DC Kilwa aeleza sababu ya kutakiwa Sumatra wilayani mwake

MKUU wa wilaya ya Kilwa, Christopher  Ngubiagai ameitaka mamlaka ya Udhibiti wa Usafiri wa Majini na Nchi Kavu (SUMATRA) kuanzisha ofisi y...

MKUU wa wilaya ya Kilwa, Christopher  Ngubiagai ameitaka mamlaka ya Udhibiti wa Usafiri wa Majini na Nchi Kavu (SUMATRA) kuanzisha ofisi yake katika wilaya hiyo kusaidia kuepusha maafa kwa watumiaji wa usafiri wa baharini.

Alisema wilaya hiyo yenye ukanda mkubwa wa bahari na visiwa takribani vinane vinavyokaliwa na wananchi hutegemea zaidi usafiri wa baharini ambao unaonekana si salama.

Alisema  vyombo vingi vya bahari vinavyofanyakazi havijakaguliwa wala kupata hati au leseni ya kuwa baharini kw ashughuli wanazofanya.

Alisema wakazi wa hapa wanafuata mkondo wa kuzaliwa katika utengenezaji wa vyombo vya baharini na usafirishaji kwa kuwa wao wamezaliwa na kukulia kandoni mwa bahari au katika kisiwa, lakini hawajui maana ya chombo salama kinatakiwa kiweje.

Mkuu huyo wa wilaya alisema ili kuwepo na  uepushaji wa ajali za baharini kutokana na ama kuzidi kwa watu katika vyombo au vyombo vyenyewe kutokidhi matakwa ya kiusalama ni vyema Sumatra wakawa na ofisi katika wilaya hiyo au kuanzisha hata dawati na kumweka ofisa wake ambaye atashirikiana na wadau wengine pamoja na Ofisi ya mkuu wa wilaya kutekeleza majukumu yake.

Alisema katika mazungumzo hivi karibuni kwamba wito wake huo wa kuwa na ofisi ya Sumatra  unatokana na kuwapo kwa mahitaji halisi ya chombo hicho ili kudhibiti mwenendo wa vyombo na kutoa elimu kwa wananchi namna bora ya kuwa salama katika shughuli za baharini.

“Nataka kukuambia mwandishi wa habari kwamba kamati ya ulinzi na usalama siku moja tulipotea kwa takribani saa nane baharini ni Mungu tu alitusaidia kuona nchi kavu tena” alisema mkuu huyo wa wilaya.

Alisema anaona hatari kubwa kwa wakazi wa eneo hilo la kutumia vyombo ambavyo havijathibitishwa kitaalamu  kwamba vinafaa kwa kazi iliyokusudiwa.

Alisema kuwepo kwa Sumatra kutasaidia kuhamasisha watumiaji wa boti na vyombo mbalimbali vya baharini kujua uwezo wa vyombo vyao, namna ya kujikinga na ajali na pia kuanza utaratibu unaostahili wa usafiri wa majini kwa kuwa na manifesto.

“Najua shughuli za wananchi wangu ni uvuvi na usafiri wanaotegemea kutoka Kilwa Kivinje au Kilwa masoko kwenda visiwani ni boti lakini usalama wa vyombo hivyo ni wa kutiliwa shaka” alisema Ngubiagai.

Pia alisema Sumatra itawasaidia kuboresha usafiri hivyo kuepusha ajali za majini iwe kwa vyombo vya usafiri au uvuvi kwa kuwa kutakuwa na leseni ya ubora wa chombo na kinastahili kufanyakazi gani.

“Tunataka baadae kuwepo na taarifa rasmi tuna boti ngapi zinafanya nini katika ukanda wetu ili litokeapo tatizo tujue tunafanya nini” alisema Mkuu huyo wa wilaya.

Mmoja wa wakazi wa Kilwa kivinje ambaye pia anamiliki boti, Asia Mohamed pamoja na kuunga mkono kauli ya mkuu wa wilaya, alitaka wananchi wa Kilwa kusaidiwa kuwa bora na salama zaidi kwa elimu na pia kuwezeshwa mikopo kununua vifaa bora zaidi.

Pia alitaka kuwepo na boti ya uokoaji na wananchi kufunzwa namna ya uokoaji.

Alisema shughuli zao nyingi ni baharini na pia maisha ya wakazi wengi yapo visiwani hivyo ni vyema Sumatra ikaanzisha ofisi na kuwahudumia ili waondokane na ajali zisizokuwa na sababu.

Mkazi mwingine Aziza Kalembo yeye alitaka uwapo wa ofisi na pia wananchi kuwezeshwa kufanya shughuli zao kwa usalama zaidi kwani kipato chao kinategemea bahari.

Naye Jaffari Arobaini alisema amefurahishwa sana na wazo la kutaka ofisi ya Sumatra iwepo Kilwa kwani itasaidia sana kuleta elimu na pia kuonesha manufaa ya chombo cha baharini kukaguliwa.

Hata hivyo yeye anaona kwamba  ujio wao taasisi hiyo unachelewa sana na hivyo kuonesha shaka kwamba serikali haiwajali wao wakati wanalewa fika kwamba wanaitegemea bahari kwa kila kitu  kuanzia masuala ya uchumi na hata jamii kwenye usafirishaji abiria.

“Tunataka waje, tunawahitaji sio kutoa semina tu bali waweke ofisi ili tusaidiane katika masuala ya msingi ya kuendeleza wananchi wa Kilwa” alisema

mwisho