Samia afurahishwa na kutimiza maagizo kuhusu kuzuru kanisa la Peramiho

Na Mwandishi wetu, Songea IKIWA imepita miaka tisa tangu alipochaguliwa kuwa mgombea mwenza wa Urais ,Rais Samia Suluhu Hassan ameeleza ...

Na Mwandishi wetu, Songea IKIWA imepita miaka tisa tangu alipochaguliwa kuwa mgombea mwenza wa Urais ,Rais Samia Suluhu Hassan ameeleza furaha yake ya kuingia katika kanisa la kihistoria la Peramiho. “Nilipochaguliwa kuwa mgombea mwenza bara, ... mmoja wa wale kaka zangu wa Anglikana alikuja akaniambia unakwenda bara usiache Kwenda kanisa la Peramiho. "Nikamuuliza kwanini? Akaniambia si unaona hili kanisa letu? Lilivyo hili ndivyo lilivyo lile.” alisema Rais samia akielezea kwanini hasa aiomba kuingia katika kanisa hilo. Alisema alipoingia kwenye kanisa la Peramiho alijithibitishia maneno ya yule Padri wa Zanzibar kwa kuwa muundo alioukuta na historia aliyoelezewa ilikuwa inafanana kabisa na lile la Zanzibar na aliongeza kuwa kufika kwake kwenye kanisa hilo ametekeleza alichoelekezwa na ameelewa kwanini padri yule alimtafadhalisha.

Rais Samia Suluhu Hassan baada ya kuingia na kuangaia uzuri wa kanisa hilo amewataka Watanzania wajenge msingi wa upendo baina yao bila kujali tofauti za kidini zilizopo, kwa kuwa dini ni njia ya kuwelekeza watu namna ya kuishi vizuri na si sababu ya kuwagawa. Akizunguma na masista na mapadri katika Kanisa Katoliki la Peramiho, Songea mkoani Ruvuma wakati wa ziara yake inayoendelea mkoani humo. Alisema ukristo uliingia Zanzibar kupitia lango la la Zanzibar kanisa la kwanza likiwa ni la Anglikana na kuifanya jamii ya Waislamu na Wakristo kuishi kama ndugu huku wakishirikiana katika mambo yote ikiwemo sherehe. “Mfalme alikubali wamisionari wakaingia wakajenga makanisa makubwa, lakini madhehebu ya kwanza kuingia yalikuwa ni waanglikana, tunaishi pamoja, kanisa la wakatoliki lilikuja baadaye sana. Maisha yetu kule Zanzibar Waanglikana na Waislamu, ni ndugu, unaweza ukakuta mtu anaitwa Asha jina la pili Margareth, ukakuta Blandina jina la pili Jamila ndiyo Maisha yetu,” alisema. “Ombi langu kwenu tupendane, watanzania ni sisi, dini ni msingi ya kutuelekeza jinsi ya kuishi, ...tutatofautiana maumbo lakini maumbile ni yale yale, ... Mungu katugawa makundi tofauti dhamira yake tufanye kazi tutegemeane,” alisema Rais Samia.

Aidha aliwataka Watanzania kukwepa kelele za ushawishi wa vurugu zinazoendelea mtaani na kusema kuwa hiyo si sera ya CCM wala serikali ya Tanzania. “Mnawasikia wengine huko, mara maandamano! Tukapigane! Tusukumane! Hiyo si sera yetu, sisi sera yetu ni wananchi wetu waishi kwa raha, waishi na amani kuwe na utulivu wa kisiasa wananchi waweze kufanya mambo yao kwa raha, hayo mengine waachieni wenyewe!” alisema. Alisema Serikali ya CCM ndiyo inayojali wananchi kwa maendeleo na hilo linathibitishwa na maendeleo yaliyofanyika katika kipindi cha miaka mitatu aliyokaa madarakani yeye na timu ya mawaziri wake akiwemo Mbunge wa Peramiho Jenista Mgama ambaye kwa sasa ni Waziri wa Afya.