Askofu mpya kanisa katoliki Kigoma aapishwa,JK ataka dini kuunga mkono katiba mpya

Askofu Mteule wa kanisa katoliki jimbo la Kigoma,Mhasham Joseph Mlola (aliyelala) akisimikwa na kuwekwa wakfu na Askofu mkuu wa jimbo...

Askofu Mteule wa kanisa katoliki jimbo la Kigoma,Mhasham Joseph Mlola (aliyelala) akisimikwa na kuwekwa wakfu na Askofu mkuu wa jimbo la Tabora Paul Ruzoka  katika sherehe zilizofanyika kwenye kanisa la Bikiria Maria Mshindaji mjini Kigoma juzi.

RAISI Jakaya  kikwete amesema kuwa rasimu ya katiba mpya iliyopitishwa na Bunge la Jamhuri ya Muungano Tanzania imezingatia matakwa na misingi mikuu ya madhehebu na taasisi za dini na kwamba madhehebu ya dini yanapaswa kuiunga mkono katiba hiyo. 

Akizungumza katika sherehe za kusimikwa na kuwekwa wakfu kwa askofu wa kanisa katoliki jimbo la Kigoma,Joseph Mlola kwenye sherehe iliyofanyika katika kanisa la Bikiria Maria Mshindaji mjini Kigoma Raisi Kikwete  alisema kuwa katiba mpya imezingatia mahitaji na matakwa ya madhebu ya dini. 

Katika hotuba iliyotolewa kwa niaba yake na Waziri wa nchi ofisi ya Raisi asiye na wizara maalum,Prof.Mark Mwandosya alisema kuwa katiba mpya ina maboresho makubwa kuhusu masuala ya dini kuliko katiba ya mwaka 1977. 

Raisi Kikwete alisema kuwa licha ya katiba mpya kuwa na ibara moja lakini inafasili sita tofauti na katiba ya mwaka 1977 ambayo pia ilikuwa na ibara moja ikiwa na fasili mbili. 

Kiongozi huyo alisema kuwa madhehebu ya dini yanao mchango mkubwa katika suala la amani ya nchi na maendeleo na hivyo kuyataka madhehebu ya dini kuzingatia umuhimu wa kusimamia mambo hayo. 

Katika hatua nyingine Raisi Kikwete amemtaka Askofu Mpya wa Jimbo la Kigoma,Joseph Mlola  kulifanyia kazi suala la amani katika nchi Jamhuri ya Kidemokrasi ya Congo na Burundi ambapo alisema kuwa haileti maana kuona upande mmoja wa ziwa ukiwa na amani na upande mwingine ukiwa na amani haba.

Askofu Mkuu Mstaafu wa jimbo la Kigoma Mhasham Protas Rugambwa  (kulia) akimuwekea mikono ya baraka Askofu Mteule wa jimbo la Kigoma Joseph Mlola (kushoto) ikiwa ishara ya kumsimika na kumuweka kwafu kuwa askofu mpya wa jimbo la Kigoma.

Akizungumza katika sherehe hizo Askofu Mpya wa kanisa katoliki jimbo la Kigoma, Mhasham Joseph Mlola ameahidi kufanya kazi ya kitume kwa kulitumikia kanisa na watu wake.

Awali Raisi wa Baraza la Maaskofu Tanzania,Askofu Mkuu Tarcisius Ngalalekumtwa amesema kuwa kanisa katol jimbo hilo lina urithi na utajiri mkubwa wa imani uliopandwa na wamisionari wa Afrika ambao ni fursa tosha katika kukuza na kuendeleza kazi ya uinjlishaji jimboni humo. 

Pamoja na fursa hizo bado ziko changamoto zinazolikabili kanisa ambalo linaishi katika jamii changamoto ambazo zimejadiliwa katika Sinodi ya kwanza ya jimbo la Kigoma na hivyo kuwepo na nia na dhamira ya kweli katika kuendeleza uhai na utume wa kanisa. 

Kwa upande wake Balozi  wa Papa Benedict wa 16 nchini, Askofu Mkuu,Francisco Padilya amemtaka Askofu Mlola kuwa jasiri katika kuubeba msalaba kuutumikia utume kwani kutokuwa jasiri kunaweza kuleta shida katika kutimiza utume wake.

Sambamba na hilo amemtaka askofu huyo wa jimbo la Kigoma kusimama katika ukweli kwani ndiyo unaoweza kumuweka huru katika utumishi wake.

Sherehe hizo za kuwekwa wakfu na kusimikwa kwa Askofu Joseph Mlola kulihudhuriwa na Maaskofu zaidi ya 20 kutoka majimbo mbalimbali nchini, Maaskofu wanne kutoka majimbo ya Burundi, watawa na mapadre zaidi ya 500 kutoka maeneo mbalimbali nchini na viongozi wa serikali wakiongozwa na Mkuu wa mkoa kigoma,Issa Machibya.

Source: Fadhili Abdallah,HabarileoKigoma