Museveni: Nyerere ni nguzo ya umoja Afrika

Na Mwandishi Maalumu, Kampala RAIS Yoweri Museveni amemuenzi Baba wa Taifa la Tanzania, Mwalimu Julius Nyerere na kusema ni mtu muhimu...

Na Mwandishi Maalumu, Kampala

RAIS Yoweri Museveni amemuenzi Baba wa Taifa la Tanzania, Mwalimu Julius Nyerere na kusema ni mtu muhimu kwa umoja wa Bara la Afrika na historia ya binadamu duniani kote.

Akizungumza katika Misa ya kumuombea Baba wa Taifa Mwalimu Julius Nyerere kuwa Mwenyeheri na hatimaye kuwa Mtakatifu katika Kanisa la Watakatifu Mashahidi wa Uganda juzi, Namugongo pia alipongeza mahujaji waliofika kutoka maeneo mbalimbali ya Afrika kwa ajili ya misa hiyo.

Akizungumza na mahujaji hao kutoka Kenya, DRC, Rwanda, Burundi, Nigeria huku Watanzania 500 wakiwa miongoni mwao, alisema hija hiyo si ya kisiasa bali ya kuonesha umoja wa mataifa ya Afrika.

Misa za kumuombea Baba wa Taifa la Tanzania zimeanza miaka sita iliyopita, zikifanyika Juni mosi ya kila mwaka na kupewa jina la Siku ya Kambarage.

Kwa sasa Julius Nyerere ni mmoja wa Watendakazi wa Mungu;  baada ya hatua hii atatangazwa kuwa Mwenyeheri na baada ya hapo atatangazwa kuwa mtakatifu.

“Kwa miaka milioni 4.5  iliyopita, ambapo watu wa Magharibi wangeliita Nyakati za giza kwa bara la Afrika kwa kukosa maendeleo, hakuna mwafrika aliyepigania umoja wa Afrika na uhuru kama Nyerere, sisi Waganda tunashukuru sana,” alisema Museveni.

Rais Museveni alishukuru wananchi wa Uganda kwa kujitokeza kwa wingi na kujiunga na mjane wa Baba wa Taifa, Maria Nyerere na familia nzima kwa ajili ya misa hiyo na kusema Nyerere alikuwa mzazi na aliyeshika dini yake.

Aidha Museveni ambaye amekuwa akijinadi kama mtoto wa Kwanza wa Mwalimu Nyerere, alisema iko haja ya kuimarisha hija hiyo.

Siku ya Nyerere, mwaka huu inaadhimishwa kwa kaulimbiu ya: “Heri yake taifa ambalo wananchi wake wanakubali mashahidi.”

Msemaji wa familia ya Nyerere, Anna Nyerere 

Katika misa hiyo iliyoongozwa na Vika wa Jimbo Kuu la Kampala, Charles Kasibante kwa niaba ya Askofu Mkuu Cyprian Lwanga, mahubiri yalilenga umoja wa familia, taifa na imani iliyo kuu.

Vika Kasibante alisema kwamba ujio wa Mama Nyerere umeamsha hisia katika siku hiyo ya Mashahidi na kuleta kumbukumbu za Mwalimu Nyerere wakati akiwa hai.

Siku ya Nyerere inatangulia siku ya mashahidi wa Uganda inayoadhimishwa Juni 3 na madhehebu ya Kikristo ya Katoliki na Anglikana.

Balozi wa Tanzania nchini Uganda, Dk Aziz Ponary Mima  alisema Mwalimu Nyerere atakumbukwa kwa kupigania uafrika, ubinadamu na utu akitetea usalama na demokrasia ili kuwa na Afrika iliyo bora.

Profesa Mark Mwandosya alishukuru wananchi wa Uganda hasa Rais Museveni ambaye alifanya kazi karibu na Mwalimu Nyerere na kusema kwamba wataendelea kusali ili Mungu asikie sauti ya kumfanya Nyerere Mtakatifu.

Msemaji wa familia ya Nyerere, Anna Nyerere alimshukuru Rais Museveni kwa kuwaunga mkono Siku ya Nyerere  na kutambulika kwa sala za kuomba utakatifu wa Nyerere.