labda hii itasaidia kupunguza makali ya umeme

Benki ya Uwekezaji ya Ulaya (EIB) imekubali kuipatia Tanzania mkopo wa dola za kimarekani 135 milioni kwa ajili ya mradi wa kujenga njia ya ...

Benki ya Uwekezaji ya Ulaya (EIB) imekubali kuipatia Tanzania mkopo wa dola za kimarekani 135 milioni kwa ajili ya mradi wa kujenga njia ya kilometa 667 ya umeme wa mkondo mkubwa unaotekelezwa na shirika la umeme nchini (TANESCO) kati ya mikoa ya Iringa na Shinyanga.
Mkataba rasmi wa kugharamia mradi huo ulisainiwa Dar es Salaam kati ya Bw. Ramadhani M. Khijjah Katibu Mkuu Wizara ya Fedha na Masuala ya Uchumi, Mkurugenzi Mkuu wa Shirika la Umeme (TANESCO), William Mhando na Kurt Simonsen, Mkuu wa EIB Kanda ya Afrika Mashariki.
Mradi huu utaboresha usafirishwaji wa umeme kutoka katika vyanzo vya sasa na vya baadae kutoka kusini mwa nchi kwenda kaskazini. Kama kiunganinishi kikuu kwa wakati ujao kwa nchi za Zambia na Kenya mradi huu pia utaboresha ushirikiano wa kiuchumi wa kikanda na maendeleo.
"Ukuaji wa uchumi unahitaji nishati. Nishati inaleta ukuaji wa uchumi. Nishati endelevu inaleta maendeleo endelevu na ujumuishaji wa makundi yote katika jamii unaleta mshikamano…huu ni mradi mzuri kwa Tanzania," alisema Bw. Simonsen mara baada ya utiwaji saini wa mkataba wa kugharamia mradi huo.

Mradi huu mkubwa wa umeme ni sehemu ya utekelezwaji wa Mkakati wa Kuboresha Njia ya Umeme ya Taifa (National Grid) unaofanywa na TANESCO na utatoa huduma rahisi ya umeme ambayo inategemewa kukuza sekta binafsi nchini. Mradi unajumuisha ujenzi na uendeshwaji wa kilometa 667 za umeme wa 400kV AC katika njia mbili za usafirishwaji kwa nyaya za juu kati ya Iringa, Dodoma, Singida na Shinyanga. Kiungo hiki kitasafirisha umeme uliozalishwa na vyanzo vya maji kusini kwenda kaskazini mwa Tanzania ambako kwa sasa kuna maendeleo makubwa ya kiuchumi na ongezeko kubwa la mahitaji ya umeme kutokana na kuongezeka kwa shuguli za uchimbaji wa madini na viwanda. Baadae njia hii ya kusafirisha umeme itakuwa sehemu ya miundombinu itakayounganisha hifadhi kuu za nishati katika mashariki na kusini mwa Afrika.

"Nawashukuru EIB kwa kushiriki katika kugharamia mradi huu. Ushiriki wenu unaonesha kipaumbele mlichotoa kwa sekta ya nishati hapa Tanzania ambayo tunaichukulia kama 'mshipa mkuu wa damu' kwa ajili ya maendeleo ya kijamii na kiuchumi ya nchi yetu," Katibu Mkuu Ramadhani M. Khijja alisema wakati wa kutia saini kwa mkataba wa kugharamia mradi huu.

Mradi huu wa usafirishwaji wa umeme unaogharimu dola milioni 468 utagharamiwa kwa pamoja na EIB, Benki ya Dunia, Benki ya Maendeleo ya Africa, Shirika la Maendeleo ya Kimataifa la Japan, Mfuko wa Maendeleo ya Kiuchumi wa Korea na sehemu itakayobaki itagharamiwa na Serikali ya Jamhuri ya Muungano wa Tanzania.

Hafla ya utiwaji saini wa mkataba huu pia ilihudhuriwa na Balozi wa Umoja wa Ulaya Tanzania, Tim Clarke pamoja, maofisa mbali mbali wa serikali na waandishi wa habari.

Maelezo kwa Wahariri
• Benki ya Uwekezaji ya Ulaya, taasisi ya kudumu ya mikopo ya Umoja wa Ulaya, ambayo wadau wake ni nchi zote 27 wanachama wa Umoja wa Ulaya, imekuwa na miradi mingi kote Afrika kwa zaidi ya miaka 40. Shughuli za EIB zinafuata sera na malengo kama yalivyoainishwa na nchi wanachama za Umoja wa Ulaya ambazo Mawaziri wake wa fedha ni Magavana wa EIB.
• Kwa zaidi ya miaka mitano zaidi ya euro bilinoni 8.6 zimetolewa na EIB katika miradi mbali mbali kote Afrika.
Katibu Mkuu wa Wizara ya Fedha na Masuala ya Kiuchumi, Ramadhani Khijjah (kushoto), akizungumza muda mfupi baada ya mara baada ya utiwaji saini wa mkataba kati ya Serikali ya Tanzania na Benki ya Uwekezaji ya Ulaya (EIB) wa kugharamia utekelezwaji wa mradi mkuu wa kusambaza umeme Tanzania utakaogharimu dola za kimarekani 468 milioni. Anayemsikiliza ni Mwakilishi wa Benki hiyo katika Africa Mashariki na Kati, Kurt Simonsen aliyesaini kwa niaba ya EIB. Hafla fupi ya utiwaji saini wa mkataba huu ilifanyika jana (Desemba 14, 2010) katika makao makuu ya wizara hiyo yaliyopo Dar es Salaam. Picha na Emmanuel Kihaule wa Ujumbe wa Umoja wa Ulaya Tanzania.