Kituo cha kisasa cha tiba cha NHIF chakabidhiwa Dodoma

KITUO cha kisasa cha matibabu   chenye mfumo wa kisasa wa miito ya manesi (Nurse Call System) kimekabidhiwa kwa katibu tawala wa mkoa...

KITUO cha kisasa cha matibabu  chenye mfumo wa kisasa wa miito ya manesi (Nurse Call System) kimekabidhiwa kwa katibu tawala wa mkoa wa Dodoma leo asubuhi.

Kituo hicho kilichokabidhiwa ambacho ni cha Mfano cha Uchunguzi na Matibabu (Centre of Medical Excellence) kipo katika Hospitali ya Rufaa ya Mkoa wa Dodoma.

Kituo hicho kina jengo la Hospitali litakalokuwa na sehemu ya mapokezi, sehemu ya kutolea dawa, sehemu ya dharura, maabara, vyumba vya uchunguzi, vyumba vya madaktari, chumba cha upasuaji, chumba cha wagonjwa mahututi, kliniki mbalimbali na sehemu kulaza wagonjwa ambapo kutakuwa na vitanda 34.

Aidha kuna Jengo la mgahawa na Jengo la jenereta na transfoma.

Akikabidhi kituo hicho Kaimu Mkurugenzi wa Mfuko wa Taifa wa Bima ya Afya (NHIF) Michael Mhando alisema ni matarajio ya Mfuko huo kuwa kukamilika kwa ujenzi wa Kituo na hatimaye kuanza kutoa huduma hivi karibuni kutaboresha utoaji wa huduma za afya kwa wanachama wa Mfuko wa Taifa wa Bima ya Afya na wananchi wote.

“Mfuko unatoa rai kwa Hospitali ya Rufaa ya Mkoa wa Dodoma ambao utakabidhiwa uendeshaji wa kituo hiki kulitunza jengo hili, vifaa tiba na samani ili viweze kudumu kwa muda mrefu.” alisema wakati wa makabidhiano.

 

Kituo hicho kwa mujibu wa Mhando kinatarajiwa kusaidia kuwepo kwa watalamu wenye uzoefu nchini kwani itakuwa ni sehemu ya kujifunzia kwa wataalamu wa kada mbalimbali za udaktari na utabibu wawapo masomoni katika mkoa wa Dodoma na mikoa mingine ya Tanzania.

Aidha alisema Kituo hicho kitaendeshwa na Katibu Tawala wa Mkoa wa Dodoma kupitia Hospitali ya Rufaa ya Mkoa wa Dodoma kwa makubaliano ambayo Katibu Tawala wa Mkoa ataurejeshea Mfuko gharama iliyowekeza katika Ujenzi wa kituo.

“Mfuko unakabidhi uendeshaji wa kituo hiki kwa Katibu Twala wa Mkoa wa Dodoma kwa kutambua kuwa Hospitali ya Rufaa ya Mkoa wa Dodoma inao watumishi wa kutosha wa kada mabalimbali ikiwemo madaktari bingwa wa kuweza kukiendesha Kituo hiki kwa ufanisi na kutekeleza kwa vitendo kauli mbiu ya Rais wa awamu ya Tano ya HAPA KAZI TU,” alisema Mhando katika mazungumzo yake.

Aidha alisema kwmaba kituo hicho kinatarajiwa kuanza kutoa huduma mapema Januari, 2016 ambapo inatarajiwa kuwa taratibu za ununuzi wa vifaa tiba na samani utakuwa umekamilika.

 “Kinachokabidhiwa leo ni awamu ya kwanza ya mradi. Mfuko umeshaanza utekelezaji wa awamu ya pili ya ujenzi ambayo inajumuisha ujenzi wa chumba cha kuhifadhia maiti, sehemu ya kuchomea taka na sehemu ya kufulia nguo. Mtaalamu mshauri kwa ajili ya kazi hii amekwishapatikana na anaendelea na kazi. Kazi za ujenzi kwa awamu ya pili zinatarajiwa kuanza katika mwaka huu wa fedha, “ alisema.

 Mtaalamu wa ushauri katika ujenzi huo zilifanywa na NOSUTO Associates Ltd.Aidha alisaidiwa  na wataalamu washauri wengine ni Tan Consult Ltd kwa upande wa uhandisi wa ubunifu wa majengo (Structural Engineering), Kimphil Konsult Ltd kwa upande wa uhandisi huduma za jengo (Engineering Services) na Kampuni ya Bangalima& Associates kwa upande wa ukadiriaji majenzi (Quantity Surveying).

Mkandarasi Mkuu alikuwa ni  Tanzania Building Workings Ltd  na wakandarasi wasaidizi ni Remco (International) Ltd kwa upande wa ufungaji wa viyoyozi (Air Conditioning Installation), Tropical Aluminum & Glass Industries Ltd kwa upande wa kuweka milango, madirisha ya aluminium (Glass and Aluminium Glazing),na Techno Image Ltd kwa ajili ya ufungaji wa mfumo wa mawasiliano  (Data and Structural Cabling).

mwisho