeleo.

Kwa niaba ya wananchi wa Zanzibar, ameahidi kuendeleza ushirikiano kati ya Serikali ya Mapinduzi ya Zanzibar na Serikali ya Jamhuri ya Muungano wa Tanzania katika kuwaletea wananchi maendeleo.

"Tunakushukuru, tunakupongeza na tunakuahidi mashirikiano yaliyotukuka," amesema.