IMF YARIDHISHWA NA UTEKELEZAJI WA PROGRAMU ZA UCHUMI TANZANIA

Waziri wa Fedha, Mhe. Dkt. Mwigulu Lameck Nchemba (Mb) akisalimiana na Kiongozi wa Timu ya Wataalam kutoka Shirika la Fedha la Kimataifa-IMF...

Waziri wa Fedha, Mhe. Dkt. Mwigulu Lameck Nchemba (Mb) akisalimiana na Kiongozi wa Timu ya Wataalam kutoka Shirika la Fedha la Kimataifa-IMF, Bw. Nicolas Blancher, wakati wa kuhitimisha vikao vya majadiliano kati ya Serikali na IMF kuhusu tathimini ya awamu ya tano ya utekelezaji wa program ya Extended Credit Facility-(ECF)

Na Mwandishi wetu BSKY Media

Shirika la Fedha la Kimataifa (IMF) limeonesha kuridhishwa na utekelezaji mzuri wa programu za Extended Credit Facility (ECF) na Resilient and Sustainable Fund (RSF) nchini Tanzania. 

Kauli hiyo imetolewa na Kiongozi wa timu ya wataalamu wa IMF waliofanya tathmini ya awamu ya tano, Bw. Nicolas Blancher, ambaye alieleza kuwa tathmini yao imebaini kuwa Tanzania imetekeleza vizuri mipango hiyo miwili.

Alisema hayo wakati wa kufunga rasmi vikao vya majadiliano kati ya Serikali na timu ya wataalamu wa IMF, baada ya kukamilisha tathmini ya awamu ya tano ya utekelezaji wa programu ya ECF, inayohusu mkopo nafuu kwa ajili ya kuimarisha uchumi kupitia sekta za uzalishaji na huduma za jamii. 

Timu hiyo ya IMF pia walikamilisha tathmini ya awamu ya pili ya utekelezaji wa programu ya kukabiliana na athari za mabadiliko ya tabianchi kupitia mfuko wa RSF kutoka IMF.

Kufuatia matokeo hayo chanya, Waziri wa Fedha, Dkt. Mwigulu Lameck Nchemba (Mb), alilihakikishia IMF kwamba Serikali itaendelea kuimarisha sera na mipango yake. Alisema kipaumbele kitaendelea kutolewa kwa sekta mbalimbali za kiuchumi na kijamii, pamoja na kuimarisha mazingira ya biashara kwa sekta binafsi.

Katika kikao cha majumuisho kilichofanyika Benki Kuu ya Tanzania (BoT) jijini Dar es Salaam, Dkt. Nchemba alieleza kufurahishwa na taarifa iliyotolewa na Bw. Blancher, inayoonesha utekelezaji mzuri wa vigezo vilivyowekwa na IMF katika programu za ECF na RSF.

Aliahidi kuwa Serikali itaendelea kusimamia kwa karibu utekelezaji wa programu hizo mbili, zenye thamani ya Dola za Kimarekani bilioni 1.832. Kati ya hizo, Dola bilioni 1.1 zimetengwa kwa ajili ya kuimarisha uchumi kupitia sekta za uzalishaji, na Dola milioni 786 ni kwa ajili ya kukabiliana na athari za mabadiliko ya tabianchi. Programu hizi zinatekelezwa kwa muda wa miaka minne, kuanzia mwaka 2022/2023 hadi 2025/2026.

Waziri wa Fedha, Mhe. Dkt. Mwigulu Lameck Nchemba (Mb) akiongoza kikao cha kuhitimisha vikao vya majadiliano kati ya Serikali na Shirika la Fedha la Kimataifa (IMF) kuhusu tathimini ya awamu ya tano ya utekelezaji wa program ya Extended Credit Facility-(ECF

Bw. Blancher alishauri kuendelezwa kwa hatua mbalimbali, ikiwa ni pamoja na kuimarisha zaidi huduma za jamii na kuendelea kuboresha mazingira ya biashara na uwekezaji.

“Matarajio ya uchumi wa Tanzania ni mazuri kwani unaendelea kukua kwa kasi, huku mfumuko wa bei ukiendelea kuwa chini, upungufu katika biashara ya bidhaa na huduma na nchi za nje ukipungua, na upatikanaji wa fedha za kigeni ukiongezeka,” alisema Bw. Blancher.

Aliongeza kuwa hatua za kuweka uwiano mzuri kati ya mapato na matumizi ya serikali katika mwaka wa fedha 2025/26 zitasaidia kudumisha uimara wa deni la serikali, huku zikilinda matumizi yenye kipaumbele katika sekta za kijamii.

Bw. Blancher alisisitiza kuwa kuendelea kutekeleza sera za kukabiliana na athari za mabadiliko ya tabianchi, zinazoungwa mkono na programu ya RSF, kutasaidia kuimarisha uwezo wa nchi katika kukabiliana na madhara hayo.

Alifahamisha kuwa mapendekezo ya tathmini hiyo yatapelekwa kwa Bodi ya Wakurugenzi wa IMF, na uamuzi utakaotolewa utaiwezesha Tanzania kupokea ufadhili wa Dola za Marekani milioni 441.

Tanzania imefanyiwa tathmini ya awamu ya tano ili kupata fedha kutoka IMF kwa ajili ya kutekeleza miradi mbalimbali ya kiuchumi na kijamii. Hadi sasa, programu ya ECF imepokea kiasi cha Dola za Marekani milioni 754.3 kati ya Dola bilioni 1.1 zilizopangwa, na kiasi kingine cha Dola za Marekani milioni 55 kimepokelewa kupitia mfuko wa RSF, ambao una thamani ya Dola za Marekani milioni 786.

Kikao hicho kilihudhuriwa na Katibu Mkuu wa Wizara ya Fedha, Dkt. Natu El-Maamry Mwamba, Gavana wa Benki Kuu ya Tanzania, Bw. Emmanuel Tutuba, Manaibu Gavana, pamoja na Maafisa Waandamizi wa Serikali na wajumbe wa timu ya tathmini kutoka IMF.