Wazanzibari waliokimbilia Somalia warejea nyumbani

Baadhi ya Wanzania 38 waliokuwa wakimbizi Jijini Mogadishu wakielekea sehemu ya mapokezi mara baada ya kushuka katika ndege la Umoja wa Ma...

Baadhi ya Wanzania 38 waliokuwa wakimbizi Jijini
Mogadishu wakielekea sehemu ya mapokezi mara baada ya kushuka katika ndege
la Umoja wa Mataifa iliyowaleta nyumbani wakiwa na wake zao walioa nchini
Somalia baada ya kuishi huko kwa miaka 11,walikimbia vurugu za Januari
26/27 mwaka 2001

Watanzania 35 kati ya 38  waliokuwa wanaishi ukimbizini Jijini Mogadishu nchini Somalia wamewasili salama Kisiwani Pemba kuanza maisha mapya baada ya kuishi kama wakimbizi kwa miaka 12.

Afisa Msaidizi anayehusika na Ushirikishwaji Habari na Umma wa Shirika la kuhudumia wakimbizi la Umoja wa Mataifa Ofisi ya Tanzania, Austin Makani alisema Watanzania hao wamewasili Bandari ya Mkoani Mkoa wa Kusini Pemba jana saa 5.00 asubuhi wakitokea Unguja na Boti iendayo kasi ya Sea buss III.

Mjini Unguja,walifikia Hoteli ya Bwawani walikolala kwa usiku moja kabla

walipogawanywa wakaazi wa Pemba 30 walianza safari iliyowachukua hadi Chake Chake na wale wa Unguja walikabidhiwa kwa Mamlaka za Serikali.

Watanzania hao wakiwa na familia zao wengine wakiwa wameshaoa raia wa Somalia ni 35 ambao ni wakaazi wa Pemba,watano wanaishi Unguja.

Baadhi ya Watanzania waliokimbilia Mogadishu mwaka 2001
wakiwa katika Ofisi ya Uhamiaji Zanzibar jana. Wa kwanza ni Mohammed
Adam(38)  akiwa amembeba mwanawe mara baada ya kuwasili uwanja wa ndege wa
kimataifa wa Abeid Amani Karume,wanaotazama kamera ni baadhi ya wake wa
Watanzania hao ambao ni raia wa Somalia waliowasili jana wakitokea
Mogadishu Somalia

 Juzi, ndege mbili za Umoja wa Mataifa zinazohusika na huduma za kibinadamu ziliwabeba raia hao wa Tanzania wakitokea Somalia waliwasili  uwanja wa ndege wa Kimataifa wa Abeid Amani Karume saa 8:15 mchana wakiwa na siha njema na wenye furaha walipokelewa na Maofisa wa UNHCR Ofisi ya Tanzania.

Mkuu wa Mkoa wa Kusini Pemba, Meja mstaafu Juma Kassim Tindwa aliwapokea wananchi hao katika Bandari ya Mkoani akiwaeleza kuwa wamefanya uamuzi wa busara kurejea nyumbani kuungana na familia zao na Watanzania wengine katika ujenzi wa Taifa.

Katika Bandari ya Mkoani licha ya eneo lake kuwa dogo, wananchi wengi

walijitokeza kuwalaki raia wenzao ambao hawakuwaona kwa muda wa miaka 11 sasa waliokuwa wamekimbia vurugu za kisiasa zilizotokea Januari 26 na 27 zilizosababisha watu kadhaa kupoteza maisha na wengine kukimbia makazi yao.

Makani alisema mwisho wa safari na huduma za UNHCR ni Wilaya ya Chake Chake Mkoa wa Kusini Pemba ambapo kuanzia hapo mkataba wao wa kuwahudumia utakuwa umemalizika na watahesabika kuwa ni raia wengine wa kawaida wakiungana na familia zao.

Ofisa Habari wa UNHCR Somalia, Andy Needhem alisema raia hao wameuamua wenyewe kurejea na kwamba wengine 52 bado wapo Jijini Mogadishu wakitazama hali itakavyokuwa baada ya wenzao kurudi nyumbani.

Watanzania waliokuwa wakimbizi katika kambi ya Mogadishu
wakielekea kupanda mabasi maalum yaliyoandaliwa na Shirika la kuhudumia
wakimbizi la Umoja wa Mataifa baada ya kuwasili Uwanja wa ndege wa
Kimataifa wa Abeid Amani Karume jana

Alisema wamepata ushirikiano kutoka Serikali ya Somalia, Jamhuri ya

Muungano wa Tanzania katika kushughulikia kurejea nyumbani kwa Watanzania hao.

Ofisa Mwandamizi wa UNHCR anayehusika na ulinzi, Linmei Li,alisema kurejea kwa Watanzania hao waliokuwa wakimbizi ni matumaini kwamba hakuna nchi katika dunia yenye kinga ya kuzalisha wakimbizi iwe kubwa au ndogo kama Tanzania ambayo kwa kipindi cha miaka 40  imekuwa ikihifadhi wengine,lakini zaidi ya raia wake 2000 kutoka Pemba walikimbia Kisiwani humo na kuwa wakimbizi nchi nyengine.

“Waliokuwa wakimbizi 38 waliorejea leo wanastahiki kulindwa na nchi

yao,UNHCR tumewapatia msaada watu wazima na watoto wao kuweza kujikimu kwa muda wa miezi minne, tunaishukuru  Somalia na Tanzania” Alisema Linmei katika mkutano wake na waandishi wa habari Mjini Zanzibar jana.

Akizungumza kwa niaba ya wenzake, Rashid Abdallah Said alisema wanaishuruku UNHCR kwa huduma walizowapatia,Serikali ya Jamhuri ya Muungano wa Tanzania,Serikali ya Somalia kwa muda wote walioishi Somalia hawakupata matatizo.

Ameiomba Serikali ya Mapinduzi Zanzibar na ile ya Jamhuri ya Muungano kuwasaidia angalau chochote au hata mikopo nafuu kuweza kuanza kujitegemea kwani wana familia ambazo zinahitaji kuhudumiwa na wao hawana kazi.

Source: Na Juma Mohammed,MAELEZO Zanzibar